¹ Witu mekasa e nendo Sabat, katoroan si Yesus nu makelang witu e numa gandum, se murid-murid-Na se timipu’ e wulisna eng gandum wo kumaan nyi’a, kasuatan nisea nu mapisul nyi’a ampit e lawas nea. ² Ta’an se pirala tou Farisi se limila’: “Ka’a kouw masiwo sapa e reiy’ i wee siwon witu e nendo Sabat?” ³ Laa o wingkoten ni Yesus sea: “Reiy’ ku’a re’en winaca miouw sapa en tinuanala ni Daud, katoroan nisia wo nisea se maki’i-ki’it nisia nu maarem, ⁴ o kumura nisia nu ghimorem witu eng gorem e Wale ni Empung wo medo e roti sesakeiyan, laa o kumaan nyi’a wo meela nyi’a wia se maki’i-ki’it nisia, eng kaulitna e roti i ti’i e reiy’ toro kaanen nea kacuali se imam-imam?” ⁵ Pokeiy ni Yesus kasi wia nisea: “Si Oki ni Tou nyi’a mouw si Tuhan witu e nendo Sabat.” ⁶ Witu mekasa e nendo Sabat walina, Yesus si ghimorem witu e wale ibadat, laa o mee teturu’. Witu wawean sitou minate e lawas lele’osna. ⁷ Se ahli-ahli Taurat wo se tou-tou Farisi se menegha-negha’la si Yesus kaa wo’o wona’ Sia lume’osla tou witu e nendo Sabat, rio sea maka’ato to’otolan kaa laa manginselokla Nisia. ⁸ Ta’an Nisia si mete’u eng genang nea, laa o lumila’ wia sitou minate e lawasna i ti’i: “Tumo’orouw wo rumedeiy mouw witu nuner!” Takar tumo’orouw sitou i ti’i wo rumedeiy. ⁹ Laa o lumila si Yesus wia nisea: “Niaku ku mueiyme wia nikouw: Wisa ku’a re’en e ni’i wee i te witu e nendo Sabat, sumiwo le’os ka’apa sumiwo lewo’, lumawirla e nyawa nitou ka’apa mepepunengla nisia?“ ¹⁰ Nu reiy’ mouw i tu Sia tumu’use eng kaledong wia nisea nu waya, laa o lumila’ wia sitou rara’an i ti’i: “I yayatola e lawasmu!” sitou i ti’i si simiwo en tuana wo mina le’osouw e lawasna. ¹¹ Takar tu sumegoa’ mouw e nupi’ nea, laa o sea rumunding, sapa ku’a e laa tuanan nea wia si Yesus. ¹² Witu e nedo ni’itu mea mouw si Yesus waki kentur kaa mea mesesombayang wo esa nga wengi-wengian Nisia masombayang wia si Empung. ¹³ Katoroan e nendo oat, Sia kumeret se murid-murid-Na meiy wia-Nisia, laa o meleng witu e nelet nea se mapulu’ o rua tou, se patotoren-Na rasul: ¹⁴ Simon kangkasi si wineean-Na ngaran Petrus, wo si Andreas patuari ni Simon, si Yakobus wo si Yohanes, si Filipus wo si Bartolomeus, ¹⁵ si Matius wo si Tomas, si Yakobus urang ni Alfeus, wo si Simon si patotoren tou Zelot, ¹⁶ si Yudas urang ni Yakobus, wo si Yudas Iskariot eng kamurian si minamuali pengkhianat. ¹⁷ Laa o Sia tumumpa ampit nisea wo mena’ witu e nesa tampa patar: witu se minerur se ka’asa’an waki se murid-murid-Na wo kelaker se tou walina mineiy se waki minapkasa Yudea wo waki Yerusalem wo waki daerah pante Tirus wo en Sidon. ¹⁸ Nisea se mineiy kaa meiy melelingala Nisia wo kaa laa pelele’osela witu rumara nea; o kangkasi nisea se sinelaran