¹ Witula si Yesus o mae waki daerah Yudea wo waki daerah lewet en temberan Yordan wo witu tu’u se tou kelaker se mineiy minuyutla wia Nisia; wo tanu eng kenaramen Nisia si maweela teturu’ wia nisea kangkasi. ² Takar meiy mouw se tou-tou Farisi, wo kaa laa mewewa’awa’la si Yesus nisea se minueiy wia-Nisia: “Sapa ku’a re’en siesa tu’atuama si toro i te tuma’atasla si tu’awenena?” ³ Ta’an wingkot-Na wia nisea: “Sapa em perenta ni Musa wia nikouw?” ⁴ Wingkot nea: “Musa si miniyonla sa meteta’atasla nisia ampit sumiwo surat cere.” ⁵ Laa o pokeiy ni Yesus wia nisea: “Awes tare karengan eng kaketean e natemu mouw takar si Musa si minatikla em perenta i yi’i i wee nikouw. ⁶ Karengan witu eng ketareani eng kaoatan, Empung si simiwola nisea tuama wo wewene, ⁷ kaa ni’itu si tuama si laa tumele’ula si ama’na wo si ina’na wo maesa wo si ka’awuna, ⁸ i ka’ayo sea nu rua i ti’i se minamuali mouw esa le’ona. Tuana mouw nisea se reiy’ mouw kasi rua, ta’an i te se esa. ⁹ Kaa ni’itu, sapa em pinaesa mola ni Empung, reiy’ mete’u peteta’atasen ni tou.” ¹⁰ Katoroan nisea nu waki mouw wale, se murid-murid i ti’i se minueiy kangkasi wia si Yesus tanume eng kapualitan i ti’i. ¹¹ Laa o pokeiy-Na wia nisea: “Seiy i te si tuma’atasla si tu’awewenena laa o kumaweng ampit si wewene walina, nisia si matou-tou witu em pazinah’an wia si ka’awuna i ti’i. ¹² Wo sa si tu’awewene si tuma’atasla si tu’atuamana wo kumaweng ampit se tuama walina, nisia si masiwo en zinah.” ¹³ Laa o alin ne tou se oki-oki’ rintek wia si Yesus, rio Sia lumelerla nisea; ta’an se murid-murid-Na se makoupi’la se tou-tou i ti’i. ¹⁴ Katoroan si Yesus nu limoo’ eng kapualitan i ti’i, Nisia si meupi’ wo lumila’ wia nisea: “I wayala se oki-oki’ i ti’i meiy wia-Niaku, te’a penempe-nemperen sea, karengan se tou-tou tanu se yi’i mouw se makapunya eng Keraja’an ni Empung. ¹⁵ Niaku ku lumila’me wia nikoo: Eng kaulitna seiy i te si reiy’ sumungkul eng Keraja’an ni Empung tanu siesa oki’ rintek, nisia si reiy’ laa ghumorem witu eng goremna.” ¹⁶ Laa o Sia rumawak se oki-oki’ i ti’i wo eng kasuatan rimeta’la e lawas-Na wia nisea Sia merkatla nisea. ¹⁷ Witu e nedo si Yesus nu mae mouw kaa mapawee-weela em pakela-kelangan-Na, o meiy mouw siesa tou matingka-tingkas meiy matola Nisia wo kasuatan kimurur witu en sinaru-Na sia mueiy: “Guru le’os, sapa e lewo’ sa reiy’ siwongku rio ku maka’ato em patou-touan kekal?” ¹⁸ Wingkot ni Yesus: “Ka’a koo matotorla Niaku le’os? Reiy’la siesa tou tu’u si le’os sa reiy’ si Empung i te. ¹⁹ Nikoo koo tantu mouw mete’u e reiy’ sa mina’asa perenta ni Empung: Te’a mawunu’, te’a masiwo en zinah, te’a marongkit’, te’a matotorla en sairi towo, te’a pareu’ala eng hak ni tou, ormatenola si ama’mu wo si ina’mu!” ²⁰ Laa o pokeiy ni tou i ti’i wia-Nisia: “Guru, em baya nyi’a i ti’i eng kini’itangku mouw rengane’ niaku nu mudape’.” ²¹ Ta’an si Yesus si timu’usla wia nisia wo minee upus wia nisia, laa o lumila’ wia nisia: “Nesape’ kasi e reiy’ awes wia nikoo: mea mouw, wangkerouw sapa eng kapunya’annu wo i wee mola ni’itu wia se tou-tou miskin, takar nikoo koo laa maka’ato eng harta waki sorga, kamurian meiy mouw wia nyi’i wo kumi’itouw Niaku.” ²² Liminga em patotorla i ti’i nisia si minaoki’ ate, laa o mea ampit en tekur, karengan kelaker eng hartana. ²³ Laa o tumu’usouw si Yesus wia se murid-murid-Na witu eng kaledong-Na wo lumila’ wia nisea: “Kumura eng kapedisanna sitou maka loit megheghorem witu eng gorem eng Keraja’an ni Empung.” ²⁴ Se murid-murid-Na se neiy i kenganga liminga em patotor-Na i ti’i. Ta’an si Yesus si timo’orongla kasi: “Oki-oki’-Ku, kumura eng kapedisanna megheghorem witu eng gorem eng Keraja’an ni Empung. ²⁵ Eng kasa gampang siesa unta ghumorem witu em po’optna em bewilit ta’an siesa tou kaya megheghorem witu eng gorem eng Keraja’an ni Empung.” ²⁶ Nisea se kasa minaringka’ wo lumila’ siesa wia se walina: “Sa tuana, seiy ku’a re’en si toro lawiren?” ²⁷ Yesus si timu’use wia nisea wo lumila’: “Wia sitou eng kapualitan i ti’i e reiy’ wona’, ta’an e reiy’ tuana wia si Empung, karengan e reiy’ sa mina’asa wo’o sapa nyi’a mouw e wona’ i wee si Empung.” ²⁸ Lumila’ mola si Petrus wia si Yesus: “Nikeiy i yi’i keiy timele’u mola e reiy’ sa mina’asa wo’o sapa wo kumi’it Nikoo!” ²⁹ Wingkot ni Yesus: “Niaku ku lumila’me wia nikoo, eng kaulitna susur tou karengan Niaku wo karengan e Injil sia timele’ula em balena, se patuarina tuama ka’apa se patuarina wewene, si ina’na ka’apa si ama’na, se oki-oki’na ka’apa e numana, ³⁰ sitou i ti’i en teakan wia e masa i yi’i te kangkasi nisia si laa maka’ato sumeup e maka esa nga atus lumepet: wale, patuari tuama, patuari wewene, ina’, oki’ wo e numa, ma’anouw tu’u tu rinapitla e reiy’ sa mina’asa pasiasa’an, wo witu en zaman laa meiy nisia si laa maka’ato em patou-touan kekal. ³¹ Ta’an kelaker se tou kimetare se laa mamuali mamuri wo se mamuri se laa mamuali kumetare.” ³² Yesus wo se murid-murid-Na se witu em pakela-kelangan mea waki Yerusalem wo si Yesus si makelang marerior. Murid-murid se mapedam balisa wo kangkasi se tou-tou maki’i-ki’it Nisia wia muri se mapedam meide’. Mekasape’ kasi si Yesus kimeret se mapulu’ o rua murid-Na wo Sia muleiy meila’la wia nisea sapa e laa mamuali witu en tou-Na, ³³ pokeiy-Na: “En teakan ta mengea mouw waki Yerusalem wo si Oki’ ni Tou si laa i sarakan wia se imam-imam kepala wo se ahli-ahli Taurat, wo nisea se laa tumantula Nisia ukumen paten. Wo nisea se laa sumarakan Nisia wia se bangsa-bangsa reiy’ makasine’u si Empung, ³⁴ wo Nisia si laa penero-nero’ala, rura’an, wewen wo wunu’un, wo nu reiy’ mouw en telu nga endo Nisia si laa tumo’or.” ³⁵ O laa si Yakobus wo si Yohanes, se oki’ ni Zebedeus, rumetenla si Yesus wo lumila’ wia-Nisia: “Guru, paarapen neiy rio Nikoo satorona Koo lume’ele’la e nesa pengiween neiy!” ³⁶ Wingkot-Na wia nisea: “Sapa eng kepa’ar miouw siwong-Kula i wee nikouw?” ³⁷ Laa o pokeiy nea: “Te’esan i tela keiy rumuber witu eng kamulia’an-Nu wia eng kamurian, siesa tou kasi si witu esa nga weka lele’os-Mu wo siesa tou si witu esa nga weka kawii-Mu.” ³⁸ Ta’an pokeiy ni Yesus wia nisea: “Nikouw kouw reiy’ mete’u sapa em pengiween niouw. Toro ku’a re’en kouw kumoo’ en cawan e lewo’ sa reiy’ koo’ong-Ku wo em baptisen ampit em pebaptis e lewo’ sa reiy’ edong-Ku?” ³⁹ Wingkot nea: “Nikeiy keiy toro.” Yesus si limila’ wia nisea: “ Memang, nikouw kouw laa kumoo’ en cawan e lewo’ sa reiy’ koo’ong-Ku wo laa baptisen ampit em pebaptis e lewo’ sa reiy’ edong-Ku. ⁴⁰ Ta’an eng kapualitan rumuber witu esa nga weka lele’os-Ku ka’apa witu esa nga weka kawii-Ku, Niaku ku reiy’la hak meweweela nyi’a. Ni’itu e laa i weela wia se tou-tou wia si seiy e ni’itu neiy mouw i sadiala.” ⁴¹ Liminga e ni’itu se mapulu’ murid walina se mineupi’ wia si Yakobus wo si Yohanes. ⁴² Ta’an si Yesus si kimeret nisea laa o lumila’: “Kete’uan niouw, kaa nisea se patotoren pemerintah ne bangsa-bangsa se maperentah se rakyatna ampit e lawas wesi, wo se pemangko’-pemangko’na se makelangla eng kuasa nea ampit eng kaketena wia nisea. ⁴³ Reiy’ kouman tuana witu e nelet miouw. Seiy i te si pa’ar mamuali wangko’ witu e nelet miouw, satorona nisia si mamuali pelayanmu, ⁴⁴ wo seiy i te si pa’ar mamuali maketa-ketare witu e nelet miouw, satorona nisia si mamuali hamba em baya nea. ⁴⁵ Karengan si Oki’ ni Tou kangkasi si mineiy reiy’ o layanen, ta’an i te kaa melelayanla wo kaa laa meweweela e nyawa-Na mamuali sesuli’ wia se kelaker tou.” ⁴⁶ Laa o ma’ayo mola si Yesus wo se murid-murid-Na waki Yerikho. Wo eng katoroan si Yesus nu rumou’mi waki Yerikho, mewali-wali ampit se murid-murid-Na wo se tou kelaker se mareo-reok, wawean si mengengiwee rapa, si mekengaran Bartimeus, sioki’ ni Timeus, si rimuber witu li’ilik e lalan. ⁴⁷ Katoroan liningana, kaa Nisia mouw si Yesus tou Nazaret, o muleiy mouw sia maaleiy: “Yesus, Oki’ ni Daud, i koupus i tela niaku!” ⁴⁸ Laker tou se timogor nisia rio sia makapenes. Ta’an maka ente’ mola sia maaleiy: “Oki’ ni Daud, i koupus i tela niaku!” ⁴⁹ Laa o mena’ si Yesus wo lumila’: “Keretenomi sia!” Nisea se kimeretla sitou rapa i ti’i wo lumila’ wia nisia: “Ente’en e natemu, rumedeiy mouw, Nisia si makeret nikoo.” ⁵⁰ Laa o sia rumou’la eng karaiyna, nisia si makarengan rimedeiy wo mea matola si Yesus. ⁵¹ o wueiyen ni Yesus sia: “Sapa eng kepa’arannula siwong-Ku i wee nikoo?” Wingkot ni tou rapa i ti’i: “Rabuni, rio niaku ku toro lumoo’!” ⁵² Laa o pokeiy ni Yesus wia nisia: “Mea mouw, imanmu e limawirola nikoo!” Witu i te en toro ni’itu kangkasi limoo’ mouw sia, laa o sia kumi’it si Yesus witu em pakela-kelangan-Na.