¹ Pahasa sidong wa’aho itumod osa mêang si Yesus suma’ang Pilatus. ² Biboho silatahula molai matudu Sia, kuana : “Kinoamatan ihamitahula awahem totumu wai i mawaurêng tow ihamitahula, bo irumarang mawaêr belasting besi Kaisar, bo asakum mbatangaNa, behuaNa awahem Sia Kristus waaho Daja”. ³ Pilatus mata’an beSia : “Totu’u how daja i tow Yahudi? Sowatem i Yesus: keleikua’nu. ⁴ Kua Pilatus a mangaimam kapala bo pahasa tow waaho: ahii ahu ihumita sêa, asia atotumu wai. ⁵ Sumata kinetêhanemio ilatahula : teka itoturuNa Sia matusuk pahasa tow i Yudea, angGalilea ahad biai. ⁶ Anoras Pilatus tumanga waaho sia tuma’an awasia totumu wa’aho satoro Galilea. ⁷ Oras kailahana awahem si Yesus sa’tow anderetan Herodes, ihirim’na si Yesus suma’ang Herodes, a têpo wa’aho kahi a Yerusalem. ⁸ Anoras Herodes imilah si Yesus, imekahi’io sia ndê eto’om Sia mabof imilah si Yesus, karêngan leteh sia matanga a sakum i Sia, ndê hahi sia maharaw mamilah kêlêmbisa Yesus mawatulid esa tanda. ⁹ Sia sumaru tado’o pataanan besi Yesus, sumata si Yesus ahii sumowat wasi-wasia. ¹⁰ Karepet wa’aho mangaimam kapala bo mangautehan Torat mamuna-muna manepa mangatudu’an tanêd be Sia. ¹¹ Osa Herodes bo sururahom, ma’oro, manêro-nêro Sia, bo mawawakê juba’ kabasaran be Sia, osa Sia bewalêng bêsi Pilatus. ¹² Bo anoras waaho hahi imakaruruan Herodes bo Pilatus, atalêwe silatahula mekawatê. ¹³ Osa Pilatus manesen mangahapala imam bo rayat, ¹⁴ sa mohodait besilatahula homotahula i mêangai totumu wai bêahu, kelê esatow mapawa’urêng i rayat. Belahem homotahula mio awahem ahu i mirisami-Sia, awahem manga sêa betudu homotahula bê Sia ahem ê bê’êrêhu bê sia. ¹⁵ Bo si Herodes kahi ahem, waaho kawalian sia maleng behirim bê hamitahula. katotu’una alahem mangesêa e tinulidNa ê niwalas teka u’kumen matê. ¹⁶ Yana pamêlenku Sia, osa pahialengan Sia. ¹⁷ Ndê Sia mulit mawaluai esatow tanu silatahula anendo wako wa’ako. ¹⁸ Sumata silatahula medoro’ro tumorêwa “limeden Sia, iluai si Barabas tanu hamitahula” ¹⁹ Barabas bêsuang a torunggu apa’an bana e nipaangus imamoali asuang kota bo apa’an bana pinamatê. ²⁰ Pilatus maibog mawawaleng si Yesus, nde wa’aho sia mebalêng mohodait atotumu tado’o wa’aho. ²¹ Sumata silatahula tumêrêwa “salipên Sia, salipên Sia! ²² Kua i Pilatus a kateluna besilatahula : Katapia’an awa wê tinotu’una tinulid totumu i’ai ? Ahem esamange sêa ekinaêrêan be Sia, ê malas teka ukuman mate. Yanasa ahu hahi mamakur i Si, osa ilepot Sia. ²³ Sumata teka tumerewa silatahula melese bo manuntu ibohom Sia salipen, bo ahadna silatahula mautung teka têrêwa ilatahula. ²⁴ Osa si Pilatus tumepu, iboho tinuntut ilatahula bêwongê’e. ²⁵ Bo Sia mahialêng totumu e bêsuang asuang i torunggu ndê pinekurêan bo pinamatêan, sumata si Yesus bêake bêsi latahula tanu tuliden a kahabogna. ²⁶ Atêpo iboho silatahula mali Yesus, silatahula tumahang esatow mahangalan Simon a Kirêne, lusu’pêmai aluar kota, osa iawa’waluha salip wa’aho ambao paluhana, ibohom lihudenna karengan mahalas si Yesus. ²⁷ Kêlê katadoo’onio totumu mahalas bêSia. Amepanga tado’o wênê mapongiso, mapekaê iSia. ²⁸ Yesus isumêlêng bêsilatahula sa mohodait : “Hêi manga manglaun Yerusalem, na’am komotahula mekaê