¹ A tepo i aho, a nêndo Sabat, si Yesus mêbe a mbondoi i nggandum. Apa'an male'o, mangamuri'-Na kumêbit tangoan i nggandum bo kuman i aho. ² Mêlilah i aho kumua mangatow Parisi we Sia: " Pilahên, mangamuri'-Nu itumawei êsa'an a tahi'i ro'na a nêndo Sabat." ³ Sumata' sowat i Yesus be silatahula: "Awahi'i winaca i homotahula asia ê tinulid i Daud, a noras sia bo silatahula imahalas i sia male'o, ⁴ kelembisa sia nisumuang a mBale i Ningumêlêd bo kelembisa silatahula kuman i roti weasil ê tahi'i rona kenên, maulêng sisia suma silatahula i mahalas i sia, kacoali mangaimam? ⁵ Suma awahi'i homotahula i maca a kitab Torat, awahêm a nêndo-êndo Sabat, mangaimam mawalah i lala'ut i Sabat a mBale i Ningumêlêd, sumata' ahi'i mêsea? ⁶ Kumua Ahu wehow: Bia'i bana ê lebe a mBale i Ningumêlêd. ⁷ Sa ulit pangartian i homotahula pandung ia'i kukua: Ê papandugey-Ku awahêm kobêlêsan bo ahi'i powalad, tantu homotahula ahi'i mahu'kum i totumu' alahêm sea? ⁸ Apa'an Bata' i Totumu' awahêm Tuhan a mbao i nêndo Sabat." ⁹ Thaworus biboho, si Yesus sumuang a mbale pawaibadatan i latahula. ¹⁰ Biboho bana nêsa totumu' ê nimatem kamana weta'. Silatahula tumaan be Sia: "Awaro' na mawamaulêng i totumu' a nêndo Sabat?" Pandung i latahula awahêm saniboho do'na mehesea' be sia. ¹¹ Sumata' ihumua si Yesus we silatahula: "Sa wana nêsa'an be homotahula mahadomba êsa osa niaho ndomba ihatia' a mboso a nêndo sabat, awahi'i tiho'ona osa iluaian? ¹² Awahi'i totumu' lebe wako' mbaera nde ndomba? Apa'an wa'aho do'na tumawoi maulêng nêndo Sabat." ¹³ Osa kua i Yesus a totumu' wa'aho: "Iayomoai kamanu!" Osa iayonamoho, yana imobuligêm ni aho kamana, bo imemaulêngêm kele hamana walina. ¹⁴ Osa mêluai ni aho mangatow parisi osa mêkoaitan tanu lumimêd i Sia. ¹⁵ SUmata' si Yesus mahailah i panutu'un i latahula osa momorus biboho. Tado'o totumu' malalas si Yesus bo si Sia imawamaulêng i pahasa silatahula. ¹⁶ Si sia karêngan kêteh dumarang silatahula mapakua sa sisei Sia, ¹⁷ Saniboho malêkêwêm kukua ê mbehoyow i nabi Yesasa: ¹⁸ "Pilahên, wa'aho Nata-Hu ê mbesai-Hu ê behaley'-Ku, ê mbe-sia kanalu-Hu mêtêna'an; Si Ahu mêpa' i tutuh-Ku a mbao-Na bo si Sia mawaterewa' i lala'ut a mangabangsa. ¹⁹ Si sia ahi'i mêsaruan bo ahi' mawakeret bo ahi'i katanga'an i tow numu' -Na a mangaralan. ²⁰ Tambêlang ê lêku behalêkoi ahi'i iwawaêpas-Na, bo sumbu ê leho nêla'nga ahi'i iwawawate-Na, ahad Sia mawatung i aho lala'ut. ²¹ Bo be Siam mangabangsa mongea." ²² Osa we' angênai we si Yesus êsatow solo-solongan i setang. wa'aho totumu' buta wo bo'bo, osa si Yesus mawamaulêng i sia, ahad ni aho si wobo' mohoda-hodait bo mêliliah. ²³ Yana maerang ni aho pahasa tow tado'o, kuana: "Si sia êwa'i kuanoho Suru i Daud." ²⁴ Sata' a katanga'anoho ni aho i totumu' parisi, kumua silatahula: "karêngan i mBeelzebul, bowirang i setang, si Sia mahelei i setang." ²⁵ Sata' kailahan i Yesus pangutêhên i latahula osa kumua we silatahula :"Esa'an kota suma pamalean ê mêtêri-têri ahi'i sipapa humêtêr. ²⁶ Kele wa'ahohêm sa Tapatena' melei i Tapatena'; sisia hahi mêtêri-têri bo masaru i siamio'; awahelembisa kaholano'an doro'na humêtêr? ²⁷ Yana sa Ahu melei i setang teka imbahut i Beelzebul, teka imbahut i sei mangadengarenu melei i sia? Apa'an ni aho silatahulam ê mamoali gola'tungu. ²⁸ Ta' sumata' si Ahu melei i setang teka i nimbahut i Tutuh