Mate wo tumo’or ampit si Kristus ¹ Sa tuana, sapa ku’a re’en e laa i pelelila’ tala? Toro ku’a re’en kita tumentem witu en dosa, rio maka’awesla e nupus karunia i ti’i? ² Ma’an mekasa reiy’! Reiy’ ku’a re’en nikita ta minate mouw i wee en dosa, kumura mouw ku’a re’en o kita torope’ tumou witu nyi’a? ³ Ka’apa rey’ mete’u ku’a re’en kouw, karengan nikita nu waya si binaptisouw witu si Kristus, kita binaptisouw witu em pinatean-Na? ⁴ Ampit en tuana nikita ta kinuburola mewali-wali ampit Nisia kaa em baptisan witu em pinatean, rio, masuat tanu si Kristus si tino’orola witu nelet ne tou minate kaa eng kamulia’an ni Ama’, tuanakan kangkasi nikita ta laa tumou witu em patou-touan weru. ⁵ Karengan sa kita minaesa mouw ampit en sapa e masuat ampit em pinatean-Na, nikita kangkasi ta laa mamuali esa ampit en sapa e masuat ampit eng kineteto’or-Na. ⁶ Karengan nikita ta mete’u, kaa en tou ureta eng kimi’itouw neiy i salibla, rio e nouwak en dosa ta mere’i eng kuasana, rio te’a kita mepehambala en tou kasi witu en dosa. ⁷ Karengan seiy si minate mouw, nisia si neiy mouw i kewayami waki dosa. ⁸ Jadi sa kita minate mouw ampit si Kristus, nikita ta ma’eman, kaa nikita ta laa tumou kangkasi ampit Nisia. ⁹ Karengan nikita ta mete’u, kaa si Kristus, nu reiy’ mouw Nisia nu timo’or witu nelet ne tou minate, reiy’ mouw minate kasi: maut e reiy’ mouw kimuasala kasi wia Nisia. ¹⁰ Karengan em pinatean-Na nyi’a mouw em pinatean witu en dosa, mekasa i te wo i wee eng keure-urena, wo em patou-touan-Na nyi’a mouw em patou-touan i wee si Empung. ¹¹ Tuana mouw satorona kouw maloo’ola nyi’a: kaa nikouw kouw minate mouw i wee en dosa, ta’an nikouw kouw matou-tou i wee si Empung witu si Kristus Yesus. ¹² Kaa ni’itu satorona en dosa te’a o kumuasala kasi witu eng gorem en toumu fana, rio kouw te’a kasi kumi’itla eng kapa’aranna. ¹³ Wo te’a mouw koo mesesarakanla e weteng-weteng e nouwakmu witu en dosa kaa em pepepaken tanume en senjata kabengisan, ta’an i sarakanola en toumu wia si Empung tanume se tou-tou, eng ketareanna se minate, ta’an en teakan se matou-tou. Wo i sarakanola e weteng-weteng en toumu wia si Empung kaa laa mamuali senjata eng kaulitan. ¹⁴ Karengan nikoo koo reiy’ mouw laa kuasa’ala kasi ni dosa, karengan nikoo koo reiy’ mouw witu e wawa’ nukum Taurat, ta’an witu e wawa’ e nupus karunia. ¹⁵ Jadi kumura? Sapa ku’a re’en kita laa sumiwo en dosa, karengan nikita ta reiy’ witu e wawa’ nukum Taurat, ta’an witu e wawa’ e nupus karunia? Ma’an mekasa reiy’! ¹⁶ Sapa ku’a re’en kouw reiy’ mete’u, kaa sakawisa kouw sumarakan en toumu wia siesa tou tanume si hamba kaa laa lumale’la nisia, nikoo mouw si hamba ni tou i ti’i, si lewo’ sa reiy’ lale’ennula, le’os witu en dosa ma’aka-aka nikoo witu em patean, ka’apa tu’u witu eng kelale’an ma’aka-aka nikoo witu eng kaulitan? ¹⁷ Ta’an syukurouw wia si Empung! Eng ketareanna memang nikouw kouw hamba en dosa, ta’an en teakan nikouw kouw ampit em pakasa’an e nate kouw limale’ mola en teturu’ neiy mouw i papawee-weela wia nikoo. ¹⁸ Nikouw kouw minerdeka mola witu en dosa wo minamuali hamba eng kaulitan. ¹⁹ Niaku ku limila’la eng kapualitan i yi’i eng kenaramen ni tou karengan eng kalewea’an niouw. Karengan masuat tanu nikouw nu simarakanola e weteng-weteng e nouwakmu minamuali hamba eng kakewuran wo eng kadurhaka’an e minali nikouw wia eng kadurhaka’an, tuana mouw eng kapualitan niouw en teakan kouw lewo’ sa reiy sumarakan e weteng-weteng e nouwakmu mamuali hamba eng kaulitan e mali nikouw witu em pakudusan. ²⁰ Karengan e nedo kouw nu hamba en dosa, kouw neiy i kewaya waki kaulitan. ²¹ Wo em bu’ana sapa ku’a re’en en tinipu’ miouw witu nyi’a? Em baya nyi’a i ti’i en timuanala nikouw o kouw mapedam meirang en teakan, karengan eng kesampetan em baya nyi’a i ti’i nyi’a mouw em patean. ²² Ta’an en teakan, nu reiy mouw kouw nu minerdeka mola witu en dosa wo nikouw nu minamuali mouw hamba ni Empung, nikouw kouw minaka’ato wu’ana e mali nikouw witu em pakudusan wo en tanume eng kesampetanna nyi’a mouw em patou-touan kekal. ²³ Karengan en tetoro en dosa nyi’a mouw e maut; ta’an eng karunia ni Empung nyi’a mouw em patou-touan kekal witu si Kristus Yesus, Tuhan ta.