¹ Ta’an e memo’odope’ kasa witu e nendo kasa ketare duminggu ni’itu sea mea waki kubur minaali e rampa-rampa en sinadia nea mola. ² Aton neala em batu minolonomi waki kubur i ti’i, ³ wo sea nu ghimoremola se reiy’ minatola e mayat ni Tuhan Yesus. ⁴ Kasuatan nisea nu rimedeiy meneku-nekur karengan eng kapualitan i ti’i, i kalo’ositi wawean se rua tou rimedeiy witu en tawi nea se minake labung masena’. ⁵ Nisea se kasa kineide’an wo tumu’utuk, ta’an se rua tou i ti’i se limila’ wia nisea: “Ka’a kouw menero Nisia si matou-tou, witu e nelet ne tou minate? ⁶ Nisia si reiy’ wia nyi’i, Nisia si timo’orouw. Ghenangenouw sapa neiy mouw i lila-Nala wia nikouw, eng katoroan Nisia nu wakipe’ Galilea, ⁷ nyi’a i ti’i kaa si Oki’ ni Tou si lewo’ sa reiy’ i sarakan witu e lawas ne tou-tou berdosa wo i salibla, wo laa tumo’or witu e nendo katelu.” ⁸ Takar i kaghenangouw sea e lelila’an ni Yesus i ti’i. ⁹ Wo sea nu minarengomi waki kubur, i susuiy neala em baya nyi’a i ti’i wia se mapulu’ o esa murid wo wia em baya se patuari walina. ¹⁰ Se wewene-wewene i ti’i nyi’a mouw si Maria waki Magdala, wo si Yohana, wo si Maria ina’ ni Yakobus. Wo se wewene-wewene walina kangkasi se mewali-wali ampit nisea se minakite’ula nyi’a wia se rasul-rasul. ¹¹ Ta’an i wee nisea e lelila’an-lelila’an i ti’i en tanu i te e wela’awa’ wo nisea se reiy’ ma’emanla se wewene-wewene i ti’i. ¹² Ma’anouw tu’u tuana Petrus si timo’or, laa o mario-rior mea waki kubur i ti’i. Katoroan nisia nu lumalesla witu eng gorem, sia lumoo’ e roko’ kafan i te. Laa o sia mea, wo sia mawueiy witu natena e wo’o sapa wona’ minamulila. ¹³ Witu e nendo i ti’i kangkasi se rua wia se murid-murid ni Yesus se minea waki e nesa wanua mekengaran Emaus, e rimeta’ wo’o wona’ pitu mil eng kewa’akatna waki Yerusalem, ¹⁴ wo nisea se menusu-nusuiy tanume e reiy’ sa mina’asa wo’o sapa e minamuali mola. ¹⁵ Katoroan sea nu menusu-nusuiy wo memero-meroan, meiy mouw si Yesus nuesa tumawimi nisea, laa o kumelang mewali-wali ampit nisea. ¹⁶ Ta’an wawean wo’o sapa eng kimelungla em beren nea, i ka’ayo sea reiy’ sumine’ula Nisia. ¹⁷ Yesus si limila’ wia nisea: “Sapa ku’a re’en em pesesusuiyen niouw katoroan nikouw nu makelang?” Takar mena’ mouw sea ampit eng gio simebut. ¹⁸ Siesa wia nisea, e ngaranna Kleopas, si miningkot-Nisia: “Sapa ku’a re’en Nikoo koo maesa-esa tou wo’oseiy wia Yerusalem, o reiy’ mete’u e minamualila wia nyi’i wia e nendo-nendo mamuri i yi’i?” ¹⁹ Pokeiy-Na wia nisea: “Sapa ku’a re’en e ni’itu?” Wingkot nea: “Sapa e minamuali ampit si Yesus tou Nazaret. Nisia nyi’a mouw siesa nabi, si wawean kuasa witu em pepa’ayangen wo e lelila’an witu en sinaru ni Empung wo witu en sinaru ne minapekasa bangsa meiy. ²⁰ Ta’an se imam-imam kepala wo se pa-aka-aka’an - pa’aka-aka’an neiy se simarakanola Nisia kaa si ukumen paten wo nisea se simalibola-Nisia. ²¹ Eng kaulitna nikeiy eng ketareanna keiy maarapla, kaa Nisia mouw si mineiy kaa meiy mewewayala se bangsa Israel. Ta’an kasuatan e ni’itu limangkoiy mouw en telu nga endo, rengane’ em baya nyi’a i ti’i minamualila. ²² Ta’an se pirala wewene wia en suat meiy se limo’ositola nikeiy: Memo’odope’ kasa se mineamomi waki kubur, ²³ wo se reiy’ minatola e mayat-Na. Laa o sea meiy ampit e nabar, kaa kinaloo’anouw wia nisea se malaikat-malaikat, se limila’la, kaa Nisia si timou. ²⁴ Wo se pirala ka’ampit meiy se minea momi waki kubur i ti’i wo matola, kaa memang ulit neiy i lila’la ne wewene-wewene i ti’i, Ta’an Nisia si reiy’ linoo’ nea.” ²⁵ Laa o Sia lumila’ wia nisea: “Heiy kouw tou we’engel, kumura eng kaetipna e natemu, i ka’ayo kouw reiy’ ma’eman e reiy’ sa mina’asa wo’o sapa’, neiy mouw i lila’la em baya ne nabi! ²⁶ Reiy’ ku’a re’en si Mesias si lewo’ sa reiy’ peme’itan em baya nyi’a i ti’i kaa si laa