¹ Abraham si neiy i ulitla karengan e iman Jadi sapa ku’a re’en e laa i lila’ ta en tanume si Abraham, si ama’ opo’ e nouwak ta? ² Karengan sa wona’ si Abraham si ulitla karengan em pasiwo-siwonna, takar nisia si minaka’ato to’otolan kaa laa sumawa’, ta’an reiy’ witu en sinaru ni Empung. ³ Karengan sapa ku’a re’en neiy i lila’la e nats eng Kaol Suci? “Laa o ma’emanouw si Abraham wia si Tuhan, wo si Tuhan si minereke-rekenla eng kapualitan i ti’i wia nisia tanume eng kaulitan.” ⁴ Sa wawean tou si mepa’ayang, en tetorona reiy’ i parekenla tanume en tetaber, ta’an en tanume eng hakna. ⁵ Ta’an sa wawean tou si reiy’ mepa’ayang, ta’an si ma’eman wia Nisia si minulitla sitou durhaka, imanna ni’i rekenla mamuali kaulitan. Tanukan kangkasi si Daud si timotor ma’aruiyola sitou neiy i ulitla ni Empung reiy’ neiy i to’otolela witu em pasiwo-siwonna: ⁶ Tanukan kangkasi si Daud si timotor ma’aruiyola sitou neiy i ulitla ni Empung reiy’ neiy i to’otolela witu em pasiwo-siwonna: ⁷ “Ma’aruiyola sitou niampungala eng kaselokan-kaselokanna,wo eng kinelungala en dosa-dosana; ⁸ ma’aruiyola sitou eng kaselokanna e reiy’ neiy i rekenla ni Tuhan wia nisia.” ⁹ Sapa ku’a re’en en tetotoren aruiy i yi’i em pepaken wia se tou maka sunat i te ka’apa kangkasi wia se tou reiy’ maka sunat? Karengan neiy mouw i lila’ meiyla, kaa wia si Abraham iman ni’i parekenla tanume eng kaulitan. ¹⁰ Witu eng ka’ada’an wisala ku’a re’en eng kapualitan i ti’i ni’i parekenla? Nu reiy’pe’ ka’apa nu reiy’ mouw sia nu sinunat? Reiy’ nu reiy’ mouw nu sinunat, ta’an nu reiy’pe’ nyi’a. ¹¹ Wo eng kowa’ en sunat i ti’i eng kina’atoanna tanume e wa’il eng kaulitan timo’otolela witu e iman neiy i papa’atonala, nu reiy’pe’ sia nu makasunat. Tuana mouw sia toro mamuali ama’ em baya ne tou ma’eman se reiy’ makasunat, rio eng kaulitan ni’i parekenla wia nisea, ¹² wo kangkasi mamuali ama’ ne tou-tou makasunat, nyi’a i ti’i nisea se reiy’kan i te makasunat, ta’an kangkasi se maki’itla e nenus iman ni Abraham, ama’ ne opo’ ta, witu e nedo sia nu reiy’pe’ sinunat. ¹³ Karengan reiy’ kaa e nukum Taurat neiy mouw i weela en ta’ar wia si Abraham wo se see’na, kaa nisia si laa makapunyala eng kaoatan, ta’an karengan eng kaulitan, timo’otolela witu e iman. ¹⁴ Karengan sa nisea se minarapla nyi’a witu e nukum Taurat, se maka’ato weteng neiy i ta’arla ni Empung, takar minaghio-ghio mouw e iman wo minapo’opolouw en ta’ar i ti’i. ¹⁵ Karengan e nukum Taurat makato’oren e nupi’, ta’an wisa e reiy’la ukum Taurat, witu e reiy’la kangkasi kaselokan. ¹⁶ Kaa ni’itu mouw eng kaulitan timo’otolela witu e iman rio metanula e nupus karunia, i ka’ayo en ta’ar i ti’i em paken wia em baya ne see’ ni Abraham, reiy’kan i te wia nisea nu matou-tou witu e nukum Taurat, ta’an kangkasi wia nisea nu matou-tou witu e iman ni Abraham. Karengan si Abraham nyi’a mouw si ama’ ta nu waya, ¹⁷ tanu wawean neiy i kepatik: “Nikoo koo neiy-Ku mouw i tantula mamuali ama’ ne laker bangsa” – witu en sinaru ni Empung wia-Nisia sia ma’eman, nyi’a i ti’i Empung si timoula sitou minate wo si simiwo mola ampit e nuwu’-Na sapa e reiy’la minamuali wawean. ¹⁸ Karengan ma’anouw tu’u reiy’la to’otolan kaa laa ma’arapla, ta’an si Abraham si ma’arapla kangkasi wo ma’eman, kaa nisia si laa mamuali ama’ ne kelaker bangsa, i ki’it e neiy mouw i nuwu’la: “Tuana mouw eng kelakerna ee sangari se see’mu.” ¹⁹ Imanna e reiy’ minalewea’, ma’anouw tu’u sia mete’ula, kaa e nouwakna eng kasa mouw lewea’, karengan e numurna wo’o mouw wona’ esa nga atus nge te’un, wo kaa e rahim ni Sara minapenetouw. ²⁰ Ta’an witu en ta’ar ni Empung nisia si reiy’ meware-wareng karengan e reiy’ kapa’emanan, awes tare si niente’ witu e imanna wo sia malo’orla si Empung, ²¹ ampit minawuta eng ka’emanan, kaa si Empung si makakuasa laa metetuanala en sapa neiy mouw i ta’ar-Nala. ²² Kaa ni’itu eng kapualitan i yi’i ni’i parekenla wia nisia tanume eng kaulitan. ²³ Tetotoren-tetotoren i yi’i, nyi’a i ti’i “eng kapualitan i yi’i ni’i parekenla wia nisia,“ reiy’ neiy i patik i wee si Abraham i te, ²⁴ ta’an neiy i patik kangkasi i wee nikita; karengan wia nikita tu’u si Empung si minaparekenla nyi’a, karengan nikita ta ma’eman wia Nisia, si timo’orola si Yesus, Tuhan ta, witu nelet ne tou minate, ²⁵ nyi’a i ti’i si Yesus, si neiy mouw i sarakanla karengan eng kaselokan ta wo si tino’orola karengan em pe’ulitan nikita.