² Pineleng witu se Israel ¹ Niaku ku meila’la eng kaulitan witu si Kristus, niaku ku reiy’ matowo. Suara nateku eng kumi’it sumairi witu e Roh Kudus, 2 kaa niaku ku kasa mengasi’ wo niaku ku reiy’ maena-ena’ masusa ate. ³ Awes tare, niaku ku pa’ar i kakutok wo i keta’atas waki si Kristus demi se patuari-patuariku, kaum esa nge bangsaku eng kenaramen jasmani. ⁴ Karengan nisea nyi’a mouw se tou Israel, nisea se pinopo mola minamuali oki’, wo nisea se simungkulola eng kalo’oran, wo en teta’aran-teta’aran, wo e nukum Taurat, wo e raghes, wo en ta’ar-ta’ar. ⁵ Nisea nyi’a mouw se see’ ne ama’-ama’ opo’, se timumpala si Mesias witu eng ka’ada’an-Na tanume sitou, witu natas e reiy’ sa mina’asa wo’o sapa. Nisia nyi’a mouw si Empung lewo’ sa reiy’ lo’oren i ka’ayo eng keure-urena. Amin! ⁶ Ta’an laa e nuwu’ ni Empung reiy’ wona’ mapo’opol. Karengan reiy’ em baya ne tou se asal waki Israel nyi’a mouw se tou Israel, ⁷ wo kangkasi reiy’ em baya se neiy i kareken see’ ni Abraham nyi’a mouw se oki’ ni Abraham, ta’an: “Se asal waki si Ishak se laa totoren see’mu.” ⁸ Em penoronna: reiy’ se oki-oki’ i ki’it e le’ona nyi’a mouw se oki-oki’ ni Empung, ta’an se oki-oki’ en teta’aran se tinotor see’ e nulit. ⁹ Karengan e nuwu’ i yi’i eng gimandong en ta’ar: “Witu nedo tanu e nyi’i mouw Niaku ku laa meiy wo si Sara si laa makapunyala siesa oki’ tuama.” ¹⁰ Ta’an reiy’ e ni’itu i te. E lebe terange’ kasi nisia mouw si Ribka si gimandong wia i te siesa tou, nyi’a i ti’i wia i te si Ishak, ama’ ne opo’ta. ¹¹ Karengan e nedo se oki-oki’ i ti’i nu reiy’pe’ neiy i patoula wo reiy’pe’ matuanala e le’os ka’apa e lewo’, - rio e rencana ni Empung tanume em pepepelengan-Na en te’etepela, reiy’ i to’otolela witu em pasiwo-siwon, ta’an ni’i to’otolela witu eng kineretan-Na – ¹² neiy i lila’la wia si Ribka: “ Sioki’ polon si laa mamuali hamba ni oki’ muda,” ¹³ tanu wawean neiy i kepatik: “Niaku ku meupus si Yakub, ta’an mari’iris si Esau.” ¹⁴ Sa tuana, sapa ku’a re’en e laa i pelelila’tala? Sapa ku’a re’en si Empung si reiy’ adil? Reiy’ wona’! ¹⁵ Karengan Nisia si minee nuwu’ wia si Musa : “Niaku ku laa meweweela en tongkoupusen wia si seiy Niaku mepa’ar meweweela en tongkoupusen wo Niaku ku laa mamura ate wia si seiy Niaku mepa’ar mamura ate. ¹⁶ Jadi eng kapualitan i ti’i reiy’ kimayong witu eng kepa’aran ni tou ka’apa em pe’inakuten ni tou, ta’an witu eng kamura’an e nate ni Empung. ¹⁷ Karengan eng Kaol Suci limila’ wia si Firaun: “Ni’itu mouw eng karenganna Niaku ku timo’orola nikoo, nyi’a i ti’i rio Niaku ku mapa’atola eng kuasa-Ku witu nikoo, wo rio e ngaran-Ku masyurela