¹ Witu en toro ni’itu, witu e nendo Sabat, Yesus si makelang waki uma gandum. Kaa maarem, se murid-murid-Na se timipu’ e wulisna eng gandum wo kumaan nyi’a. ² Limoo’ ni’itu, lumila’ mouw se tou Farisi wia-Nisia: “Loo’onouw se murid-murid-Mu se masiwo sapa e reiy’ toro siwon witu e nendo Sabat.” ³ Ta’an wingkot ni Yesus wia nisea: “Reiy’ ku’a re’en winaca miouw sapa en tinuanala ni Daud, katoroan sia wo nisea se maki’i-ki’it nisia nu maarem, ⁴ kumura sia ghimorem witu eng gorem Wale ni Empung wo kumura sea kumaan e roti neiy i sakeiy reiy’ toro kaanen, le’os nisia ka’apa tu’u nisea se maki’i-ki’it nisia, kacuali se imam-imam? ⁵ Ka’apa reiy’ ku’a re’en winaca miouw witu eng kitab Taurat, kaa witu e nendo-nendo Sabat, imam-imam se limangkoiy e nukum Sabat witu eng gorem Bait ni Empung, ta’an se reiy’ simelok? ⁶ Niaku lumila’me wia nikoo: Wia nyi’i wawean si lumantouwla em Bait ni Empung. ⁷ Sa memang pangartian niouw e maksud nuwu’ yi’i: Neiy Ku i kepa’arla nyi’a mouw en tongkoupusen wo e reiy’ en sesempe, tantu kouw reiy’ mukum si tou reiy’la si selok. ⁸ Karengan si Oki’ ni Tou sia mouw si Tuhan witu e nendo Sabat.” ⁹ Sia nu rimou’ momi maname, Yesus si ghimorem witu e wale ibadat nea. ¹⁰ Witu wawean siesa tou minate esa nga weka lawasna. Nisea se minueiy wia-Nisia: “Toro ku’a re’en lume’osla tou witu e nendo Sabat?” Kepa’aran nea nyi’a mouw rio sea toro manginselokela Nisia. ¹¹ Ta’an si Yesus limila’ wia nisea:” Sa siesa tou witu e nelet miouw makapunya siesa domba wo si domba i ti’i si neiy i kalenta’ witu eng gorem eng ko’okor witu e nendo Sabat, reiy’ re’en sia si laa sumikop nisia wo rumou’mi nisia? ¹² Reiy’ ku’a sitou si kasa lumantouwla e narga ta’an si domba? Kaa ni’itu toro i te sumiwo le’os witu e nendo Sabat.” ¹³ Laa o pokeiy ni Yesus wia sitou i ti’i: “I uluri e lawasmu!” Wo sia mulurela e lawas, takar le’osouw e lawasna i ti’i wo mina segaya’ tanu e lawasna walina. ¹⁴ Laa o rumou’ mouw se tou Farisi i ti’i wo maasa’an kaa mewewunu’ Nisia. ¹⁵ Ta’an Yesus si mete’u e maksud nea laa o sumingkiri Laker tou se maki’i-ki’it si Yesus wo Sia lume’osla em baya nea. ¹⁶ Sia si kasa kete mepalouwla nisea sa makite’ula seiy Sia, ¹⁷ rio lekepouw e nuwu’ neiy i pa’ayola ni nabi Yesaya: ¹⁸ “Loo’onouw, si ti’i si Hamba-Ku si pineleng-Ku, si koupus-Ku, wia-Nisia imukur-Ku mepa’ar; Niaku ku laa rumeta’la e roh-Ku witu e natas-Na, wo sia si laa maki te’ula e nukum wia se bangsa-bangsa. ¹⁹ Sia si reiy’ laa mekekelong wo reiy’ laa rumekeiy wo se tou se reiy’ laa luminga en suara-Na wia e lalan-lalan. ²⁰ Tabelang repu’ en timalo’aiy reiy’ laa rangkuten-Na, wo en sumbu ke’erem layasna reiy’ laa wunu’un-Na, i ka’ayo Sia sumiwola e nukum i ti’i minuntung. ²¹ Wo wia-Nisia mouw se bangsa-bangsa laa ma’arap.” ²² Kamurian alinouw wia si Yesus siesa tou sinelaran ni setang. Tou i ti’i si rapa wo wowo’, laa o le’osla ni Yesus sia i ka’ayo si wowo’ i ti’i mengila-ngila’ wo maloo’. ²³ Takar ma’erangouw se pakasa’an ne tou kelaker i ti’i, pokeiy nea: “Sia yi’i sa reiy’ selok si Urang ni Daud.” ²⁴ Ta’an katoroan se tou Farisi liminga nyi’a, sea lumila’: “Ampit si Beelzebul, kokong ne setang, Sia mure’ se setang.” ²⁵ Ta’an si Yesus si mete’u eng genang nea, laa o lumila’ wia nisea: “Susur eng keraja’an e mina pete-pete’ tantu e mapuneng wo susur eng kota ka’apa e rumah tangga mina pete-pete’ e reiy’ laa tumaangla. ²⁶ Tuana mouw kangkasi sa si Iblis mure’ si Iblis, sia tu’u si mina wete-weteng wo mesaru en touna sandiri; kumura mouw eng keraja’anna toro tumaang? ²⁷ Jadi sa Aku mure’ si setang ampit eng kuasa ni Beelzebul, ampit eng kuasa ni seiy re’en se maki’i-ki’it nikoo mure’ nisia? Kaa ni’itu sea mouw se laa mamuali akimmu. ²⁸ Ta’an sa Aku mure’ si setang ampit eng kuasa Roh ni Empung, takar eng kaulitna eng Keraja’an ni Empug mineiy mouw wia nikoo. ²⁹ Ka’apa