¹ Onomi fokha meyae Allah yea eleukokhe holona ro miyae,nakhe miyae naei khelu omi bhele homo mbaeinye orauge waneng yo,reyae Yohanes,jemaat naei bhe yun re hebhate holona ro.Reyae Wali Ondofolole walora na hele wali nibhine orale yae mare bhuhae haemale.Reyae mo bhang,ro miyae nanemene Wali Ondofolole walora na hele wali nibhire rainyebhoke yo bhele mare khena bhuhae haeyambhe. ² Reyae mare haemale,rambunghine bhang nebhei wali nibhi a aei khena u einye nekhele nebhei waneng hubha haei bhang nekhenende. ³ Reyae ebheli bhanale,Wali Ondofolole walora na hele wali nibhine oromalene,nebhei waneng khena bhuhae aere bhang honoimeyele,yanekoi yae ei haweneimele nebhei waneng khena foi u foi mokhoneimele. ⁴ Raei khena u rei mai sele khale,rambunghine bhang mai jemaat nolona ro miyae hiwa yo ndane hubhayaendekokhe nebhei waneng nebhei yo eramaele Allah are ukeumi huluinye Wali Ondofolole walora na hele wali nibhine orate. ⁵ Nebheinye reyae mare jemaat wamale maeise naeise khena bhuhae u bhuhae hemembe.Nebhei wamale a eme bhang,na bheme fomene Allah yae ukeume a faeu bhoraukokhe ma mbai mo honoimeyele. ⁶ Aeise naeise khena bhuhae u bhuhae hemembe nebhei waneng u mekhaiAllah yae are weume hului mokhomale. ⁷ Nebhei a wamale,rambunghine bhang ro miyae heleng nda khani kelana hubhane faeungekokhe oroyate,wali nibhi mahi ame-amebhe khelaimi.Yesusre Allah yae oro umaufe heraweungebhokhe Wali Ondofolore raneujekhe a nebhei waneng Neyae ro miyae uga yae mekhe are nda a ame-amere khelaimi yo yae na hele bhang mae elate.Nebhei ro miyae ame-amebhe wabhaimi nebhei waneng Wali Ondofolore ro bhang yembondere releyainyelen holona yobhe nekhate. ⁸ mauga kayaa bhele hebhembe meyae khelewayembe are u bhene nundenayenggombe bhele,nebheibe meyae elae relennele Na me bhuhae na hului enjarombe. ⁹ Yesus Wali Ondofolo yae khelewoumi a usaei weisaei huluinye enekhei ro miyae,Allah bhele mbainye enekhei.Nebheibhe nde yae Wali Ondofolo kheleumi a usaei waeisaei huluinye nekhende kiyae,Akho Allah bhele Na Khelu Yesus bhele mbainye nekhate. ¹⁰ Ro miyae maei bhokhore menate yo a usaei waeisaei nda a faeu wamalera mahi hunggatena,nebhei ro miyaere maei imaere enatena ei ehaweijae,nebhei waneng nebhei ro yore wauga bhele a emelaeyemmimae. ¹¹ Nde yae nebhei holona yore ei hawemmilena,nebhei holona yae me u bhekho mokhatere nanggele yeubokhe mokhate. ¹² A heleng bholeng sele nda homo molalena isaeisemberebe,nebheibhe tinta yae homo raitainye molorekonde naei reyae khena bhang.Reyae rabho halaele na heki bhang mo manggele hubhaimakonde,nebhei waneng aei khenare rei mai ammebhonde komale naeise,bhe yoi mbainye eremale nebhei waneng a faeu mbainye elemale. ¹³ Nda jemaatna ro miyae mai jemaat einye ro miyaere ro melaeyayembe.Maei jemaat bhele mai jemaatbhele Allah yae eleukokhe ukeumi akho mbainya emaen wanen nekhande.