¹ Waki si Paulus, siesa tou ukuman karengan si Kristus Yesus wo waki si Timotius patuari ta, wia si Filemon i koupus, si ka’ampit esa nga papa’ayangan o nikeiy ² wo wia si Apfia si patuari ta wewene wo wia si Arkhipus, si ka’ampit ta esa nga pe’inakutan wo wia se jema’at witu em balemu: ³ E nupus karunia wo en dame sejahtera waki si Empung, Ama’ ta, wo waki si Tuhan Yesus Kristus e rumapitla nikouw. ⁴ Niaku ku matotor en syukur wia si Empungku, susur ku i kaghenang nikoo witu en sesombayangengku, ⁵ karengan niaku ku liminga tanume e nupusmu wia em baya se tou kudus wo en tanume e imanmu wia si Tuhan Yesus. ⁶ Wo niaku ku masombayang, rio em pa’asa-asa’annu witu e iman eng kumi’it ma’ayangla en tine’u laa e le’os witu e nelet ta i wee si Kristus. ⁷ Waki upusmu eng kina’atoangku mola eng kalelaya’an wangko’ wo eng kaketeran, karengan e nate ne tou-tou kudus e ni’ibormu mola, patuariku. ⁸ Kaa ni’itu, ma’anouw tu’u witu si Kristus niaku ku makapunya eng kabebasan wuta kaa laa mepeperentala wia nikoo sapa e lewo’ sa reiy’ tuanannula, ⁹ ta’an maghenang e nupusmu i ti’i, eng kasa le’os niaku ku kumiwee nyi’a waki nikoo. Niaku, si Paulus, si mina tu’a mouw, awes kangkasi en teakan si pinenjarala karengan si Kristus Yesus, ¹⁰ ma’ayola em pengiween wia nikoo tanume sioki’ku si niatoku kasuatan niaku nu witu em penjara, nyi’a i yi’i si Onesimus ¹¹ – ketareanna memang nisia si reiy’ maka ka’ara’an wia nikoo, ta’an en teakan si kasa maka ka’ara’an wia nikoo ma’anouw tu’u wia niaku. ¹² Nisia si neiyku i reo mareng wia nikoo – nisia, nyi’a i ti’i si wu’ana e nateku –. ¹³ E nulitna niaku ku pa’ar metetaang nisia wia nyi’i tanume si sawelmu kaa melelayanla niaku eng keurean niaku nu pinenjara karengan e Injil, ¹⁴ ta’an sa reiy’ ampit e ni’iyonannu, niaku ku so’o sumiwo wo’o sapa, rio e le’os i ti’i te’a petetuanannula tanumokan ampit em papupusan, ta’an i te ampit em pa’ar eng kepa’aran. ¹⁵ Karengan wo’o wona’ kaa ni’itu mouw nisia si neiy i ta’atasla reiy’ ure wia nikoo’, rio koo toro sumungkul nisia i wee eng keure-urena, ¹⁶ si reiy’ mouw kasi tanume si hamba, ta’an i te lumantouwla ta’an si hamba, nyi’a i ti’i tanume si patuari i koupus, wia niaku si tuana mouw, sapape’ kasi wia nikoo, le’os eng kenaramen ni tou ka’apa tu’u witu si Tuhan. ¹⁷ Sa koo mapokeiyla niaku ku ka’ampitmu esa nga iman, sungkulenouw sia tanukan niaku nuesa. ¹⁸ Wo sa sia rimugi mola nikoo ka’apa tu’u minutang wia nikoo, i pesa’anola em baya nyi’a i ti’i wia niaku – ¹⁹ niaku, si Paulus, jumamin nyi’a ampit em patikan e lawasku nuesa: niaku ku laa mear nyi’a – rio te’a kulumila’la: “I pesa’anola em baya nyi’a i ti’i wia nikoo!” – karengan nikoo koo minutang wia niaku, nyi’a i ti’i en toumu nuesa. ²⁰ Yon patuariku, satorona nikoo koo maka ka’ara’an wia niaku witu si Tuhan: Iborenola e nateku witu si Kristus! ²¹ Ampit ma’eman witu eng kelale’annu, ni’i patikkula nyi’i wia nikoo. Niaku ku mete’u, e lumantouwla ta’an em pengiweengku i yi’i e laa tuanannula. ²² Witu e ni’itu tumiro’ mouw kangkasi meweweela tete’upan wia niaku, karengan niaku ku maarap kaa en sesombayangennu niaku ku laa i warengla wia nikoo. ²³ Tabea wia nikoo waki si Epafras, si ka’ampitku esa nga penjara karengan si Kristus Yesus, ²⁴ wo waki si Markus, Aristarkhus, Demas wo si Lukas, se ka’ampit-ka’ampit esa nga papa’ayangangku. ²⁵ E nupus karunia ni Tuhan Yesus Kristus rumapitla e roh miouw!