kumura mouw re’en sitou toro ghumoremla em bale ni tou ente’ wo kumaat eng harta bendana sa reiy’ i wa’akesnape’la ketare sitou ente’ i ti’i? Sa wina’akesna mola tare mouw i te toro sia rumampok em bale i ti’i. ³⁰ Seiy si reiy’ mewali-wali Niaku, sia si masu’usuk Niaku wo seiy si reiy’ minerurla mewali-wali Niaku, sia si metabuke’isla. ³¹ Kaa ni’itu Niaku lumila’me wia nikoo: e reiy’ sa mina’asa dosa wo nojat ne tou e laa ampungala, ta’an e nojat saru e Roh Kudus reiy’ laa ampungan. ³² Sakawisa sitou si matotorla wo’o sapa mapero si Oki’ ni Tou, sia si laa ampungan, ta’an sa sia mapero e Roh Kudus, sia si reiy’ laa ampungan, wia eng kaoatan yi’i reiy’, wo waki kaoatan e laa meiy tu’u reiy’. ³³ Sa esa nakana e lila’mula le’os, takar e le’os kangkasi em bu’ana; sa esa nakana e lila’mula reiy’ le’os, takar e reiy’ le’os kangkasi em bu’ana. Karengan witu em bu’ana nakana i ti’i eng kinasine’uan. ³⁴ Heiy kouw see’ ni leloiy biludak, kumura reken kouw toro tumotorla eng kapualitan-kapualitan le’os, kaulitna nikouw nuesa kouw lewo’? Karengan em patotorla en suma masegori witu e nate. ³⁵ Tou le’os si marou’mi eng kapualitan-kapualitan le’os witu em penu’utu-nu’utulanna le’os wo sitou lewo’ si marou’mi eng kapualitan-kapualitan lewo’ witu em penu’utu-nu’utulanna lewo’. ³⁶ Ta’an Niaku lumila’me wia nikoo: Susur en totor reiy’ si penoron neiy i totorla ni tou e lewo’ sa reiy pesa’anennala witu e nendo paakiman. ³⁷ Karengan i ki’it en totormu nikoo koo laa i ulitela, wo i ki’it en totormu kangkasi nikoo koo laa ukumen.” ³⁸ Witu e nedo ni’itu lumila’ mouw se pirala ahli Taurat wo se tou Farisi wia si Yesus: “Guru, keiy keiy pa’ar meleloo’ e nesa kowa wia-Nikoo.” ³⁹ Ta’an wingkot-Na wia nisea: “Angkatan lewo’ wo reiy’ lale’ yi’i se kasa makiwee e nesa kowa’. Ta’an wia nisea se reiy’ laa weean eng kowa’ ta’an i te eng kowa’ ni nabi Yunus. ⁴⁰ Karengan tanu si Yunus minena’ witu eng gorem po’ot ni sera’ telu nga endo telu nga wengi, tuana mouw kangkasi si Oki’ ni Tou si laa mena’ witu e rahim em bumi telu nga endo telu nga wengi. ⁴¹ Witu e nedo paakiman, se tou-tou Niniwe se laa tumo’or mewali se angkatan yi’i wo mukum nisea kangkasi. Karengan se tou-tou Niniwe i ti’i se mina kedo’ nu liminga mouw em paabarla ni Yunus, wo eng kaulitna em bia nyi’i e lumantouwla si Yunus! ⁴² Witu en toro paakiman, si ratu waki timu i ti’i si laa tumo’or ampit se angkatan yi’i wo sia si laa mukum nisea kangkasi. Karengan si ratu yi’i si waki tempok em bumi o meiy kaa melelinga eng hikmat ni Salomo, wo eng kaulitna em bia nyi’i e lumantouwla si Salomo!” ⁴³ “Sakawisa si roh lewo’ rumou’la wia sitou, sia tu’u lumepu waki tampa-tampa karesean mesesero paana’an. Ta’an sia si reiy’ minaka’ato nyi’a. ⁴⁴ Laa o sia lumila’: Niaku ku laa mareng waki wale e neiy mouw i tele’ukula i ti’i. Takar mea mouw sia wo matola em bale i ti’i reiy’ si sapa, weresi sinapuan wo wangun kinetetu’utul. ⁴⁵ Laa o sia rumou’la wo maruiy se pitu roh walina se lumantouwla eng kalewo’na wo sea ghumorem wo mena’ witu. Takar kamurian eng ka’ada’an ni tou i ti’i minaka wurukela ta’an eng ka’ada’anna ketare. Tuanakan kangkasi e laa mamuali wia se angkatan lewo’ yi’i.” ⁴⁶ Katoroan si Yesus masusuiye’ ampit se tou kelaker i ti’i, Ina’-Na wo se patuari-patuari-Na rimedeiy witu luar wo me’inakut ma’atola Nisia. ⁴⁷ Takar siesa tou limila’ wia-Nisia: “Loo’onouw, si ina’-Mu wo se patuari-patuari-Mu se witu luar wo me’inakut ma’ato Nikoo.” ⁴⁸ Ta’an wingkot ni Yesus wia sitou mina’ayola e nabar i ti’i wia-Nisia: “Seiy si ina’-Ku? Wo seiy se patuari-patuari-Ku?” ⁴⁹ Laa o pokeiy-Na, suat matudu’ waki se murid-murid-Na: “yi’i si ina’-Ku wo se patuari-patuari-Ku! ⁵⁰ Karengan seiy i te tu’u si masiwola eng kepa’ar ni Ama’-Ku waki sorga, sia mouw si patuari-Ku tuama, sia mouw si patuari-Ku wewene, sia mouw si ina’-Ku.”