¹ Aketare Waaho kukua, Ku kuai boho i wakaru-haruai Ngeledtow. Bo Kukuai boho Ningumeled. ² Aketare Sia wakaru-haruai Ngeledtow. ³ Pahasa tinulidNa tanu si Sia. Sitahii si Sia alahem e mamoali a pahasa tinulid. ⁴ Penonowan be Sia bo penonowan sulo a totumu. ⁵ Suloi boho sumuloi karendeman. Karendeman iboho hii mahaelei. ⁶ Bana nesa tow be wasiumai i Ngeledtow, ngalana Yohanes; ⁷ mahi Sia mainjo sairi sumairi suloi boho, saniboho pahasa emanen i tow. ⁸ Ahii Sia suloi boho, sumata iwawasairina suloi boho. ⁹ Kaulitan suloi boho, isumuloi pahasa tow imahi ambaoitoba. ¹⁰ Awahem Sia ambaoitobam, bo baoitoba tinuli,Nam. Sumata baoitoba hii mahahilala i Sia. ¹¹ Mahi Sia ambeteng kapunyaaNa, sumata mangatotumuNa hii tumirima i Sia. ¹² Ta’ pahasa tow tumirima i Sia, binea Na kawasa saniboho mainjo manga ba’ta i Ngeledtow, waaho silatahula maheman i ngala’Na. ¹³ Manga totumu imbaoitoba ahii a kahabongen i keted sumadaha, hii hahi kahabongen imbatangan kahaeween i tuama, sumata a Ngeledtow samamoali. ¹⁴ Kukuai boho i mainjom totumu, osa metewio behita, bo belahem i hita konuangaa Na, waaho konungaan behebe Sia tanu Kedong Tulong mawuli-wuling imbeles kohoba bo kaalitan. ¹⁵ Si Yohanis i sumairi tanu si Sia sahuana: “Waisa Sia, panutuuiku embehuahu: Lumalas beahu mahi Sia i lumeotai be ahu. Nde Sia daliim bana, nde Sia banam atalewe ahu bana. ¹⁶ Nde pinuliNgam kitai pahasa i tumirima imbele’Na bo hohomba Na. ¹⁷ Nde hukum torat behei Musa, sumata beles kohombe bo kaulitan mahi be si Yesus Kristus. ¹⁸ Ahem totumu mahasa meilah i Ngeledtow, sumata Kedong Tulong i Ngeledtow a ndumatu-natuh a kaholanoan i Namang si Sia e mbewawaturu. ¹⁹ Waim aho mbe sairi i Yohanes a tepo silatahula masiu i tow Yahudi bo Yerusalem bo manga imam bo tow i Lewi besia sa tumaan: “Sisei ndo kow?” ²⁰ pangakui ku hii ahu motowo kuana: “Hii ahu si Mesias.” ²¹ Osa taanan ilatahula be sia: “Sa hele aho sisei ndo kow? Elia? Sowatena: “Ahii!” Sihow nabi malengai?” osa sowatena: “Ahii!” ²² Osa kuan ilatahula be sia: “Sa hele aho sisei ndo kow? Nde sowaten i hamitahula besilatahula i masiu i hamitahula. Awa kuanu tanu batanganu mio?” ²³ Sinowa’na: “Siahu aho totumu menunu metere-terewa a tinia: Londolen dalan i Ngeledtow kele mbenua nabi Yesaya. ²⁴ Nde a nesaan i tow be wasiu bana e manga tow i Farisi. ²⁵ Tumaan si latahula be Sia, kuana: “Nde aho how e mabaptis, sa tahii how si Mesias, hii si Elia, bo haii nabi a maleangai?” ²⁶ sowaten i Yohanes silatahula, kuana: “Baptiseiku silatahula i nahe, sumata a tu’tud, totu’dan i hamotahula si Sia e tahii hamilalaan i hamotahula, ²⁷ waaho Sia, e maleng mahi be ahu, muhai tali sapatu Na Awi ahu ro’na. ²⁸ Wai imamoali am Betani atetela i londolai Yordan, ambinaptisan i