¹ Paulus rena homo benem kaye Timotiusre ikeunge Onomi foka, Timotius, weyae raei kelu wanemne kena buhae haewale, reyae Paulus, Allah yae eleukeboke naei abu ako re yeubokale, naei a faeu ke keleremi yendere, wali hena bona emayaronde. ² Timotius, Reyae ebeli bale, Ako Allah, Na kelu Yesus Kristus foi moi sele, kena buhae henenbe namekai kayaa hebenembe nekemembe. (Allahre ei molomannele namekai kena ammobonde) ³ Timotius, waei aerene reyae Allahre rei mai sele kanale mekanebam maei yobe-yobe naei mekai jae mokowate, mana reyae mekale bele mekai mbai jae ra wali nekejade reniai rae ware ennundeikoi, raei ebeli na hibi-hibi mo molawale. ⁴ Ware bene nekeisiweke hee, ra bene nemmam nekeuke, here bougenhee waei ijoko ibo balewate. Beleneyae reyae kena hele kale wambele hubayaekondere, belene naei kena foi itebonde. ⁵ Reyae bene nekeuke, weyae nehale wa hila rabo Yesusre kabam hele harene. Anggem Lois re ana Eunike naei mekai sele na hilarabo Yesusre hale wonyele, weyae naei wali mekai jae roukae. Beleneyae ware itaei mekai jae wawale, weyae na hibi-hibi yae Allah eleibokete mekai jae wa wali haraungekebonde. ⁶ Meli mekai Allah yae ikete, i faeu beye mekai rahibi nenae bennende. ⁷ Mekanebam, Roh Allah aei kena einye u einye arulensindena, aeyae fe efaei jae namekai aehubu hubu ororoijae. Bele Roh yae aere ela wake yemmele, kena buhae mae-mae aei wali ne namekai u he roromale. ⁸ Beleneyae, Yesus meke maei elemale huwe male, fe efaei jae reyae Paulus naei mekai Yesusre aerene kawa einye hilatekoke. ⁹ Allah rena elae wake ikeume, bele elaeyae rambele mambele nembainye Allah kaeneamekoke mekende naei a foi faeu foi re ro miyae emmahuwendere. ¹⁰ Allah naei kena buhae kabam here aere ikeume, rake kani kela na mokouboke meke rake hee. ¹¹ Beleneyae Yesus na u yae meke onomi ikeumi, here kaka, walobo namene naei me kelee u keleene mo heraweuboke. ¹² Yesusre aerene reyae kawa einye hilatekoke, reyae de ehubai, mekanebam Yesusre ro roungebokale, naere mo hila rabo halemande, rakemennende naei yaa mende. ¹³ Beleneyae, reyae kelamale a hele faeu hele me bobo keluwembe, hila rabo halembe, mekanebam Allah rena Roh yae ammobonde ela wake roumale moko mayende. ¹⁴ Allah rena elae wake, Roh Allah yae elae yemmilena a foi faeu foi ro miyae ehire huwemamile. ¹⁵ Meyae anggaei borowaube, aei aka baeke Asia kanina yo rare nulaneteboke ha beme kele Figelus re Hermogenes. ¹⁶ Onesiforus mbai, rare rikewoke hakawouke. Raei ebeli Tuhanre bannale, Onesiforus ro miyae fayaele oneyeumile. ¹⁷ Reyae kawa einye hilatekoke horo, Onesiforus fe efaei, ¹⁸ Meyae raei bokora, Roma kanire meke hee, namekai meke rare baeuboke, hubayendekoke u taei, elae wake rare yeubouke. Meyae mateai, Efesus yone nekewale re Onesiforus yae helem rikewouke.