Te’a maakimla si patuarimu ¹ Sungkulenouw sitou e lewea’ imanna reiy’ ampit minapasusuiyla eng genangna. ² Si esa tou me’eman, kaa nisia si toro kumaan e reiy’ sa mina’asa jenis kekaanen, ta’an sitou lewea’ imanna si mekaan e raaren-raaren i te. ³ Seiy si mekaan, te’a mouw masero’la sitou reiy’ mekaan, wo seiy si reiy’ mekaan, te’a mouw maakimla sitou mekaan, karengan si Empung si simungkulouw sitou i ti’i. ⁴ Seiy ku’a re’en nikouw, i ka’ayo kouw maakimla si hamba ne tou walina? Andi ku’a re’en sia rimedeiy, andi ku’a re’en sia i ka’anu, ni’itu e nyi’a mouw nurusan ni tuangna nuesa. Ta’an nisia si laa minena-ena’ rimedeiy, karengan si Tuhan si makakuasa jumaga nisia minena-ena’ rimedeiy. ⁵ Si esa nga tou si mapokeiyla e nendo esa lebe pe’uku-ukumen ta’an e nendo walina, ta’an se walina se mapokeiyla em baya e nendo masuat i te. Satorona susur tou se uli-ulit ma’eman witu e natena nuesa. ⁶ Seiy si timiboiy witu e nesa nendo neiy i ketantu, nisia si matuanala nyi’a i wee si Tuhan, wo nisia kangkasi si matotor syukur wia si Empung. ⁷ Karengan reiy’la siesa tou tu’u witu e nelet ta si matou-tou kaa en touna nuesa, wo reiy’la siesa tou tu’u si minate kaa en touna nuesa. ⁸ Karengan sa kita matou-tou, kita matou-tou i wee si Tuhan, wo sa kita mate, kita mate i wee si Tuhan. Jadi le’os matou-tou ka’apa mate, nikita nyi’a mouw kita kapunya’an ni Tuhan. ⁹ Karengan kaa ni’itu mouw si Kristus si minate mouw wo tumou sumeup, rio Sia mamuali Tuhan, le’os wia se tou-tou minate, ma’anouw tu’u wia se tou-tou matou-tou. ¹⁰ Ta’an nikoo, ka’a ku’a re’en koo maakimla si patuarimu? Ka’apa ka’a ku’a re’en koo masero’la si patuarimu? Karengan nikita nu waya kita lewo’ sa reiy’ sumaru en takhta paadilan ni Empung. ¹¹ Karengan wawean neiy i kepatik: “Demi Niaku nu matou-tou, tuana mouw e nuwu’ ni Tuhan, em baya ne tou se laa kumudu kumurur witu en sinaru-Ku wo em baya ne tou se laa lumo’or si Empung.” ¹² Tuana mouw susur tou witu e nelet ta se laa mee pertangungan jawab tanume en touna nuesa wia si Empung. Te’a mawee watu kasu’usu’an ¹³ Kaa ni’itu te’a mouw kita ma’akiman kasi! Ta’an lebe le’os kouw kumi’it em pandangan i yi’i: Te’a kita sumiwo si patuari ta i ka’anu ka’apa i kasu’usu’! ¹⁴ Niaku ku mete’u wo ma’eman wia si Tuhan Yesus, kaa reiy’la si wo’o sapa e najis witu en touna nuesa. Wia i te se tou mapokeiyla, kaa wo’o sapa nyi’a mouw e najis, wia sitou i ti’i mouw e wo’o sapa i ti’i e najis. ¹⁵ Karengan sa koo rumarala e nate ni patuarimu karengan e wo’o sapa eng kinaannu, takar koo reiy’ matou-tou kasi i ki’it em pengiween e nupus. Te’a mouw koo mepepunengla si patuarimu karengan eng kekaanennu, karengan si Kristus si minate mouw i wee nisia. ¹⁶ Sapa e le’os, eng kapunya’an niouw, te’a mouw kouw mewewayala ni’itu sero’an. ¹⁷ Karengan eng Keraja’an ni Empung reiy’ mouw em poong kekaanen wo eng kekoo’on, ta’an em poong eng kaulitan, dame sejahtera wo e mepa’a-pa’ar ni Roh Kudus. ¹⁸ Karengan seiy i te si melayanla si Kristus ampit eng kenaramen i yi’i, nisia si mekepa’aren wia si Empung wo paormaten ne tou. ¹⁹ Kaa ni’itu meiy mouw kita kumi’it sapa e mapa eiy en dame sejahtera wo wawean ka’ara’an kaa laa mewewangunan. ²⁰ Te’a mouw koo meteterila em pepa’ayangen ni Empung karengan eng kekaanen! E reiy’ sa mina’asa wo’o sapa nyi’a mouw en suci, ta’an cilaka mouw sitou, sa karengan eng kekaanenna se tou walina i kasu’usu’! ²¹ Le’osouw koo te’a mekekaan e le’ona ka’apa kumoo’ e nanggor, ka’apa e wo’o sapa minamuali watu kasu’usu’an ni patuarimu. ²² Tumiboiy mouw witu eng ka’emanan kapunya’annu i ti’i, i wee en toumu nuesa witu en sinaru ni Empung. Ma’aruiyola sia,si reiy’ minukum en touna nuesa witu en sapa ni’i papokeiynala le’os kaa laa petetuananla. ²³ Ta’an seiy i te si meware-wareng, sa sia kumaan, nisia si niukumouw, karengan nisia si reiy’ timuanala nyi’a timo’otolela witu iman. Wo e reiy’ sa mina’asa wo’o sapa e reiy’ timo’otolela witu e iman, nyi’a mouw en dosa.