(Yesus Bumare Euboye, Roh Kudus Yemmele a Ukeume) ¹ Nabere hele moloukokale homona, Teofilus, Yesus Na kaliya merau raungehike mokowoye namekai keleweumi, ² meke Naei yobumare raneukike ewoye, Na ahuwe kolowoye Rohre eita, Na abu akore ro riyare. ³ Bele ro riyare, meke herekera waeuboke Na u Nenaeijae meke yakalaumiboke, ro u bee hangga yae meke nembainye nekewate a faeu kelewoumi weuboumi, Na yo yam mende maei. ⁴ Nambele nembainye nekewatemo, na moita ohowate yore weumi, Yerusalem yo enukeijaemo nekembe, bele yone mo nekembe rakembe, Ako Naei are ukembe ha, "Raeita borombombe, ⁵ Yohanes buyae kolowoumi, meyae na heki bammo Roh Kudusya, mai u bulu ne nekende." (Yesus Surga Yobumare Raineukire Ewoye) ⁶ Beleneyae, nembainye arilewoyemo Yesusre hinainyele, "Tuhan na rake hee yae Weyae Israel maei yo yam angunundere?" ⁷ Yesus yae weumi, "Bele Maekore itaijae, meyae itayeiboi hangga, "Bele ya yaele hu yaele Maeko Nenaeijae merau raungehike. ⁸ Bele, yaere Allah rena Roh mai u ne anneombombe hee meyae nemene ela rowembe, meyae Raei are huwemmiyembe, Yerusalem yora, Yudea kanina nemene, namekai Samaria, kanira embe rake kani kela na hubane haeinye ennehalenggombe." ⁹ Bele, a weumikoke beufoke, nabu ako maei bene Yesus raneukike bumare ewoye, kanewainyele, manggo yae meke hileumikoke. ¹⁰ Yesus kaeuboke bumare yeyemo nammam kanewainyele, ro bee na malo keleumom wilihalamam hireikoke, na abu ako bokone mekete yakalaiboke, ¹¹ hokolo bee yae weimile, "Galilea kanina ro miyae, mekane belene hebaube, ma ijoko yakuremo kanaube? Bele Yesus mbai meyae ijokore eraungele raneukike eye wanem mbai Neyae benem bensonde mende." (Ro Mbai Elaeiboke Abu Akore Yeuboke) ¹² Bele ramo, na abu ako Zaitun homunggaere bukaiboke Yerusalem yore mekaite. ¹³ Imae eite arulaiboke nahibi bumana yowa naei nekate anuwauke ikate, belena Petrus, Yohanes, Yakobus, Andreas, Filipus, Tomas, Bartolomeus, Matius, Yakobus Alfeusre kelu namekai Simon Zelotna ro, Yudas Yakobus re kelu. ¹⁴ Nemene na kena mbai arileisiyate nekate, ebeli miyae-miyae yaele nembainye imokaite namekai Maria Yesus nenakere, namekai naei aka baeke yaelenembainye. ¹⁵ Ya mbai arileufike nekewate, Petrus aunguke weumi, ( ro nahelem 120 hangga), ¹⁶ "Aka naei baeke naei, Allahre homofae Roh Kudusyae Daudre eugara moloukoke, Yudasyae be nembonde ro miyae yawemmibonde Yesusre kilinaibonde. ¹⁷ Yudas aei holo mbainye ohowande, neyae aembele mbainye kaliya mokowande. ¹⁸ Bele Yudas kelaite neuboke roi jae kani mbai rouke, bele anuwaunge bumare ruke hereke, na yahale kayeukoke, na kabiyae nemene maibaleke. ¹⁹ Bele yeuboke ro miyae Yerusalem yona nekewate yo itayaeiboke nekewate, bele anuwau naei afaeubae Hakal-Dama, namekai, 'Oki kani'. ²⁰ Homofaene Mazmur Daudyae moloukoke: 'Ninaeba, naei nekeweke anuwau aku bam nau bam hononende, hiyae-hayae bele anuwaunge enekeijaemo namekai a ehi moloukoke,' 'Naei anuwau, anggem nekei, ro ehi yae elenaibonde ennekende.' ²¹ Ro mbai Yesus Naei na, abu ako yaele nembainyemo yohira yohire ohowate aei nolora, ²² Yohanes bure kolowoumi heera meke Yesus surga yo bumare raneukike euboye, bele nolora ro mbai roumale, nembainye Yesus waleuboke a ro miyaere huwemamiyende." ²³ Ro bee elaeikoke, Yusuf, Barsabas naro ehi Yustusyae kaeneinyele, namekai Matias. ²⁴ Ebeli Tuhanre bomansim, "Tuhan, ro miyae maei kena ei-u ei Weyae wataeimo. Maere keleimobo, rake ro bee niyae, Tuhan Weyae eleubondere, ²⁵ Waei abu akore yembondere, Yudas weke, naei anuwau nenaeijae kena koukoke." ²⁶ Abu ako naei nolora undi hayaeikoke, undi Matiasre u ne ruke, Matias me baeiboke Yeus Naei abu akore yeuboke.