Yesu na mengampuni mono na palengana ata a kabeko ¹ Pirra loddo murrina, na Yesu bana bali nee Kapernaum, da rengewe ba wa'i-Ni nee umma. ² Bage, mangieda ata a pakassana dukki ba da'i padou, lakka nee bali binna, mono Ngia na tekkiwe li'i-Na Marobba Allah barrada yidda. ³ Bage, yidda da mai barra-Na, da ngiddiya na iyya ata a kabeko pa deitoda pata ata. ⁴ Ba dada bisa bada ngiddiya na ata barrana Yesu oronage bana mangiedayi ata, da wukkewe ne ponnu umma nee todduna Yesu. Ne bada ba wukkewe, da paburruge ne padou beika padouna na ata bana beika. ⁵ Na Yesu bana ietadage ate waida, Ngia linna barrana na ata kabeko, 'To ana-Gu, yidda sala mu Ku uopi bayi'. ⁶ Takka, yidda ahli Taurat a madi'i neeya da pangeddage ne ate danada, ⁷ 'Appa na Ata maka linna wa'i bana tekkiwe? Ngia pa ullanage! Garra a uopiyi sala ba da ngiakona Allah dou?' ⁸ Yesu na paddege walina Roh dana-Na ne yidda bada pangeddage a linnana nee ate danada. Linnadi barrada, 'Appa maka mu pangeddage a linna wa'ina nee ate danamu? ⁹ Giege a louka mudah, liddani na ata kabeko, 'Ku uopi gudi salamu', atau liddani, 'Kedde, keketawe kasurmu mono kakowu?' ¹⁰ Takka, paddege na Ana Ata mangu kuasa-Na ne ponnu tana bana uopiyi doku denga'. Linna Yesu barrana na ata kabeko, ¹¹ 'Luggu-Gu barramu : Kedde, keketawe kasurmu, mono baliwu ummamu'. ¹² Na ata kabeko na dede, na dekewe kasurna, mono na kako bali gounga, aroda ngara dukkada ata. Yidda ngara dukkada da takjub mono sa deikaya Allah, mono lidda, 'Yamme dama ietapowe ne a linnana!' Lewi na diekuni Yesu. ¹³ Yesu na kako kia nee uppo loko, mono ngara dukkada ata da pabuoduna bada mai barra-Na, mono Ngia na bowodi. ¹⁴ Ne bada lewat, Na ietaya Lewi, anana Alfeus, neni a madi'i nee padou bayara welli katuowa. Bage, linna Yesu barrana, 'Diekuga Yauwa'. Bage, Lewi na dede mono na dieku-Ni. ¹⁵ Mono, ba neni Yesu a madi'i bana nga'a nee ummana na ata Lewi, mangiedayi ata a pakassana welli katuowa mono yidda ata a sala a nga'a denga allani Yesu mono murita-Na, oronage neeya mangieda ata, mono yidda da diekuni Yesu. ¹⁶ Yidda pirra ahli Taurat a walina kelompok Farisi da ietaya Yesu ba neni a nga'a dengadi yidda ata sala mono ata a pakassana welli katuowa, yidda da tuayi murita-Na, 'Appa maka na nga'a dengawadi yidda ata a pakassana welli katuowa mono ata a sala?' ¹⁷ Na Yesu bana rengewe, Ngia linnadi barrada yidda, 'Yidda a sehat dada waimana dotera, takka a kadawuka. Yauwa Ku mai da paouma guge ata a bia, takka yidda ata a sala'. Patuada tubana berpuasa. ¹⁸ Muritana Yohanes mono yidda ata Farisi neni a berpuasa. Yidda pirra ata da mai mono da tua-Ya, 'Yidda muritana Yohanes mono muritada ata Farisi appa maka da puasawa, takka murita-Mu You dada puasaki?' ¹⁹ Bage, linna Yesu barrada, 'Yidda ata a diekuni pengantin da bisa bada berpuasa sementara pengantin kabani neponi barrada? Selama na pengantin kabani ba neponi barrada, yidda dada bisama bada puasa. ²⁰ Takka, wa'ige ne loddo na pengantin kabani bada dekeya walina barrada, mono ne loddo ngiadowe bada puasa. ²¹ Da'ima ata a kadabbarawe kalabbe miema a mairra waige kaba a bo'u pona. Ba linna kowe, ne pa kadabbara pawai kaba a bo'una na irrawe kalabbe a miemana, mono ne a mairra na taba kaladage. ²² Mono, da'ima ata a burriwe anggura a bo'u pona nee kantong kalita dana a miemana. Ba linna kowe, ne anggura na irrawe ne kantong kalita bage lakka ne anggura mono kantong na na rusakawe. Balinage, anggura a bo'una da boddalawe nee kantong kalita dana a bo'una'. Yesu ngiadona Muori tubana Loddo Sabat. ²³ Mono, ne iyya loddo Sabat, Yesu na liyi uoma kamagge, mono nee lara danana, yidda murita-Na da oppu wua kamagge. ²⁴ Bage, yidda ata Farisi lidda barra-Na, 'Ieta, appa yidda maka da rawiwage neya a langgar hukum loddo Sabat?' ²⁵ Bage, Ngia linnadi yidda, 'Dou pernahpo bou bacawe appa parawina Daud ne ngia mono ata a palolo dengani bada kurangu mono karieba? ²⁶ Pei wa'ida yidda bada tamage ne Ummana Allah ne masana Abyatar ba Imam kaladaya, mono da nga'a roti persembahan, a tubayi a nga'adi yidda imam po, mono da ya allayi yidda roti barrada ata a palolo dengadi?' ²⁷ Bage, Yesu linnadi yidda ata Farisi, 'Loddo Sabat da rawini tubana ata pi'a, da ata pi'a ki tubana loddo Sabat. ²⁸ Bage, Ana Ata ngiadona Muori, mono Ngia allana tubana loddo Sabat'.