¹ Enem ngando awe Paskah i Yesus mahi am Baitani a pahutunan i Lazarus binatunan i Yesus a tutu i tou i matem. ² Biboho tinulidan perjamuan tanu Sia bo si Martha sumelewir, bo esaan silatahula kuman bo si Yesus bo si Lazarus. ³ Osa maria minjo i warua solo Narwastu murni matatang baera, awahem sumola nae i Yesus osa sumawu ambatanganabo bow i solo semerbak apahasa bale ioho. ⁴ Sumata Yudas Iskariot esaan a murid-murid i Yesus boisumeiahkan i Sia. Kuana: ⁵ “Kuana nde aho solo Narwastu iai ahii guunen telu ngatus dinar bo doi’na i yehe a pasa totumu lengei?” ⁶ Wai behua ahii osa milah mangatow alahemretala kumata nde sia Niit tow tahow in doit be pa a suang ikas taka-taka ana. ⁷ Kuai i Yesus: “I wiaroho sia tumuli bo mimun in endo kinuburan Na. ⁸ Nde mangatou lengey bana behow, sumata Ahu ahii niit bana behomotahula.” ⁹ Katadooan bako tow Yahudi tumanga si Yesus bana bibong bo silatahula mahi ahi bati bawali i Yesus sumata mahi milah si Lasarus nde binatumon i Ningumeled a patutudan i tow imatem. ¹⁰ Imam-imam kepala makodaitan osa mate si Lazarus, ¹¹ nde kawaliana manga tow Yahudi mepa’io silatahula bo maeman be si Tialo. ¹² Sando handoan tado tow mahi tumuli pesta botumanga be si Yesus atutud indalan mogamat a Yerusalem, ¹³ paha ilatahu, manginjo tunana palem, osa moho sumupa i Sia, osa sumupah isia bo mongonangaran: “Hosana! Beanange hamang Sia mahi besi Tialo, Daja Israel!” ¹⁴ Yesus mahaere esa keledai muda, osa Sia sumake ambao na, kele bana be watih: ¹⁵ “Naaman matalo, e wulan i Sion, pilahem, Dajanu mahi dumatuh, ambao imbata i keledai.” ¹⁶ Pinolaian murid-murid i Tialo ahii mohoi tanu ioho sumata iboho Yesus be eluden, maimunange silatahula, iboho Kao tanu si Sia, bo silatahula hahi i tumuli tanu si Sia. ¹⁷ Tou tadoo me dederengan bo sia sa Sia tumiang si Lazarus lumai a lelembeng osa iwawatou Na, atutu i tow i matem, mehe bo mawatau asia tinuliNa. ¹⁸ O kawalian totumu tadoo imoho sumupah i Sia, nde silatahula tumanga, i Sia tumuli mahaerang ioho. ¹⁹ Osa ihua atotumu i Parisi anesa bo esa balina: “Kamotahula mio i milah hio ahem kinaerean pilahen pahasa tou ambai toba lumalas be Sia.” ²⁰ A sakum ilatahula i matang beribadah a nendo, paloopen bo manga tow Yunani. ²¹ Manga totumu ioho moho be si Filipus, bo a sakumi Betsaida a Galilea kumuai sia: “Tuang, mabo hamitahula metau be si Tialo.” ²² Filipus moho mawatau be si Andreas; Andreas bo Filipus kumai kahi besi Tialo. ²³ Sumata si Tialo Kuana besilatahula hewai: Teponam bata i totumu dayowen. ²⁴ Kumua Ahu be hamo tahula kelewai sa batuna i gandum ahii hatia ambao i toba ba mate, sia kelemange esawatu na. Sumata sa sia mate, tadoo buana kaelean. ²⁵ Sa si sei Sia mahales, imbatangana, sia kata laan im batangana ambai toba yai. Sia miaha ahad kaeto-eto. ²⁶ Sa si sei Sia sumelewir i Ahu, dona sia lumas be