¹ Nou atouna, aku anguwua anawinigimu napa langa papahigilungu, nama langa kollinya na pamaikangu na surgawi kami habuatuya na wihi limana hi moiri jaka na ratu bakul napa langa o'ada jiaya hi Yesus. ² Nama manudu ta hagana nama pamaddunya, toungu pata hawaina hi Musa. Nama manudu ta rongu umana. ³ Kadang pawaiya ana kollinya nama pabuatuya walingu lahi Musa mearanguna nama eluya apakiddikaka uma rehi buatuya walingu na uma napapadedina. ⁴ Kadang duka uma dapapakiddina nama pakiddiya, jidinguka nama pakiddiya dukana na uma jiaya hi Allah. ⁵ Hi Musa namanudu ta umana hi Allah, ana pali wihi limanya hi Moiri, ana patekanya aganananya na patikina ta ladu muri. ⁶ Jidinguka hi Kristus ana manudu, nama hamanu jaka nama parehaya na ummana jiayaka iata na pali ummana, ata toma kaka tadikina ata hamannu dua ka bapakanyaka limma na lara waidanya lappaka na lara manninguda napa habuatuda. ⁷ Atouna keriya napa winang hi hangahuharri, ya taladu hinna amirangu kayaka naligu, ⁸ Abumu pakawatu ati wikimi mearanguna ata dalu kirritumu ta rahi pakamang ta mareda ginang ⁹ Einya, na appu bokumu ada kamaga waingu patada manga da itaha ngala dukada daha wolugu ta dalu patum bulu doung. ¹⁰ Jiaya hiku banija da huhu ana, hiwigu " jalur ati juadanya lappaka dada hilu peamangu ngarangi napa kabu atigu." ¹¹ Yayi, toma kuparungu tadalu banigu " dada tomamanya na padoungu pingi pahangahugu." ¹² Mi maromat ki ngu aku anguwua-anawinigimmi, ka abi eingu waling tapaduami hatou tekka nama pa ati jurrak jaka dama hiluwainya hi Allah na pingi morik. ¹³ Jidinguka kami peaka-panunga wikimi hatou-hatou wehang-wehang, toma einyaha na laddu ya ka abi einya waling ta pa duami pakawatu ati wikina ana pajalurumi tama doku jala. ¹⁴ Witi takoling taguda tadalu Kristus, nou nammu kamu hamanu dua ka bapanya kamu pajuka palawiwanya na kulihuna na ati maninguda waling taka wungana lappaka hupu dukana. ¹⁵ Toungu namawinna, " Ya taladdu hinna ami rangu kayaka naligu, abumu pakawatudingu atimu toungu tadalu amu manyogar. ¹⁶ gearakahaka na tou dama langa ranguya na lina hi Allah, manga dakatadak? Dajiakadiha dama louhung walingu ta Mesir ta wawa paparehana hi Musa? ¹⁷ Lappaka gearaya napa banina hi Allah tadalu patum bulu douna madeina? Dajiakadiha duda dama woluya nama doku jala lappaku nakamatida dama weiwarung tama reda ginang. ¹⁸ Lappaku gearaya napa paruna, toma dadatomaya napadoungu pingi pahangahuna, dajiakahaka duda dama manodu?. ¹⁹ Tou nou naka ata ittaya hou duda dada piakmangu ada toma, witinanya adada wainya.