¹ Yesus sumuang a kota Yerikho bo lumapang menerunerus lumeot a kota. ² Biboho bana esa tow ngalana Zakheus, pahalasan tapasa’aw i mbelastin, bo sia tow siha. ³ Sia dumameji milah sa totu’u si Yesus, ahi’i hem belilanga nde tado’o totumu, nde batangana lopēng. ⁴ Osa sia malolah mamuna a tado’o totumu, osa sia kumapet a kayu ara nde milah si Yesus, lumēot biboho. ⁵ Ihoamatoho si Yesus a’tampa wiboho, pilahe-Na moho ambao behuana: “Zakheus, tiroan lumolos, endoinia Aku (Yesus) mawit a mbalenu. ⁶ Zakheus tilahom ilumolos nde sia tumirima si Yesus karua i kahi. ⁷ Sumata’ tado’o tutumu i milah osa suusuutenangē, kuanilatahula : si-sia (Yesus) i mawit a mbalē tow mawuliwuling i sēa. ⁸ Si Zakheus tilahom itumod kuana be si Tuhan i “Tuhan, iwarua a mbetê ku i ēhēhu a manga tow lengēy bo’ pineras sa bana benjohumai besilatahula male’ku iwaleng mahapat kinowi. ⁹ Behua i Yesus besia: “lai talēwē mamoali kalowidan a mbalē iai, apa apaan tow iai bata’ i Abraham. ¹⁰ Apa’an bata’ i Ngêlêd tow i mahi mangalah bo mawalosid imbēhatala. ¹¹ Maindo silatahula imahata’an i sia biboho, Yesus tumerus i kodaitNa a nesa pangandēan, nde sia susutem a Yerusalem bo kuanilatahula, awahem Kerajaan Allah tilahonem kaeilahan. ¹² Awahem behuaNa : Bana esa tow bako imatang a’nesa doong dēkang tanu’ di nobatkan mamoali daja biboho, asakumeniaho imebalengoai. ¹³ Osa sia mamang sangawulu tow nata’ sa bēana sangawulu mina bēsilatahula, kuana : Pakēnangē madagang ahad ahu malēngoai. ¹⁴ Sumata manga tow sebangsanya mare’e i sia, osa silatahula ihumirim sosiu lumas isia osa kumua : kamitahula ahi’i mabog sia mamoali daja bēhamitahula. ¹⁵ Bo imamoali, anoras sia imalēngemai, asakum sia dinobatkan mamoali daja, bēwasiuna maniang manga sosiuna, pinamēan doit, osa pongitauna tahula kautungan i latahula. ¹⁶ Tow pahamunan imoai ihumua : Tuang, mina i tuang esa banam kautungan sangawulu mina. ¹⁷ Bēhuana bēsia : maulengio tatawoinu, hai natana’ maulengio kau nde makiit a’ perkara kiding, kalianemoho tirimanange kawasa a sangawulu mina. ¹⁸ Mangahi kadua behuana : Tuang, mina ituang banan kautungan lima mina. ¹⁹ Kuana bēsia : kawasanu lima kota. ²⁰ Sosiu kateluna emoai osa bēhuana: Tuang, wai mina ituang, bepa’ku mangē a suangi leso. ²¹ Awahemahu matalo si tuang, apa-apa’an situang tow keteh’ : tuang minjo asia ahi’i bēpa’ ituang osasituang maniwa asia ahi’i bewamarut i tuang. ²² Kuana a tow i aho’ : Hei nata ta’pia, hakimeku how asia niaho kodaitnu. Nde kalahanumahu totumu ketēh, osa minjo asia ahi’i bepa’ku bo maniwu ahi’i bewamarutku. ²³ Sahēlē aho, ndēaho doitku ahi’i bēhēnu a tow mawalapang i ndoit ? Sahu malēngem moai do’nam injoku rēntēna. ²⁴ Osa bēhuana a manga tow tumotod i boho : injonoho niaho mina esa bēsia osa iyēhē a tow sangawulu