Yohanes. ²⁹ Mandomai pilahen nange si Yesus mahi we silatahula sa kuana: “Pilahen mbata i Ngeledtow e nimayoi sea imbaoitoba.” ³⁰ Si Sia aho panutuuiku sa kuaiku: Heleotoho weahu bana tow mahi, mamuna we ahu, nde Sia banam awe ahu. ³¹ Bo siahu pahamunan awe mahahilala i Sia, nde waaho ahu mahi maptis i nahe, saniboho Sia itura a Israel. ³² Osa i sairi i Yohanes, kuana: “Bela’kum monggongguot ilumolos a langit kele mombo sa matewio ambaoNa. ³³ Ahii kahilalaaiku Sia, Sumata si Sia e nimasiu iahu maptis i nahe, bo kukuana beahu: Sa how meilah monggongguot lumolos a tow sa metewio ambaoNa, si Sia e maptis bo monggongguot. ³⁴ Bo waaho bela’Kum bo i sairihu: Wai Sia Bata i Ngeledtow. ³⁵ Mandomai tumotod dio si Yohanes biboho dua tow muri’na. ³⁶ Pilahena mange si Yesus mebemai, kuana: “Pilahem bata i Ngeledtow. ³⁷ Kataanan iboho ndua murid asia nioho mbehuana, osa silatahula moho lumas si Yesus. ³⁸ Sa si Yesus milah alihud, pilahe’Na, silatahula malalasem si Yesus sa kuana besilatahula: “Asia pangilahen i hamotahula?” Kuan ilatahula we-Sia: “Rabi (Guru), bisana pahatuna Nu?” ³⁹ KuaNa besilatahula: “Mahinem bo wilahen i hamotahula.” Sa silatahula mahi milah bisana pahatuna Na, anendoi boho silatahula sumondoio boho i wakaru-harua Na; tepoi boho tumiting i nepat onah. ⁴⁰ Waaho nesa tow karuana tumanga oho siai kodait i Yohanes laho ilumas Yesus waaho si Andreas, pog i Simon Petrus. ⁴¹ Andreas e pahamunan be wetauw i Simon, pog nga, sa huana be sia: “Bewetauwem i hamitahula si Mesias (artina: Kristus).” ⁴² Mapea-weang sia si Yesus. Totongan Sia i Yesus sa kuana: “Sihow Simon bata i Yohanes, i wengala’ne kow Kefas (artinya: Petrus).” ⁴³ mandomai si Yesus matangem moho a galilea . We tau’Ngasi Filipus, sa kuana: “Lumasem i Ahu.” ⁴⁴ Filipus tou i Betsaida, doong i Andreas bo si Petrus. ⁴⁵ Filipus metauw bo si Natanael sa kuana wesia: “Bewetauwem i hamitahula Sia, e mbehua i Musa am bukui Torat bo manga nabi, waaho si Yesus, ba’ta i Yusuf a Nazaret.” ⁴⁶ Kuan Natanael be Sia: “Awa nioho mauleng mahi a Nazaret? ⁴⁷ Kuan i Filipus be sia: “Mayom sawilahen!” Pilahen i Yesus si Natanael mahi we Sia sa i huana be sia: “Pilahen, wai totu-totuu tow Israel, ahii sia walsu!” ⁴⁸ kuan i Natanael be Sia: “Kelembisa sa hu kahilalaa Na? Sowaten i Yesus be sia: “ Awe kow tiniang i Filipus, belakum kow lumililiw a tud i kayu ara. ⁴⁹ Kuaan i Natanael be Sia: “Rabi, si How Bata i Ngeledtow si How Dajai tow Israel!” ⁵⁰ Sowaten i Yesus, kuana: “Nde nihuaHu we how: bela’Ku kow a lumililiw a tud kayu ara, awa eman ne num? Kawilahanu e mamoa-moali lebe wako biboho.” ⁵¹ Osa i hua i Yesus be Sia: i huahu behamotahula, awahem kawelahanu langit behauha osa malaekat i Ngeledtow kumapet lumolos a mbata i Ngeledtow.