³ Tabea ¹ Waki si Paulus, hamba ni Kristus Yesus, si kineret mamuali rasul wo kinudusla kaa laa ma’abarla e Injil ni Empung. ² Injil i ti’i neiy mouw i ta’ar-Nala nu reiy’pe’ nyi’a ampit nieletan ne nabi-nabi-Na witu eng kaol-kaol suci, 3 tanume si Oki’-Na, sa i ki’it e le’ona si neiy i peurangla waki see’ ni Daud, ⁴ wo i ki’it e Roh kakudusan neiy i papaloo’o-loo’ola kaa eng kinato’oran-Na witu nelet ne tou minate, kaa Nisia nyi’a mouw si Oki’ ni Empung makakuasa, Yesus Kristus Tuhan ta. ⁵ Ampit nieletan-Na nikeiy keiy minaka’ato e nupus karunia wo en jabatan rasul kaa laa mererawir em baya se bangsa, rio sea ma’eman wo lale’ witu e ngaran-Na. ⁶ Nikouw kangkasi kouw neiy i kaghorem witu nelet nea, nikouw si kineretouw mamuali kapunya’an ni Kristus. ⁷ Wia nikouw nu waya se maena’ waki Roma, si’i koupus ni Empung, si kineret wo siniwola tou-tou kudus: E nupus karunia rumapitla nikouw wo en dame sejahtera waki si Empung, Ama’ ta, wo waki si Tuhan Yesus Kristus. ⁸ Ketare-tare niaku ku matotor syukur wia si Empungku kaa si Yesus Kristus witu nikouw nu waya, karengan neiy mouw i ka’abar e nabar tanume e imanmu wia minapekasa eng kaoatan. ⁹ Karengan si Empung, si pelayanengkula ampit em pakasa’an nateku witu em paabaran e Injil ni Oki’-Na, nyi’a mouw en sairiku, kaa witu en sesombayangengku niaku ku reiy’ mena’ maghenang nikouw: ¹⁰ Niaku ku simombayang, satorona ampit eng kepa’aran ni Empung niaku eng kamurianna ku i kalempote lumalesla nikouw. ¹¹ Karengan niaku ku pa’ar lumoo’ nikouw kaa meweweela karunia rohani wia nikouw kaa mekeketerla nikouw, ¹² nyi’a i ti’i, rio ku witu nelet miouw wo kaki’it kaiboran karengan e iman ta mewali, le’os kaa e imanmu ka’apa tu’u kaa e imanku. ¹³ Patuari waya, niaku ku pa’ar, rio kouw mete’ula, kaa niaku ku re’ereghouw mekepa’ar ma’eiy wia nikouw – ta’an i ka’ayomi i yi’i ku reiy’ mena’ kina’ape’an – rio witu eng keuneran niouw ku maka’atola wu’ana, tanukan kangkasi witu eng keuneran ne bangsa reiy’ Yahudi walina. ¹⁴ Niaku kuminutang le’os wia se tou Yunani, ka’apa tu’u wia se tou reiy’ Yunani, le’os wia se tou simekolah, ka’apa tu’u wia se tou reiy’ simekolah. ¹⁵ Ni’itu mouw eng karenganna niaku ku pa’ar laa ma’abarla e Injil wia nikouw o kangkasi se maena’ waki Roma. ¹⁶ Karengan niaku ku makapunya ka’emanan te’etep witu e Injil, karengan e Injil nyi’a mouw eng kaketeran ni Empung lumawirla susur tou se ma’eman, ketare-tare se tou Yahudi, ta’an kangkasi se tou Yunani. ¹⁷ Karengan witu eng goremna em pakaloo’o-loo’ola eng kaulitan ni Empung, timodomi waki iman wo ma’akala witu e iman, tanu wawean neiy i kepatik: “Sitou ulit si laa tumou kaa e iman.” ¹⁸ Karengan e nupi’ ni Empung em pakaloo’o-loo’ola waki sorga witu e reiy’ sa mina’asa ka’alipuruan wo eng kabengisan ne tou, se malotoiy eng kaulitan ampit eng kabengisan. ¹⁹ Karengan sapa en toro kakete’uan neala tanume si Empung em pakaloo’o-loo’ola wia nisea, karengan si Empung si minaploo’o-loo’o mola nyi’a wia nisea. ²⁰ Karengan sapa e reiy’ paloo’ola waki-Nisia, nyi’a i ti’i eng kaketeran-Na kekal wo eng kailahian-Na, en toro kaloo’an witu eng genang waki siniwo-Na rengan eng kaoatan siniwola, i ka’ayo sea reiy’ mete’u lumi’ikur. ²¹ Karengan ma’anouw tu’u sea sumine’u si Empung, nisea se reiy’ malo’orla Nisia tanume si Empung ka’apa matotor syukur wia-Nisia. Kapurikitna eng genang nea mamuali peghio-ghion wo e nate nea we’engel minareiydem. ²² Nisea se masiwo tanu mokan se wuta eng hikmat, ta’an nisea se mina we’engelouw. ²³ Nisea se simawelela eng kalo’oran ni Empung reiy’ fana ampit eng gambaran mange’an ampit sitou fana, se burung-burung, se tekapen-tekapen maka ne’a epat ka’apa se tekapen-tekapen maanap. ²⁴ Kaa ni’itu si Empung si simarakan nisea witu eng kepa’aran e nate nea lumaa eng kakewuran, i ka’ayo nisea nu mekekewuran e nouwak nea. ²⁵ Karengan nisea se simawelela eng kaulitan ni Empung ampit en towo wo malo’or wo masempe si makhluk ampit limiurla si Simiwo nisia si lewo’ sa reiy’ lo’oren eng keure-urena, amin. ²⁶ Kaa ni’itu si Empung si simarakan nisea witu eng hawa nafsu makairangen, karengan se tu’awewene-tu’awewene nea se simawelela em paesa’an e nouwak waar ampit em paesa’an e nouwak reiy’ waar. ²⁷ Tuanakan kangkasi se tu’atuama-tu’atuama se timele’ula em paesa’an e nouwak waar ampit se tu’awewene nea wo melaya-layas witu en serit nea siesa wia se walina, i ka’ayo sea simiwola eng kesa’amekan, tuama ampit si tuama, wo kaa ni’itu nisea se minaka’ato witu en tou nea en sesuli’ waar i wee eng kinaseipan nea. ²⁸ Wo karengan nisea se reiy’ mapedam mepadung kaa laa ma’akula si Empung, takar si Empung si simarakanla nisea witu eng genang-genang neiy i kakutok, i ka’ayo sea masiwola sapa e reiy’ waar: ²⁹ wuta ampit e reiy’ sa mina’asa kabengisan, kalewo’an, kasorodoan, wo eng kawurukan, wuta ampit en dengki, pawunu’an, pesali’isi’an, towo wiles, wo eng ka’alipuruan. ³⁰ Nisea nyi’a mouw se mengengabut, menenero’, rumeri’iris si Empung, kurang ajar, se congkak, tingkeiy, sigha’ witu eng kalewo’an, reiy’ lale’ wia se tu’a, ³¹ reiy’ siakal, reiy’ lale’, reiy’ siupus, reiy’ makasine’u en tongkoupusen. ³² Karengan ma’anouw tu’u sea mete’ula em pengiween-pengiween e nukum ni Empung, nyi’a i ti’i kaa susur tou si matuanala eng kapualitan-kapualitan tuana, si waar ukumen paten, nisea se reiy’kan i te matuanala nyi’a nuesa, ta’an nisea kangkasi se ma’iyon ampit nisea se matuanala nyi’a.