mina. ²⁵ Bēhua ilatahula bēsia : Tuang si sia imahērēm sangawulu mina. ²⁶ Sinowatna : ihua-Hu bēhootahula : sisēi tow imahaerem, sisia malēng bēan, sumata’ sisēi alahemoho, awahem besia maleng injom, kēlēaboho asia mbēsia. ²⁷ Sumata pahasa kasaruhu, ahi’i mabog ahu mamoali dajana, peangenoai silatahula biai’ osa patēn si latahula a sasa’angen imbeleku. ²⁸ Bo aha’dem bēhuana pahasa iaho Yesus mamunam bēsilatahula ndē lumawus moho a Yerusalem. ²⁹ Anoras sia susutem a Betfage bo Betania, a ndungusan ngalana Bukit Zaitu, Yeus masiu dua tow atahNa. ³⁰ Bo bēhoyowna : “moho kamotahula a ndo’ong a’ sasaangenu : A noras kamotahula sumuang biboho, kamotahula mahaērē esa keledai (kawayo) mudawē bakewakesem, awi mahasa sinakēan itow. ³¹ Sawana tou tumaan bēhow : Ndē aho ilepot i homotahula ? Sowaten kēlēwai : Tuhan. ³² Imangohom silatahula ahombēwasiu, asianiaho behua besilatahula kelenio waho behua i Yesus. ³³ Asakum silatahula lumepotiaho keledai, kuandeiaho mahasawa kêlêdai : Ndeaho ilepot ihamotahula niaho keledai ? ³⁴ Bēhua ilatahula : Pakēn i Tuhan ndē perlu. ³⁵ Osa pēangenoho ilatahula Kedonga i kêlêdai besi Yesus, osa bēalasan manga latang ilatahula, osa tinaka si Yesus ihapēt ambao i keledai. ³⁶ A samantara Yesus sumake-sakē a kêlêdai manga tow biboho mangalas latang ilatahula a ndalan. ³⁷ Asakumen sia (Yesus) susutem a’ Yerusalem, a ndalan lumolos a Bukit Zaitun, pahasa tow bo atahNa mahalas bēsia (Yesus) mekahi hahi osa maroyow Ningumeled bo enu’ moanid apa-apaan pahasa mujisat belahem ilatahula. ³⁸ Bua ilatahula : “Paberkatinange Sia i moai keleitu Raja a ngalan i Tuhan, mosononoi enow a Sorga bo lo’or a tampa a matatang”. ³⁹ Mangawana tow Farisi mahalas a tow tado’o behuana besi Yesus : “Guru nu’anoho’ manga atahNu”. ⁴⁰ SowateNa : ihuaHu behow : sasilatahula metew, pahasa batu i ai mawasawang”. ⁴¹ Anoras si Yesus mahasusutem bo pilahena kota iaho, bewate-Na, ⁴² Wai, totuu ndom saiai talēwe si how mangarti asia niaho enow mosononoi. Sumata iai talēwē’ i rururu ambelenu. ⁴³ Apa-apaan a nendo ahiana manga kasarunu kumeked ihow bo kubu, osa kinepunge kow bo kinuwite kow a pahasa kumelad. ⁴⁴ Bo iwawawotutusna how bo manga townu kēlēaho bo dinding bētonu, ahi wayay esa batu ihapa’io a mbatu balina nde hii halahunu osa sawa, Ningumeled moai milah i how. ⁴⁵ Si Yesus sumuang a mbait Ngeled tow osa polaiana mawasalat (mawaolah) pahasa mapajual biboho. ⁴⁶ BehuaNa a manga tow : “Bana bēwatih: Awahem balē-Hu balē pawasombayangan. Sumata tinulid i homotahulla dumun i tow tahoi”. ⁴⁷ A tēbēinendo sia mahajar a suang imbalē Ngeled tow. Imam-imam kepala bo bēutehan a torat bo manga tow pawahisingen a bangsa Israel maberusa mawawotutus i sia. ⁴⁸ Sumata ahi’i kalahan ilatahula, ndē pahasa towna mabog tumanga i sia.