ne roh-roh lewo’ se maka’ato eng kale’osan. ¹⁹ Wo em baya ne tou kelaker i ti’i se me’inakut meleleler Nisia, karengan wawean eng kuasa rime’umi wia-Nisia wo em baya ne tou i ti’i se line’os-Nala. ²⁰ Laa o tumu’use si Yesus wia se murid-murid-Na wo lumila’: “Ma’aruiyola, heiy kouw si miskin, karengan nikouw mouw si makapunya eng Keraja’an ni Empung ²¹ Ma’aruiyola, heiy kouw en teakan i yi’i maarem, karengan nikouw kouw laa pakateu-teunla. Ma’aruiyola, heiy kouw en teakan i yi’i maame’, karengan nikouw kouw laa kume’eke’. ²² Ma’aruiyola kouw, sa eng karengan si Oki’ ni Tou se tou mari’irisla nikouw, wo sa sea sumea’la nikouw, wo masero’la nikouw ma’an sumede’la e ngarannu tanume e nesa e lewo’. ²³ Mepa’a-pa’arola witu e nedo ni’itu wo lumaya-laya’ mouw, karengan eng kaulitna, en tetoromu wangko’ waki sorga; karengan eng kenaramen tuana kangkasi se nene moyang nea se minatuana mola em baya se nabi ²⁴ Ta’an cilaka mouw kouw, heiy kouw nu kaya, kaa witu eng kekaya’annu kouw minaka’ato mola em pangiborannu. ²⁵ Cilaka mouw kouw, en teakan i yi’i wesu, karengan nikouw make’eke’ karengan nikouw kouw laa mengasi’ wo mame’. ²⁶ Cilaka mouw kouw, sa em baya ne tou se malo’or nikouw; karengan eng kenaramen tuana kangkasi se nene moyang nea se minatuana mola se nabi-nabi palsu.” ²⁷ “Ta’an wia nikouw, si malingala Niaku, Niaku ku lumila’: I keupusla si kesarumu, sumiwo mouw le’os wia se tou mari’iris nikoo; ²⁸ kumiwee mouw em berkat i wee sitou makutok nikoo; sumombayangola i wee se tou maabut nikoo. ²⁹ Seiy i te si sumepe’ eng keremu esa, i weela kangkasi wia nisia eng keremu walina, wo seiy i te si medo eng karaiymu, i waya mola kangkasi sia medo e labungmu. ³⁰ Weeala wia se susur tou makiwee wia nikoo; wo te’a mouw pakiween sumeup wia sitou si minedo eng kapunya’annu. ³¹ Wo kumura eng kepa’ar miouwla rio siwon ne tou wia nikoo, sumiwo mouw kangkasi en tuana wia nisea. ³² Wo sa kouw meupusla sitou si meupusla nikouw, sapa ku’a re’en en tetoromu? Karengan se tou-tou berdosa tu’u se mineupusla kangkasi se tou-tou meupusla nisea. ³³ Karengan sa koo masiwola e le’os wia se tou masiwola le’os wia nikoo, sapa ku’a re’en en tetoromu? Se tou-tou berdosa tu’u se masiwo en tuana. ³⁴ Wo sa wona’ kouw meela pinjangan wo’o sapa wia sitou, karengan kouw ma’arapla laa maka’ato sapa wia nisia, sapa ku’a re’en en tetoromu? Se tou-tou berdosa tu’u se mineela pinjangan wia se tou-tou berdosa, rio sea maka’atola sumeup masuat eng kelaker. ³⁵ Ta’an nikouw, i keupusla si kesarumu wo sumiwo mola le’os wia nisea wo pinjangala ampit e reiy’ ma’arapla suli’an, takar en tetoromu e laa wangko’ wo nikouw kouw laa mamuali oki’-oki’ ni Empung Si Kasarakek, karengan nisia si le’os