¹ Karawa pangalanya napa buhang wikimi ami pa oali beimu. ² Namuya kamu woaya padoungu ta ummamu a' eingukangu kulamu ma waling tama marou, kadang ami buhakanyaka nama toungu mearanguna ami pa'a pa inu ja da malaikat - malaikat nou jiaya dapa peawaida. ³ Kami namuya na tou nama ta gallu ya mearanguna nyimi ta gallu jellami, namu jellaya na tou papagaring witina jimi eijellangu ihimi. ⁴ Napala'a - araweingu pahabuatu tekkaya ngala dukana na tou rara. Jaka karawaya na pingami kana kahanging. Kadang hi Allah na hukunya na tou nama jurrak jaka namalangu la oalina anang arawei oalina. ⁵ Pegenang wikimi waingu agananya toara nama eingumi, kadang winna ana tikkiya : " Nyouwa daku temmamagu, jaka daku wedalmagu". ⁶ Touna na manning da atida ata wainya : " Hi Moiri jiaya nama tulu gataga, daku hilu mangeatmaha. Ganaikanyaka naha woludaga da tou rara?". ⁷ Namukiha da tou dama bei gimi, duda nama langa patoma giminya na winnina hi Allah. Kami patetinya kami keriya na pata morikuda, jaka kami pali katutunya na pata manninguda. ⁸ Yesus Kristus enga taguna, madduka, hina ladu, jaka lappaka piangu - piangu. ⁹ Abi mi jalur dengakanya a' eikanguka parangumi nama mattu-mattuna dapa kali rangu mi, kadang na winni nama padening jiaya nama hamaddu giminya na atimi jaka na kanyuru-kanaga da jiamaya na pata angu mattu-mattu dama eingu gauna lahi duda dama pahalakuya ¹⁰ Jiata einya na beirapuda nou ya ngala na tou nama tagu habaring ta korung biaha, dada amangu aganananya. ¹¹ Manga ngala na ihina na bada, jiaya na wei ra na napatama idida da ratu bakul ta korung nama biaha hi jiaya napa manuatu waingu a' pohi waingu doku-jala, patunu ya tahabalihidi. ¹² Jiaya hi Yesus hina hoingi ya nama willa ta habali bina paraingu, ana pohi-poddahuha da huhu ana waingu wei ra taguna. ¹³ Nou atouna , maidaya kata parega denganya hi Yesus ta habalihidi, jaka kata deitu tidu dengananya nama manyarik napa langa padeitudanya. ¹⁴ Kadang, ta pinnu tana ya daeimang padoungu ma maddung ata dou pangalang toma piangu-piangu, jidika nadidanya na padoungu nama aming. ¹⁵ Nou atouna, lahi Kristus maidaya kata pangalang ata wuatu halinanya na ngarana lahi Allah, kata tikki wainya a'a' da jaka rowida ata pamalanguya na ngarana. ¹⁶ Abi mudengakanya amu woluya nama kalung, jaka mu namamu ya kamu woanya na oalimu aganananya nama eingumu. Jiaya na pata matoungu napa egi ati dengana hi Allah. ¹⁷ Kami manudu ta hagada dama parehami jaka mi karadaja, kadang jiaha dama maromat giminya na lara morikumi ma alanga jiaha nama padeitu tidungu atou naka duda dapa halaku wainya egi ati, dada waiamang kangoruk kadang na matoungu da eimangu pakoliwaimu. ¹⁸ Kami habayang pangala gama kadang ma manninya ama wainya na kalaki atina nama kalung. ¹⁹ Ku kareimi kami habayang pareihi patetekang kana piaku waingu nyouwa aha baliga lahi jimi. ²⁰ Ya atouna, hi Allah na pingi wei maringu, wei malala, nama pakidi baliya hi Yesus, na Moirida, jiaya nama pajawa dapa hangawi ta pinnu bebudanguna, waingu wei ra paparahiwaingu nama lodung. ²¹ Ana kaya kana pagennakungu ngala agananya nama kalung amu pahalakuya napa kabu atina. Jaka nama kerang tadalu morik kuda jiaya napa egi ati dengana lahi Kristus Yesus jiaya napa wuatu hailangu lappakunga piangu-piangu. ²² Aku oali bei bollugimi, ku panamugimi kami rangu aku peka gimi waingu pangadang kadang na li hapekangu gu ku patoma giminya waingu geha. ²³ Eingu kabu atigu aku tikki giminya ya na oali beida, hi Timotius, na louhunguka walingu ta gallu. Jaka a' ai lolu omi kanyaka tahaga gu, jiaya hi ammi maraigama aku parega dengagimi. ²⁴ Patomakinya na li panamuma ta tou pa langa papahigil da oali bei da waling ta Italia napatoma gimi li panamu lahi jimi. ²⁵ Na kanyuru-kanaga nama waling lahi Allah kana kodungidimi jaka kana dutu dattumi jimi ngala dukami.