1
Be si Paulus, ê pinandung i Ningumêlêd tiniang mamoali rasul i Kristus Yesus, be si Sostenes, pog i hita,
2
Tanu jama’at i Ningumêlêd a Korintus, ëwa’aho silatahula ê mbelênas a sahum si Kristus Yesus bo ê tiniang mamoali mangatow lênas, karêungan i pahasa totumu’a moro lesad, ê matiwa’ a ngalan i Ngêlêdtow i hita si Yesus Kristus, êwa’aho Ngêlêdtow i latahula bo Ngêlêdtow i hita.
3
Bêlês kohomba’ bo sononoi ênow i Ningumêlêd, Amang i hita, bo be si Ngêlëtow si Yesus Kristus malalas be homotahula.
4
Si Ahu mêlêtêh marayow be ningumêlêdku apa’an komotahula a mbêlês kohomba’i Ningumêlêd êmbehomba’-Na behomo tahula asakum si Kristus Yesus.
5
Apa-apa’an a sakum i Sia komotahula i mêsiha’an a pahasa: a morowalina kodait bo a morowalina pêngo’i ta’uan,
6
Mêtêna’an bo sasairian sakum si Kristus, ê mbeête’em a tutud i homotahula.
7
Kelewa’ahom homotahula ahi’i kaina’an a nêsa’an kohomba’ kahi karêpêt komotahula manonda-nonda i tatara i Ngêlêdtow i hita si Yesus Kristus.
8
Si sia hahi mawaête’i homotahula mahad a kasapêtana, ahad komotahula ahêm nda’i a nêndo i Ngêlêdtow i hita si Yesus Kristus.
9
Ningumêlêd, ê nitumiang i homotahula a patalian bo Bata’Na si Yesus Kristus, Ngêlêdtow i hita, awahêm mohundu.
10
Sata’ahu mehesasani homotahula, morowog karêngan i ngalan i Ngêlêdtow i hi ta si Yesus Kristus, sani’aho homotahula ma’atean bo na’am bana pêtêrian a tutud : homotahula, sata’ saliku’na saniaho homotahula mêtê bo mêsa nate msa nutêh.
11
Ênde, morowogku, be ahu kinua’anêm i manga tow a pamalean i Kloe sakum komotahula, awahêm bana pahisea’an a tutud i homotahula.
12
Ê êwa’i, awahêm komotahula êsa-êsa mapakua : siahu a ndoro’ i Paulus. Suma si ahu a ndoro’ i Apolos. Suma si ahu a ndoro’ i Kefas. Suma siahu a ndoro’ i Kristus.
13
Awa si Kristus pinêbeteng? Awa si Paulus kinalawat apa-apaan komotahula? Suma awa homotahula binaptis a sakum ngalan i Paulus.
14
Nde talalêm mande êsatow ange a tutud i homotahula ê mbinaptisku ihawalina si Krispus bo si Gayus.
15
Mahad alahêm totumu’ do’na humua, awahêm komotahula binaptis asakum ngalanku.
16
Bo pamalean i Stefanus siahu ê nimaptis. Ihawalina we silatahula ahi’i halahanku, mane’ banawe’ êtotumu’ ê mbinaptisku.
17
Apa-apa’an si Kristus imasiu iahu ahi’i tanu mawaptis, sata’ tanu sumahai i Kukua, bo wa’aho hahi ahi’i karêngan kosilihan i kodait, sani’aho kalawat i Kristus na’am mamoali alahêm toro.
18
Apa-apa’an panahaian sakum kalawat totu’u mamoali kawodohan tanu silatahhula ê motutus, sata’tanu hita ê mbewawawia pêsahaian i aho mamoali korowotan i Ningumêlêd.
19
Apa’an bana niwatih-watih: “si ahu mainjo mawawotutus i sisilih imangatotumu’ mahasisilih bo hasisilihhan i mangatotumu’ pandei mainjo iwawatambulala-Hu.
20
Bi sanam totumu’ ê mahasisilih? Bi sanam toutêh a Torat? Bisanam tapasaru a mbaoitoba i ai’i? Awa ahi’i Ningumêlêd niwawatulidêm i sisilih i mbaoitoba i ai’i mamoali kawodohan?
21
Apa-apa’an baoitoba, sakum kosilihan i Ningumêlêd, ahi’i mahahilala i Ningumêlêd i sisilina, yanasa Ningumêlêd imêtêna’an mawawia silatahula ê maheman i kawodohan pinasahaian i Kukua.
22
Mangatow i Yahudi mapandung tanda’bo mangatow i Yunani mapangilah kosilihan,
23
sata’ kamitahula mawasahai si Kristus ê mbehalawat : tanu mangatow i Yahudi êsa batu pakawisudan bo tanu mangatow ahi’i Yahudi êsa kawodohan,
24
Sata tanu silatahula ê tiniang, maulêng tow i Yahudi, sumahai korowotan i Ningumêlêd bo sisilih i Ningumêlêd.
25
Nde ê mbodoh i Ningumêlêd lebe wako sisilahna ênde totumu’ bo ê kawel a Ningumêlêd lebe morowot nde totumu?
26
Ihumên kêmoho, morowog, kelembisa ka’ada’an i homotahula, a noras komotahula tiniang : kumi’it a sosokad i totumu’ ahi’i tado’o totumu’ ê pandei, ahi’i tado’o totumu mahaturus, ahi’i tado’o totumu’ pawuli-wulian.
27
sata’asia ê mbodoh tanu mawasokia’ i totumu’ ê mahasisili, bo asia ê kawel tanu baoitoba, sinisir i Ningumêlêd tanu mawasokia’ i morowot,
28
bo asia ê tahu’i pawuli-wulian bo tanu baoitoba, ninisir i Ningumêlêd, bo hahi asia ê talahêm toro, sinisir i Ningumêlêd mawatala asia ê mahatoro,
29
sani’aho na’am bana nêsatotomu’ange mawasukag i mbatangan a ndior i Ningumêlêd.
30
Sata’ apa’an i Sia komotahula asakumên i Kristus Yesus, ênapa’an Ningumêlêd imamoalim sisilih tanu hita. Si Sia imawaulit bo imawalênas i hita.
31
Kawalian i aho kele bana niwati-watih : “Siseiange ê masukag, ihamerot sia mawawasukag a sakumên si Ngêlêdtow.