wia minapekasa em bumi.” ¹⁸ Jadi Nisia si mineela en tongkoupusen wia si seiy si neiy i kepa’ar-Nala wo Nisia si time’etepla e nate ni seiy si neiy i kepa’ar-Nala. ¹⁹ En teakan kouw laa lumila’ wia niaku: “Sa tuana, sapa pe’ kasi en sinelok-Nala? Karengan seiy si masu’usuk eng kepa’aran-Na?” ²⁰ Seiy ku’a re’en nikoo, hei tou, takar koo mapero si Empung? Toro ku’a re’en si siniwo si lumila’la wia si simiwo nisia: “Ka’a ku’a koo sumiwo niaku tuana?” ²¹ Sapa ku’a si sumesiwo kure’ si reiy’ mekehak witu en tana’ pulutna, kaa laa mesesiwo waki me’eme’ masuat e nesa barang kaa laa paken eng ka’ara’an en toroan mulia wo e nesa barang walina e laa paken eng ka’ara’an en toroan karengan? ²² Jadi, sa laa mapa’atola e nupi’-Na wo mapaloo’o-loo’ola eng kuasa-Na, Empung si minee kasabaran wangko’ witu em barang-barang kamurka’an-Na, en tiniro mola kaa laa eng kapunengan – ²³ awes tare kaa laa mapaloo’o-loo’ola eng kakaya’an kalo’oran-Na witu se barang-barang en tongkoupusen-Na se tiniro’-Na mola i wee eng kalo’oran, ²⁴ nyi’a i ti’i nikita, si kineret-Na mola reiy’kan i te waki elet ne tou Yahudi, ta’an kangkasi waki elet ne bangsa-bangsa walina, ²⁵ tanu neiy i nuwu’-Nala kangkasi witu eng kaol ni nabi Hosea: “Se reiy’ umat-Ku se laa Kutotoren: umat-Ku wo se reiy’ i koupus: i koupus.” ²⁶ Wo waki tampa, waki wisa e laa i pelelila’la wia nisea: “Nikouw i yi’i kouw reiy’ umat-Ku,” maname e laa i pelelila’la wia nisea: “Oki-oki’ ni Empung matou-tou.” ²⁷ Wo si Yesaya si maaleiy tanume si Israel: “Ma’anouw tu’u eng kelakerna ne oki’ ni Israel se tanu e neris waki tasik, ta’an se tele’una i te se laa lawiren. ²⁸ Karengan sapa neiy mouw i nuwu’-Nala, e laa tuananla ni Tuhan wia natas em bumi, reiy’ siperoan wo makarengan.” ²⁹ Wo tanu neiy i lila’la ni Yesaya nu reiy’pe’ nyi’a: “Sa andeiyna Tuhan semesta alam si reiy’ timele’ula wia nikita see’, kita minamuali mouw tanu en Sodom wo masuat tanu eng Gomora.” ³⁰ Sa tuana, sapa ku’a re’en e laa i pelelila’tala? Nyi’i: kaa se bangsa-bangsa walina se reiy’ mekeki’it eng kaulitan, se minaka’ato mola eng kaulitan, nyi’a i ti’i eng kaulitan karengan e iman. ³¹ Ta’an: kaa si Israel, uli-ulit tu’u mekeki’it e nukum laa mapa eiy eng kaulitan, reiy’ mouw mina’ayo witu e nukum i ti’i. ³² Ka’a reiy’? Karengan si Israel mekeki’it nyi’a reiy’ karengan e iman, ta’an karengan em pasiwo-siwon. Nisea se neiy i kasu’usu’ witu e watu kasu’usu’an, ³³ tanu wawean neiy i kepatik: “Eng kaulitna, Niaku ku rimeta’la waki Sion e nesa watu paleleren wo e nesa watu kasu’usu’an, wo seiy si ma’eman wia-Nisia, si reiy’ laa i papairangla.”