wia se tou-tou reiy’ mete’u en taruma kase wo wia se tou-tou lewo’. ³⁶ Satorona kouw mura ate, masuat tanu si Amamu si mura ate.” ³⁷ “Te’a mouw koo maakimla, takar nikouw tu’u kouw reiy’ laa akimen. Wo te’a mouw kouw meukum, takar kouw tu’u kouw reiy’ laa ukumen; ampunganola wo kouw laa ampungala. ³⁸ Meela wo kouw laa weean: e nesa peukuran le’os, neiy i ransakla, neiy i oghe wo en timoa’ kimaluar e laa i wu’uwusla witu em pinalarmu. Karengan em peukuran pepaken niouw peukur, e laa i ukurla wia nikoo.” ³⁹ Yesus si limila’la kangkasi e nesa peulurla wia nisea: “Toro ku’a re’en sitou rapa rumawir sitou rapa? Reiy’ ku’a re’en nisea nu rua se laa i kawu’uwu’ witu eng ko’okor? ⁴⁰ Siesa murid si reiy’ lumantouwla wia si guruna, ta’an seiy i te si kimawusola witu em petete’unna si laa masuat ampit si guruna. ⁴¹ Ka’a ku’a re’en nikoo koo limoo’ e lele’esek witu em beren ni patuarimu, kasuatan em bangin witu em berennu nuesa e reiy’ kakete’uannula? ⁴² Kumura mouw ku’a re’en koo toro lumila’la wia si patuarimu: Patuari, i waya mola niaku ku rumou’la e lele’esek witu em berennu, awesla em bangin witu em berennu e reiy’ paloo’onnu? Heiy tou munafik, i rou’ pe’la rior em bangin witu em berennu, takar koo laa lumoo’ ampit e makaloo’o-loo’ola kaa laa merereu’la e lele’esek i ti’i witu em beren ni patuarimu.” ⁴³ “Karengan e reiy’la si akana le’os si mawua’la wu’ana reiy’ le’os, wo kangkasi reiy’la si akana reiy’ le’os si mawua’la wu’ana le’os. ⁴⁴ Karengan susur e nakana eng kasine’uan witu em bu’ana. Karengan waki kongkom tetunean sitou si reiy’ tumipu’ em bu’ana ara wo waki en tetune-tetune si reiy’ tumipu’ em bu’ana nanggor. ⁴⁵ Sitou le’os si rumeu’mi em barang le’os witu em penu’utu-nu’utulan e natena le’os wo sitou lewo’ si rumeu’mi em barang lewo’ witu em penu’utu-nu’utulanna lewo’. Karengan ni’i patotorla en sumana, masegori witu natena.” ⁴⁶ Ka’a ku’a kouw maaleiy wia-Niaku: Tuhan, Tuhan, eng keulitna kouw reiy’ masiwola sapa em peila’-Kula? ⁴⁷ Susur tou si mineiy wia-Niaku si limingala em patotor-Ku ma’an simiwola nyi’a – Niaku ku laa mapaloo’ola wia nikoo ampit si seiy sia toro i panginsuatla -, ⁴⁸ nisia si masuat ampit siesa tou rimedeiyla wale: Sitou i ti’i si kimiar e rimare-rarem wo rumeta’la en teto’otolanna witu natas em batu. Katoroan mineiy e rano ampuan wo en songker en timoro em bale i ti’i, em bale i ti’i e reiy’ mete’u kaoghean, karengan em bale i ti’i en te’etep kinereredeiy. ⁴⁹ Ta’an seiy i te si liminga em patotor-Ku, ta’an si reiy’ masiwola nyi’a, nisia si masuat ampit siesa tou rimedeiyla wale witu natas en tana reiy’ si teto’otolan. Katoroan en songker timoromi nyi’a, em bale i ti’i makarengan i kakolo’ wo hebatouw eng katerianna.”