megheghorem witu eng kamulia’an-Na?” ²⁷ Laa o Sia makite’ula wia nisea sapa neiy i kepatik en tanume Nisia witu e minapekasa eng Kaol Suci, muleiymi waki eng kaol-kaol ni Musa wo e reiy’ sa mina’asa eng kaol ne nabi-nabi. ²⁸ Nisea se metawi mola em banua pela’an nea, laa o Sia sumiwo en tanu mokan si mapawee-weela em pakela-kelangan-Na. ²⁹ Ta’an nisea se kasa mase’esek-Nisia, pokeiy nea: “Mena’ mola mewali-wli ampit nikeiy, karengan e nendo melelaa mouw wengi wo siendo si tawi mouw tumenem.” Laa o ghumoremouw Sia kaa laa ma’ena’ mewali-wali ampit nisea. ³⁰ E nedo Sia nu rimuber mekaan ampit nisea, Sia medo roti, tumotor berkat, Laa o mengebi-ngebi’la nyi’a wo meela nyi’a wia nisea. ³¹ Katoroan e ni’itu mawuka’ mouw em beren nea wo sea tu’u sumine’u Nisia, ta’an Nisia si minere’i witu eng keuneran nea. ³² Pokeiy nea siesa wia se walina: “Reiy’ ku’a re’en nateta e melaya-layas, katoroan Nisia nu mesesusuiy ampit nikita witu nuner e lalan wo eng katoroan Sia nu minitarla eng Kaol Suci wia nikita?” ³³ Laa o tumo’orouw sea wo mapawee-wee minareng waki Yerusalem. Witu o sea matola se mapulu’ o esa murid i ti’i. Nisea se kasuatan minerur mewali-wali ampit se ka’ampit-ka’ampit nea. ³⁴ Pokeiy’ nea i ti’i: “Eng kaulitna si Tuhan si timo’orouw wo si minapa’ato mola en tou wia si Simon.” ³⁵ Laa o susuiyla tu’u ne rua tou i ti’i sapa minamuali witu nuner e lalan wo kumura sea simine’u Nisia witu e nedo Sia nu mengebi-ngebi’la e roti. ³⁶ Wo eng kasuatan nisea nu menusu-nusuiy tanume eng kapualitan-kapualitan i ti’i, i kasenge’mi si Yesus si rimedeiy mouw witu eng keuneran nea wo lumila’ wia nisea: “Dame sejahtera i wee nikouw!” ³⁷ Nisea se neiy i kasenge’ wo meide’ wo mapokeiyla kaa nisea se limoo’ mengengide’. ³⁸ Ta’an Nisia si limila’ wia nisea: “Ka’a kouw i kasenge’ wo sapa eng karenganna tu lumentut eng kalikokoan witu eng gorem e nate miouw? ³⁹ Loo’onouw e lawas-Ku wo e ne’a-Ku; Niaku mouw nuesa ku yi’i; pedamenouw Niaku wo loo’onouw, karengan si mengengide’’ si reiy’la le’ona wo ruiyna, tanu e linoo’ miouw wawean wia-Niaku.” ⁴⁰ Kasuatan meila’ tuana, Sia mapaloo’la e lawas wo e ne’a-Na wia nisea. ⁴¹ Wo eng katoroan nisea nu reiy’pe’ ma’eman karengan eng kepa’a-pa’aran nea wo ma’erange’, o lumila’ mouw Sia wia nisea: “Wawean ku’a kekaanen kouw wia nyi’i?” ⁴² Laa o sea meela wia Nisia esa nga ketor sera’ ginoreng. ⁴³ Sia medola nyi’a wo kumaan nyi’a witu en sinaru em beren nea. ⁴⁴ Sia lumila’ wia nisea: “Nyi’i mouw e lelia’ang-Ku, neiy-Ku i lila’la wia nikouw eng katoroan Niaku nu mewali-walipe’ ampit nikouw, nyi’a i ti’i kaa e lewo’ sa reiy’ linekepla em baya neiy i kepatik en tanume Niaku witu eng kaol en Taurat ni Musa wo eng kaol ne nabi-nabi wo eng kaol e Mazmur.” ⁴⁵ Laa o Sia muka’ eng genang nea, i ka’ayo sea mangarti eng Kaol Suci. ⁴⁶ Pokeiy-Na wia nisea: “Wawean neiy i kepatik en tuana: Mesias si lewo’ sa reiy’ peme’itan wo tumo’or witu e nelet ne tou minate witu e nendo katelu, ⁴⁷ wo kasi: witu e ngaran-Na e nabar tanume em pakedo’an wo em paampungan en dosa e lewo’ sa reiy’ i pa’ayola wia se reiy’ sa mina’asa bangsa, muleiymi waki Yerusalem. ⁴⁸ Nikouw mouw kouw sairi witu em baya nyi’a i yi’i ⁴⁹ Wo Niaku ku laa mapa’alime wia nikoo sapa neiy i ta’arla ni Ama-Ku. Ta’an nikouw kouw lewo’ sa reiy’ mena’ wia eng gorem eng kota i yi’i i ka’ayo kouw lekepela ampit eng kakuasa’an waki tampa rakek. ⁵⁰ Laa o alin ni Yesus sea waki luar kota i ka’ayo en tawi Betania. Witu Sia mayatla e lawas-Na wo merkatla nisea. ⁵¹ Wo eng katoroan Nisia nu maberkatla nisea, Sia tumampas wia nisea wo ka’adetane waki Sorga. ⁵² Sea maongkot wo sumempe wia-Nisia, laa o sea mareng waki Yerusalem ampit eng kasa mepa’a-pa’ar. ⁵³ Nisea se reiy’ maena-ena’ witu eng gorem em Bait ni Empung wo malo’orla si Empung.