Ahu bo bisana mange Ahu, biboho kahi Ahu bana selewirai-Ku. Sasisei sumelewir i Ahu iormati i Namang. ²⁷ Wai hamalu minum asia ona i hua Hu? Injon noi Ahu yaitalewe? Ahii, nde Ahu mahi yai talewe. ²⁸ Amang, konungaan i ngalana-Nu!” osa kinatangaan kodait a sorga: “Ahu monunga be-Sia bo ahu monunga be Sia mange!” ²⁹ Tado tow lumotod biboho tumanga bo kuana, asia tanga i koruhu. Bana hahi kuana: “esa so siu Ningumeled kumai be Sia.” ³⁰ Kuai i Itialo enu: “TinangaNa ahi hawalia i Ahu, sumata hawali i homotahula.” ³¹ Yai talewe wolai wotutus bai toba bo manga: kawasaim baotoba i tepa aluar; ³² awahem Ahu, iatang hahi ambai kauhaan panginjoku pahasa tow lumas be Ahu. ³³ Wai be huana kelembisa kamoalian Sia mate. ³⁴ Kuai i pasa totumu ioho: “Tinangaam i hamitahula a kaol i Tourat, si Mesias menonow ahad kaeto-eto; kelembisa ona How kelewaho, sa sia Bata Amatatang? Besilatahula siseidom Bata i Totumu ioho? ³⁵ Kuan ni Yesus besilatahula: “Bati kemange hisit hahi sulo bana be homotahula. Sa sulo ioho bana bêhomotahula uli’tennange iboho osa karendeman ahii mimbahut i homotahula; sa sisei lumapang a karendeman, ahii halaha bisana nohoana. ³⁶ Uliten nanga a sulo iboho, sa sulo i boho bana behow, iboho hahi hamotahula moho.” si Tialo moho, rumuru a patutudan i latahula. ³⁷ Mandêwê si Yesus tumulid tadoo maêrang anamo im bêlên ilatahula, mande ahii kumuit akaulitan be-Sia, ³⁸ iboho malekewe kukuai behua i Yesaya: “Tuhan, be sisei ona tangaan i hita? Bo sisei ona tumaka i kama i Tuhan bo ituru kawasa-Na? ³⁹ Osaibou silatahula ahii maulid nde si Yesaya kumuai helewai: ⁴⁰ “Sia im mawa wata i mbelen bo maheteh oho nate ilatahula iboho silatahula ahii milah ibelen bo i pa asuang nate. Iboho hahi sumalihu mawawemauleng be silatahula”. ⁴¹ E wai behua i Yesaya, nde imilahem konungaana, bo kumua be si Sia. ⁴² Mande tadoo mapiwit mahaulit be-Sia, sumata hahi manga tow Farisi silatahula ahii kumai i matutul totuu , i boho silatahula ahii itia. ⁴³ Nde silatahula mabogange kaumbung itow ahii kaumbung i Ningumeled. ⁴⁴ Sumata kuai i Yesus: “Sa sisei maulit be-Ahu, sia ahii hahi maulit be-Ahu, sumata be Sia, suma Ngeled tow i masiu i Ahu; ⁴⁵ bo sa sisei i milah i Ahu, pilahena kahi Sia, i masiu i Ahu. ⁴⁶ Ahu imahim ambai toba kele i sulo, bo sa sisei tou maulit besia-Hu, ahii hapa andalem i karendeman. ⁴⁷ Bo sa esa tow tumanga behua-Hu, sumata ahii tinulidna, si Ahu ahii mainjo mahurus, nde Ahu mahi matepu ambaoitoba, sumata mawa watun kaseaan. ⁴⁸ Sa sisei tumulud i Ahu, ahii tumanga i kodai-Hu, nde Sia ahem matepu, e waaho kukuai be huaNa, waaho mainjo matepu a mahahad. ⁴⁹ I hua-Hu ahii bati batangaiku, sumata Amang, i masiu i aHu, bo humua asia nioho i huanu suma ihuaHu. ⁵⁰ Bo kalahaiku, asia mbe hua-Na mainjo penonowan amahahad. Asa asia nihuaHu, i hua Hu kelembisa behua i Namang-Ku.”