i Ningumêlêd, yana kulitana Kaholano'an i Ningumêlêd i mahim behow. ²⁹ Suma awahelembisa totumu' do'na sumuang a mbale i nêsatow morowont osa kumadet i nartana satahi dali'na sogotên ni aho tow morowot? pahasogotênamoho doro'nam sia dumampok iaho mbale. ³⁰ Sisei tahi'i iwakarua-Hu, lumawah sia i Ahu bo sisei tahi'i sumêsên iwakarua-Hu, sisia mapawaêtared. ³¹ Wa'aho kawalian kumua ahu wehow: Pahasa dosa wo tena' totumu' ka'apungan, sata' tena' be Tutuh Lênas ahi'i apungan. ³² Sa êsatow numu' asiamange sumaru i mBata' i Totumu', apungan sia, sumata' sa sia sumaru i Tutuh Lênas, ahi'i sia apungan, a mbao i toba ia'i ahi'i, bo a mbao i toba ê malengai hahi ahi'i. ³³ Sa sangatud pohong ihua i homotahula maulêng, yana maulêng kahi mbua'na; sa sangatud pohong ihua i homotahula ta'pia, yana ta'pia hahi mbua'na. apaa'an a mbua'na ni aho pohong kahalala'an. ³⁴ Ei komotahula i suru i nulah dumerehe', awahelembisa homotahula doro'na mênu asakumên i maulêng, saraimbo homotahulamio' ta'pia? Apa'an êmbenu' i mba'ba ihumaluad a nate. ³⁵ Totumu' maulêng mawalêmbo mangamulêng a pêwêndamana maulêng bo totumu' ta'pia mawalêmbo i mangata'pia a pêwêndamana ta'pia. ³⁶ Sata' kumua Ahu wehow: Pahasa hodait ahêm toro ê niênu i totumu' mulit sowatêna a nêndo wagohuta'an. ³⁷ Apa'an mi'it a kodai'nu sihow ulitan, bo mi'it kahi a kodai'nu sihow u'kumên." ³⁸ A tepo i aho mohodait tatahula toutêh Torat tow parisi be si Yesus: "Guru, kamitahula maibog mêilah êsa'an tanda' be How." ³⁹ Sata' sowa'-Na we silatahula: "Pekarênganan ê ta'pia wo ta'eman ia'i manutut êsa'an tanda'. sata be silatahula ahi'i hawean tanda' ahi'i walina i tanda' i nabi Yunus. ⁴⁰ Apa'an kale si Yunus imutun a suang i tian i nda' têlu ngando têlu ngawêngi, kelewa'ahohêm Bata' i Totumu' mutun kahi a tian i toba têlu ngando têlu ngawêngi. ⁴¹ A norasan i nggohuta'an mangatow i Ninewe maleng tumow karêngan i pêkarênganan wa'i bo mu'kum i sia hahi. Apa'an mangatow i Ninewe i aho imawêdis ahadêm nitumanga' i sasahai i Yunus, bo kaulitana ê mbia'i lebe we si Yunus! ⁴² A Norasan i nggohuta'an, wa'aho kalono' a Selatan maleng tumow karêngan i pêkarênganan wa'i osa sisia mu'kum i sia hahi. Apa'an nia'i kolano a tepoh i mbao i toba sa mahi tanu tumanga' i sononoi i Salomo, bo kaulitana ê mbia'i lebe we si Salomo." ⁴³ Sa tutuh ta'pia lumuai a totumu', mêlaur sia a mangatampa tolandus mangilah sondo'an. Sata' sia ahi'i mahaere iaho. ⁴⁴ Osa sia humua: Siahu maleng moho a mbale wa'aho mbepa'kumange. Yana moho sia bo koamatanam wa'aho mbale kosong, bêrêsi kinakasan bo luboi mululum. ⁴⁵ Osa sia lumuai momayat i pitu roh balina ê lebe ta'pia wesia bo silatahula sumuang bo mogutum biboho. Yana amaha'na gio iaho totumu' lebe ta'pia nde nggio a pahamunan. Kelewa'aho hahi ê mamoali a pêkarênganan ta'pia êwa'i." ⁴⁶ A noras si Yesus menunu'pe bo wa'aho tow tado'o, ninang-A wo mangawog-Nga tomotod a luar bo dumongan sumauw i Sia. ⁴⁷ Yana êsatow kumua we sia: "Pilahên, inang-U wo mangawog-Ngu a luar baparipi sumauw i How." ⁴⁸ Sata' sowat i Yesus a totumu' ê wa'aho nimahi humua iaho we Sia: "Sisey ninay-Ku? Bo sisey mangawog-Ku?" ⁴⁹ Osa kua-Na, karêngan tumuru' i mangamuri'-Na: "Wa'i ninay-Ku bo mangawog-Ku! ⁵⁰ Apa'an siseiange ê tumulid i pandung i nAmay-Ku a sorga, sisiam mangawog-Ku tuama, sisiam mangawog-Ku wene, sisiam ninay-Ku."