¹ Yesus si limila’ wia se murid-murid-Na: “Reiy’ wona’ o reiy’ laa wawean em pangaseseipan, ta’an cilaka mouw sitou masiwola nyi’a. ² Sapa tare e lebe le’os wia nisia sa e nesa watu kilangan ni’i wa’akesla witu lee’na, laa o sia i lawala witu eng gorem en tasik, ta’an i te sa sia sumeipla si meta’asa’an wia se tou-tou lewea’ i yi’i. ³ Tayuranouw en toumu! Sa si patuarimu simiwo en dosa, togorenouw sia, wo sa sia menesel, ampunganola sia. ⁴ Awes tare sa sia sumiwo dosa wia nikoo makapitu esa nga endo wo makapitu sia marengi wia nikoo wo lumila’: Niaku ku menesel, nikoo koo lewo’ sa reiy’ mampungla nisia.” ⁵ Laa o pokeiy ne rasul-rasul i ti’i wia si Tuhan: “Awesala e iman neiy!” ⁶ Wingkot ni Tuhan: “Sa wona’na kouw makapunyala iman kasela e watuna en sesawi, nikouw kouw toro lumila’la wia e nakana ara i yi’i: Mesawutola koo wo i ketanemola witu eng gorem en tasik, wo nisia si laa lale’ wia nikoo.” ⁷ “Seiy si witu nelet miouw si makapunya siesa hamba mepajeko ka’apa merawirla se ternak i wee nisia, si laa lumila’ wia si hamba i ti’i, nisia nu minarengomi waki uma: Meiy o makarenganouw kumaan! ⁸ Reiy’ ku’a re’en eng kapurikitna nisia si laa lumila’ wia si hamba i ti’i: Sadianola eng kekaanengku. Wa’akesenouw e rereenannu wo layanenola niaku i ka’ayo ku sumampet mekaan wo makoo’. ⁹ Sapa ku’a re’en nisia si timarumakasekan wia si hamba i ti’i, karengan si hamba i ti’i si simiwo mola sapa neiy i lukarla wia nisia? ¹⁰ Tuana mouw kangkasi nikouw. Sakawisa kouw simiwo mola e reiy’ sa mina’asa wo’o sapa neiy i lukarla wia nikoo, satorona kouw lumila’: Nikeiy mouw keiy hamba-hamba reiy’ sika’ara’an; nikeiy keiy matuana i tela sapa e lewo’ sa reiy’ tuanan neiy ¹¹ Witu em pakela-kelangan-Na mea waki Yerusalem Yesus si simusu em pasupuan Samaria wo eng Galilea. ¹² Katoroan Nisia nu maghoremla e nesa desa o meiy mouw se mapulu’ tou kusta meiy matola Nisia. Nisea se minena’ rimedeiy wa’akatla ¹³ wo rumekeiy: “Yesus, Guru, i keupus i tela keiy!” ¹⁴ Laa o Sia tumu’use nisea wo lumila’: “Mea mouw, i papa’ato mola en toumu wia se imam-imam.” Wo eng kasuatan nisea nu witu nuner e lalan nisea se minalenasouw. ¹⁵ Siesa wia nisea, eng katoroan nisia nu limoo’ola kaa nisia si le’osouw, o mareng kasuatan malo’orla si Empung ampit en suara kalegu’, ¹⁶ laa o i kasungkur witu en sinaru ne’a ni Yesus wo matotor syukur wia-Nisia. Sitou i ti’i nyi’a mouw siesa tou Samaria. ¹⁷ Laa o lumila si Yesus: “Reiy’ ku’a se mapulu’ tou eng ketare em baya nea se mina lenasouw? ¹⁸ Reiy’la ku’a re’en witu e nelet nea si minareng kaa melelo’orla si Empung ta’an i te sitou wo’oseiy i yi’i?” ¹⁹ Laa o Sia lumila’ wia sitou i ti’i: “Rumedeiy mouw wo mea mouw, imanmu e limawirola nikoo.” ²⁰ Witu wewueiyen ne tou-tou Farisi, sakawisa eng Keraja’an ni Empung laa meiy, Yesus si miningkot, pokeiy-Na: “Eng Keraja’an ni Empung e meiy reiy’ ampit eng kowa’-kowa’ paloo’ola. ²¹ O kangkasi sitou si reiy’ mete’u lumila’la: Loo’on, sia si wia nyi’i ka’apa sia si waki ti’ime! Karengan eng kaulitna eng Keraja’an ni Empung witukan e nelet miouw.” ²² Wo Sia lumila’ wia se murid-murid-Na: “Laa meiy e nedona kouw pa’ar meleloo’ e nesa witu e nendo-nendo ni Oki’ ni Tou i ti’i wo nikouw kouw reiy’ laa lumoo’ nyi’a. ²³ Wo se tou se laa lumila’ wia nikoo: Loo’on, sia si waki ti’ime; loo’on, sia si wia nyi’i! Te’a kouw mea witu, te’a kouw kumi’it. ²⁴ Karengan masuat tanu eng kerap rimesiki waki tempok e langit esa mea waki tempok e langit walina, tuana mouw kangkasi ee sangari eng kapualitanna si Oki’ ni Tou witu e nendo ke’e eiy-Na. ²⁵ Ta’an Nisia si lewo’ sa reiy’ mesa’an laker peme’itan wo i sede’ ne angkatan i yi’i. ²⁶ Wo masuat tanu e minamuali witu en zaman ni Nuh, tuana mouw kangkasi eng kapualitanna ee sangari witu e nendo-nendo ni Oki’ ni Tou: ²⁷ nisea se kumaan wo kumoo’, nisea se kumaweng wo i kawengla, i ka’ayo witu e nendo ni Nuh ghumorem witu eng gorem em bahtera, laa o meiy mouw e rano ampuan wo munengla em baya nea. ²⁸ Tuanakan kangkasi tanu e minamuali witu en zaman ni Lot: nisea se kumaan wo kumoo’, nisea se mateles wo mewangker, nisea se metanem wo mebangun. ²⁹ Ta’an witu e nendo si Lot nu rumou’mi waki Sodom tu tumumpa mouw e naro napi wo e naro balelang waki langit wo munengla em baya nea. ³⁰ Tuana mouw eng kapualitanna ee sangari witu e nendo, witu e wisa si Oki’ ni Tou mapa’atola en tou-Na. ³¹ Seiy i te si witu e nendo ni’itu si kasuatan witu em paroisan witu natas em bale wo em barang-barangna witu eng gorem em bale, te’a mouw sia metetumpa kaa meiy ma’edo nyi’a, wo tuanakan kangkasi sitou si kasuatan waki uma, te’a mouw sia mewewarengi. ³² Ghenangenola si ka’awu ni Lot! ³³ Seiy i te si me’inakut mepepiara e nyawana, nisia si laa kaliongan e nyawana, wo seiy i te si kaliongan e nyawana, sia si laa lumawirla nyi’a. ³⁴ Niaku ku lumila’me wia nikoo: Witu e wengi ni’itu wawean se rua tou witu natas e nesa tetekelan, siesa si laa paalin wo siesa si laa i tele’ula. ³⁵ Wawean se rua wewene se mewali-wali matibe, siesa si laa paalin wo siesa si laa i tele’ula.” [ ³⁶ Sa wawean rua tou waki uma, siesa si laa paalin wo siesa si laa i tele’ula.] ³⁷ Pokeiy nea wia si Yesus: “Waki wisa, Tuhan?” Pokeiy-Na wia nisea: “Waki wisa wawean mayat, witu e winuyutan ne burung nasar.”