1 Ngge Ki Wali nebut nemotgo seni : ngga duen beab ketang nogo gabe, nebit kangok go kalik ngga nan Negeb no rulu go, ngga duen sikso weng go, kukenan piam go sik sogo. 2 sedi nemu ide ey go genam nogo gabe taling : sedue wamoy mlue ey go tasam ngga nemot mea semu dali, ngga wom sedue nemotnan wom so mea semu, jua-a Elam e.. Maday mot lo Wop tui-a! nemot lo segi somu go genam lo mea tong. 3 Yangga tang so, genam go kuom iseng naklay so mo tra, iseng kalong lo genam mo melak,iseng ngge kabung duo tui go kalik so gabe tetra, genam engkabui kut go ngga tang so tup genang sogo yakua. bubuong king go sogo ngga tang so genam yakua yalap. 4 Genam bubong ey king go tang so ikum genang sogo genam yakua suali lo genam yamso kebet go, banim genam wadi so duduing go no nggeasui go genam suali-a tra go. 5 Ten ta sipnang mo tui, sruon nang mo sey go, ten dam go bu droup-a! ngga no kebali semu genang sogo deguo gemang tup; Ey Pleseduenang ip-a! Motnang go taming se mlaksing! 6 Ngge Ki Wali Iram lo genam no pu go: Klong-a! sedue nemu tetong genang sib se taling, nggano nemot lo se pen; sogo kalik go nemot lo mo ikum. 7 Ngga ey nemot lo ikum go : Ple kreta, kuda no klak go namon duo-namon duo so se, Keleday blo sogo sedue, ngga no Unta blo sogo sedue, nemot no pu go ngga ey seni-seni so nemu se bubung! 8 ngga ey nemu totong sedue lo gemang usi: Aya dem, ngga yab nemu yalap genang sogo, genam wabeduong go senang so mea ip, ngga no yap yay genam senang so wadi walong mea suing. 9 Ikum-a! Kleta ey go sedue-sedue mo weng, kuda blo sogo namon duo-namon duo so ngga ey gemang pu: Mo kenong! Babel mo kenong! nemot go sana-sananang nan blono yam so mo kurluk-lak! 10 O.. genam go nan naklay yam so mo idiok, sib idioknang sogo no, Ki Wali Iram Israel go Woy Iram sik so tup go motnang nogo at logo mo pen gemang. 11 Duma nogo Wali nebut, At nogo Sedue meno Seir sik sogo lo nebut gabe pen: E.. yay so suing go sedue wadi nesib ngge sogo kalik so?E.. yay so suing go sedue .. wadi nesib ngge sogo kalik so? 12 Nggano yay suing sedue lo gemang pu: wadikua weng go ngga kalik dali wadi weng go, no mot lo usi sogo se usi, tandali ngge nogo se weng! 13 Arab nogo wali nebut : Jasir Arab tegan diding ba logo motnang mea srek!e. Saula-saula Dedan sik sogo. 14 E.. nan Tema sikabung, nemotnang bu nu tra gono bu se iti! E.. nan Tema sikabung nemotnang nogo amble muk ey se iti go weng. 15 Tengangple sik sogo nemotnang mo kap, ngga tengang ple kalong eygo, ngga ey ple lekuk go, ngga no ple pung go sik so. 16 Ki wali Iram logo genam nogo ngge kalik gabe pu: Yagui klaya ba nogo ngga no yagui-yaagui seguot duoy sikabung lo iti go kalik so, nggano kedar go blong naklay mea yam. 17 Ple so tuk go-a mang itak yangga Don ey suing go sedue-a mlena walasrang Kedar sik so naklay nangglik dato so mea itak, Ngga Ki Wali Iram lo mo pen go tang so.