¹ Ihuahu behamotahula : Awahem sisei sia e sumuan a kurungan i domba satahii sumuang a mbonang, sumata kumapet atondoh, sisiah nioho totumu tahow bo tow tapengandet. ² Sumata sisei sia mebe ambonang, sisia nioho gembalai domba. ³ Tanu sisia buhaan imahiaha embonang bo mariga domba mahatan i suarana osa sia tumiang domba-dombana mangesa-ngesa melalasan i ngalana mapiwid sa lumuai. ⁴ Pahasa domba pineangam lumuai, sisia pahamanun lumapang silatahula bo domba-domba iboho malalas isia. Nde kahilalaana suarana. ⁵ Sumata esa tou tasikela hii iehe ilatahula lumas, sumata silatahula melolah, nde tou tasikela hii tangan ilatahula. ⁶ Waaho mbehua i Yesus a dandean besilatahula, sumata hii halahan ilatahula panduNga sa kuaNa kelewai besilatahula. ⁷ Osa melang ihua i Yesus : “IhuaHu behamotahula, awahem Siahu mbonang imanga dombai boho. ⁸ Pahasa tow imahi awe Ahu bana, awahem sia tahow bo tepangandet, bo domba-domba boho hii tumanga ilatahula. ⁹ Si Ahu mbonang, sisei sumuang mebe be Ahu maselamat sia bo sia sumuang lumuai boi wetauw atinia. ¹⁰ Tahow mahi bati tanu manahow mamate bati mawasilaka, mahi ahu saniboho silatahula mahaere hatowan, bo wana pahasa a katadooan. ¹¹ Si Ahu gembala mauleng behe nasenga tanu domba-dombana, ¹² sedang sia tou bati mapahiteteh hii sia gembala bo hii sia mahiaha domba-dombana mio, meilahoho i lahuw mahi tumiho bo mawawesipona i manga dombai boho. ¹³ Lumolah sia nde bati tow tapahi teteh bo hii mapikaya manga dombai boho. ¹⁴ Si Ahu gembala mauleng bo kahilalaiku domba-dombaHu, ¹⁵ kele si mutu-utu mahahilala i Ahu bo Ahu mahahilala Namang mutu-utu, bo Ahu i mehem inase’ku tanu domba-dombaHu. ¹⁶ Bana we mbeahu domba-domba walina, ahii a kurungan biai manga domba waaho pa kuhatei Ku nde silatahula matanga suraHu bo silatahula mainjo songowaanan bo esa gembala. ¹⁷ Mutu-utu Amang mahales i Ahu, iboho kawalian beheHu e nase’ngKu osa maleku tiriman. ¹⁸ Ahem e towesa minjo be Ahu suumata mehe i pandungKu mio. Si Ahu kawasa mehe bo maleng. Wai tawoyeiku aneemang mutu-utu Hu. ¹⁹ Sa silatahula mekahanjoan nih manga tou Yahudi : Apa-paan kodait ilatahula. ²⁰ sia sinuana i tutuh p imepadelaan : Ndeaho kamotahula tumanga i Sia ? ²¹ kumua : “Waaho hii kodait i tow sinuang i tutuh mawailah imbelen i manga tou buta. ²² Alakapui ihoamat i nendo walooren lumoor imBalei Ngeledtou a Yerusalem tepoi boho utin. ²³ Bo si Yesus mahebebe amBalei Ngeledtou, alohos iSalomo. ²⁴ Kinekedem moho Sia i tou Yahudi osa kumua be Sia : tepo suwawe kow lumingo i penonowan ihamitahula menonow akalikokoan ? Sa how si Mesias ihuam behamitahula. ²⁵ Kuan i Yesus besilatahula : “Behuahum behamotahula ta’hii ahu emanen. Tawoyen tinuli’Ku bati Ngalan i Namang’Ku mutu-utu waaho nisumairi tani si Ahu. ²⁶ Hii emanen ihamotahula, nde hamotahula ahii domba-dombaHu. ²⁷ Manga dombaHu mahataan suaraHu. Kahilalaan ilatahula salumas i Ahu. ²⁸ Osa Ahu mehe katowan telas be Silatahula osa silatahula binasa ahad kaeto-eto bo ahem etow kumanded a kamaHu. ²⁹ Nama’ku, e nimehe besilatahula bo be Ahu lebe wako apahasa bo ahem kumandet a kama NamangKu mutu-utu. ³⁰ Si Ahu bo mutu-utu Namangku waaho esa. ³¹ Belangen manga tow Yahudi minjo batu sa tumu isi si Yesus. ³² Kuan i Yesus besilatahula : Tadoo tawoyen a namaKu beturuku be how osa how manawi i Ahu? ³³ Sowaten i tow Yahudi : i manuwi hii satawoyen. Sumata isumero i Ngeledtou mande bati towesa mekele imbatanganNu bo Ngeledtou. ³⁴ Kuan i Yesus be silatahula : Awa hii bewatih a Kaol i Torat behua hum a kukua kamotahula tutuh setang ? ³⁵ Sa silatahula, bes sisei kukua iai kuaan allah osa kuai Kaol hoo matau tale’den. ³⁶ Kumuawe kow kelewaaho be Sia be leno i Namang mutu-utu be wasiuNa ambaoitoba; Awa be kow i sumero i Ngeledtou nde behuahu : si Ahu Bata i Ngeledtou. ³⁷ Sahi hii tumulid tawoyen i Nama’Ku, naam Ahu emanen, ³⁸ saniboho tulideiku satahii emanenu Ahu, emanen tawoyen saniboho kalahan awahem Namang mutu-utu be Ahu keleaho Ahu a Namaku. ³⁹ Binalengem ilatahula mepe tumiho si Yesus, ta’awe kinajoan ilatahula. ⁴⁰ Osa si Yesus moho ambeta i Yordan, a tampa i Yohanes pembaptis osa sumondo io biboho. ⁴¹ Osa tadoo totumu i mahi we Sia, sa kumua Yohanis hii tumulid tanda, sumata pahasa ulit totuu”. ⁴² Osa tadoo totumu biboho meman i Sia.