i Ahu, sumata mekaê imbatangan-nu mio bo mangabata’nu. ²⁹ Nde, pilahen, mahasa hahi hoamat tow kumua : sononoi’o bênê pesel bo balê imbolotna ahimahasa mahawata, bo susuna ahii mahasa sinusu. ³⁰ Osa mahi molai mapakua a mangadungusan ihawio tumulung ihamitahula! Bo ambêtêlên tuahanem hamitahula! ³¹ Nde sa’ a kayu menonowe, tinulidêm i totumu kele wa’i, ndawasia tuliden ilatahula a kayu i mawelam. ³² Bo bana hahi dua balina totumu tapia tanu ukumen mate, be haharua bo si Yesus. ³³ Atepo’waaho sialtahula bêhoamat atampa bêwengalan Tengkorak, silatahula sumalip si Yesus biboho, bo hahi rua tow tapia, esatow ambêta kanoal-A bo walina ambêta i kolodiNa. ³⁴ Yesus ihumua : ‘Ya Amang apunganai silatahula, ndê sialtahula ahi’i mahailah asia e tinulid ilatahula. “bo silatahula tumia Lot tanu pebêtêngan i nimbitNa. ³⁵ Tado’o tutumu i tumod biboho bo pahasa imelilah. Mangamakolano masêro’ i Sia, kuana : “tow’walina iwawalowidNa, lingonoho inia Sia mawalowid i mbatangaNa mio, sa’ sia totu’u Mesias, totumu e sinisir i Ningumêlêd. ³⁶ Mangaperajurit wê monêro-nêro i Sia silatahula i mayo inanggor mangilu bê Sia. ³⁷ Bo kumua : “Sa’ How totu’u daja itow Yahudi, iawalowid e batangaNu! ³⁸ Bana hahi bêwatih amabo i kohongNga : “waimio daja i tow Yahudi. ³⁹ a’tow tapia bêtambêng wa’aho i mojat i Sia, kuana : “boahi’i How si Kristus! Iwawalowid batangaNu bo hamitahula! ⁴⁰ Sumata e nesatow i merow sia, kuana : “na’kure how maatalowe a Ningumeled samantara how imahaêrê ukuman e mekêle. ⁴¹ Hita memang pantas ukumen ndê hita itumirima balasan bewekêlê teka tinulid i hita, sumata totumu wai ahi’i itumulid awasia mange e sêa. ⁴² Osa sia ihumua : “Yesus imunenangê ahu, osa how mahi kêlê daja. ⁴³ Kua Yesus bêsia : “Si ahu ihumua bê how, ulitna, endo inia kahi how makarua teka si Ahu asuang Firdaus. ⁴⁴ Atepo inia manê-onah oras sanga wuluborua samêdên dêm sumawut pahasa doong ioho aha’d noras telu, ⁴⁵ de endo ahii kumêraw, bo pampêle bait bayo bêhawarua. ⁴⁶ Sa si Yesus sumaha’d kareua enu moari” ya amang asuang ikamaNu bêtarohum kanaluHu” bo hore kumua kêlêyai sia tumarom kanaluNa. ⁴⁷ Atepo pawahalasan palulutan milah asia nyaho imamoali, Sia mapêloot Ningumêlêd kuaNa totuu, iai awahêm totumu maulêng. ⁴⁸ Bo onah pahasa totumu tadoo, imahi mêdudu iboho tanu paponarahên, mila’h asia imamoali ioho, mangaleng komotahula osa memel ibatang. ⁴⁹ Oahasa totumu imahailala si Yesus a susut, akêlê manga wênê amalalos Sia agalitêa tumo’d andekang ngio bo milah pahasa ioho. ⁵⁰ ana totumu ngalana Yusuf. Sia tow majelis besar bo esa totumu mauleng hahi totuu. ⁵¹ Sia hii sêtuju aputusan bo itatawoi majêlis ioho sia dali Arimatêa, esa kota Yahudi bo sia manondo-nondo kerajaan Ningumêlêd. ⁵² Sia imoho sumaang si Pilatus bo mengêlêi imbangkê i Yesus. ⁵³ Bo atepo sia lumolas imbangkê ioho sia sinawutna indoho lênên, sa bêlêtêna asuang i kubur akinoko asuang indungusan imbatu, atalewe perna binêlêtan imbangke. ⁵⁴ Endo iai awahêm endo pasadian bo sabat toyotaan molai. ⁵⁵ Bo manga wênê imahi medoro-roro ka’si Yesus angGalilea, lumas aho bo komotahula melilah i kubur ioho bo kêlêmbisa bangkêna ambinêlêtan. ⁵⁶ Bo imalêng silatahula sumadia rempa-rempa bo solo mur.