¹ Yesus nu simampetola ampit en teturu’-Na i ti’i, mae mouw Sia rumou’mi waki Galilea wo i ka’ayome waki daerah Yudea waki e lewet en teberan Yordan. ² Tou ka’asa mareo-reok maki’i-ki’it Nisia wo Sia tu’u lume’osla nisea maname. ³ Takar meiy mouw wia Nisia se tou-tou Farisi kaa meiy mewewa’awa’ Nisia. Sea mueiy: “Sapa ku’a re’en, ni’i wee i te sitou tuma’atasla si ka’awuna ampit e nalasan sapa i te?” ⁴ Wingkot ni Yesus: “Reiy’ ku’a re’en winaca miouw, kaa Nisia si simiwola sitou rengan i te eng ketare simiwola nisea tuama wo wewene? ⁵ Wo nuwu’-Na: Kaa ni’itu si tuama si laa tumele’ula si ama’ wo si ina’na wo maesa ampit si ka’awuna, i ka’ayo sea nu rua i ti’i se minaesa le’ona. ⁶ Tuana mouw sea se reiy’ mouw kan i te kasi rua, ta’an se esa mouw. Kaa ni’itu, sapa em pinaesa mola ni Empung, reiy’ toro peta’atasen ni tou.” ⁷ pokeiy nea wia-Nisia: “Satuana, sapa re’en en timuana si Musa minerentala meela en surat cere sa sitou si tuma’atasla si ka’awuna?” ⁸ Pokeiy ni Yesus wia nisea: “Karengan eng kaketean e natemu si Musa si yimonla wia nikouw tuma’atasla si ka’awumu, ta’an rengan eng ketarean reiy’ tuana. ⁹ Ta’an Niaku lumila’me wia nikoo: Seiy i te si tima’atasla si ka’awuna, kacuali kaa en zinah, laa o sia kumaweng ampit si wewene walina, sia si simiwo mouw en zinah.” ¹⁰ Murid-murid i ti’i limila’ wia-Nisia: “Satuana eng kapualitanna em paato-atoan e nelet ne esa nga awu, eng kasa le’os e reiy’ kumaweng.” ¹¹ Ta’an laa Sia lumila’ wia nisea: “reiy’ em baya ne tou se toro mangarti em patotorela i ti’i, seiy i te sea nu kinarunia. ¹² Wawean sitou si reiy’ kekaweng karengan nisia memang minatou tuana witu e rahim ni ina’na, wo wawean sitou si siniwola tuana ne tou walina, wo wawean sitou si simiwo en tetouna tuana karengan eng kepa’aranna nuesa karengan eng Keraja’an Sorga. Seiy si toro mangarti satorona sia si mangarti.” ¹³ Laa se tou minali se oki-oki’ rintek wia si Yesus, rio Sia rumeta’la e lawas-Na witu e natas nea wo sumombayangla nisea; ta’an se murid-murid-Na makoupi’la se tou-tou i ti’i. ¹⁴ Ta’an si Yesus limila’: “Waya mola se oki-oki’ i ti’i, te’a mouw mengape-ngape’la nisea nu ma’aiy wia-Niaku; karengan se tou-tou tanu mouw i ti’i se makapunya eng Keraja’an Sorga.” ¹⁵ Laa o Sia rumeta’la e lawas-Na witu e natas nea wo kamurian Sia rumou’mi witu. ¹⁶ Wawean sitou mineiy wia si Yesus wo lumila’: “Guru, pasiwo-siwon le’os sapa re’en e lewo ’sa reiy’ siwo engku rio maka’ato patou-touan kekal?” ¹⁷ Wingkot ni Yesus: “Karengan en sapa ku’a re’en koo mawueiy wia-Niaku tanume sapa e le’os? Nesa i te e le’os. Ta’an sa koo pa’ar ghumorem witu eng gorem patou-touan, ki’itanola e reiy’ sa mina’asa em perenta ni Empung.” ¹⁸ Pokeiy ni tou i ti’i wia-Nisia: “Em perenta wisa?” Pokeiy ni Yesus: “Te’a mawunu’, te’a masiwo zinah, te’a marongkit, te’a matotorla en sairi towo, ¹⁹ paormatela si ama’mu wo si ina’mu wo keupusela si kasuat en toumu en tanukan en toumu nuesa.” ²⁰ Pokeiy ni taretumou i ti’i wia-Nisia : “ Em baya nyi’a i ti’i eng kini’itanku mouw, sapape’ kasi e reiy’ awes ?” ²¹ Pokeiy ni Yesus wia nisia : “ Sa koo pa’ar reiy’ si peroan, mea mouw, wangkerouw e reiy’ sa mina’asa kapunya’annu wo i wee mola i tu wia se tou-tou miskin, takar nikoo koo laa maka’ato eng harta waki sorga, kamurian meiy mouw wia nyi’i wo kumi’itouw Niaku.” ²² Katoroan si taretumou i ti’i liminga em patotorla i ti’i, mea mouw sia ampit en tekur, karengan eng kelaker eng hartana. ²³ Yesus minila’ wia se murid-murid-Na: “Niaku lumila’me wia nikoo, kaulitna eng kasa pedis wia sitou kaya sa laa megheghorem witu eng gorem Keraja’an Sorga. ²⁴ Mekasape’ kasi Niaku lumila’me wia nikouw, eng kasa wure’ si unta ghumorem tumoro em po’opotna wewilit ta’an i te si tou kaya ghumorem witu eng gorem Keraja’an ni Empung.” ²⁵ Katoroan se murid-murid liminga e ni’itu, kasa minaringka’ mouw sea wo lumila’: “Satuana, seiy re’en si toro neiy lawiren?” ²⁶ Yesus si timu’us wia nisea wo lumila’: “Wia sitou eng kapualitan yi’i e reiy’ wona’, ta’an wia si Empung em baya-waya e wona’.” ²⁷ Laa si Petrus miningkot wo lumila’ wia si Yesus: “Nikeiy yi’i keiy timele’u mouw em baya-waya wo kumi’it Nikoo; jadi sapa re’en e laa ka’atoan neiy?” ²⁸ Pokeiy ni Yesus wia nisea: “Niaku lumila’me wia nikouw, kaulitna witu e nedo pasiwoan sumeup, sa si Oki’ ni Tou rimuber waki takhta kamulia’an-Na, nikoo, si kimi’itouw Niaku, laa rumuber kangkasi witu e natas mapulu’ o rua takhta kaa laa ma’akimla se mapulu’ o rua suku ne Israel. ²⁹ Wo susur tou kaa e ngaran-Ku sia tumele’ula em balena, patuarina tuama ka’apa patuarina wewene, ama’ ka’apa ina’na, se oki-oki’ ka’apa e numana, si laa maka’ato sumeup e maka esa nga atus lumepet wo laa maka’ato em patou-touan kekal. ³⁰ Ta’an laker se tou kimetare se laa mamuali kamurian, wo se kamurian se laa mamuali kimetare.”