¹ Waki si Yudas, hamba ni Yesus Kristus wo si patuari Yakobus, wia nisea, se kinakeretan, se i koupusla witu si Ama’ Empung, wo se piniara i wee si Yesus Kristus. ² E rahmat, en dame sejahtera wo e nupus satorona e lumokonla nikouw. ³ Patuariku waya i koupus, kasuatan niaku nu kasa uli-ulit me’inakut mepepatikla wia nikouw tanume eng kelawiran ta nu waya, niaku ku mapedam palupuan kaa laa mepepatikla nyi’i wia nikouw wo ngume’enge’la nikouw, rio kouw minena-ena’ me’inakut mangintaangla e iman neiy mouw i pa’ayola wia se tou-tou kudus. ⁴ Karengan neiy kaloo’ala wawean se tou neiy i ketantu se ghimoremouw simori’isip witu eng keuneran nikouw, nyi’a i ti’i se tou-tou ure mouw neiy i tantula kaa laa pe’ukumen. Nisea nyi’a mow se tou-tou fasik, se maselok mepakela e nupus karunia ni Empung ta kaa laa metetuyula en serit nea, wo se simangkal si maesa-esa Penguasa wo si Tuhan ta, Yesus Kristus. ⁵ Ta’an, ma’anouw tu’u kouw minete’u mola em baya nyi’a i ti’i wo reiy’ mouw wareng witu nyi’a kasi, niaku ku pa’ar mapaghenangla nikouw kaa memang Tuhan si limawirla se umat-Na waki tana’ Mesir, ta’anouw mekasape’ kasi minunengla nisea nu reiy’ ma’eman. ⁶ Wo kaa Nisia si timaang se malaikat-malaikat reiy’ lale’ witu em pa’apasan-pa’apasan eng kakuasa’an nea, ta’an se timele’ula en tampa paana’an nea, ampit en torongku abadi witu eng kaoatan karibe’ebengan i ka’ayola em paakiman witu e nendo wangko’, ⁷ masuat tanu en Sodom wo eng Gomora wo eng kota-kota kaledongna, ampit eng kenaramen masuat se matuanala em pesa’amekan wo mekeki’it eng kateuan – kateuan e reiy’ waar, en timanggongouw en siksa’an e napi kekal en teume e nge’enge’ wia em baya ne tou. ⁸ Ma’anouw tuana se tou-tou mengipi-ngipi e nyi’i kangkasi se makewurla e nouwak nea wo masero’ eng kakuasa’an ni Empung ampit maojat em baya e mulia waki sorga. ⁹ Ta’an si kokong ne malaikat, Mikhael, katoroan witu e nesa pesali’isi’an si mine’ising ampit si Iblis tanume e mayat ni Musa, si reiy’ berani ma’akimla si Iblis i ti’i ampit e lelila’an-lelila’an maojat, ta’an si limila’: “Satorona si Tuhan si rumekak nikoo!” ¹⁰ Ta’an laa nisea se maojat e reiy’ sa mina’asa wo’o sapa e reiy’ kete’uan neala wo awes tare sapa eng kete’uan neala ampit e nalurina tanu si tekapen reiy’ siakal, ni’itu mouw e minua’la eng kapunengan nea. ¹¹ Cilaka mouw nisea, karengan nisea se kimi’itla e lalan kinelangani ni Kain wo karengan nisea, kaa en tetoro, se timelebu’la en tou witu eng kaseipan ni Bileam, wo sea mapuneng karengan eng kadurhaka’an tanu eng Korah. ¹² Nisea i yi’i mouw se sering witu em pesakeiyan e nupusmu, witu e wisa nisea se reiy’ meira-irang malo’omot wo me’ukum i te en touna nuesa; Nisea se tanu mokan e linaak reiy’ sirano, limangkoiy sinengo reghes; nisea se tanu mokan e nakana-nakana witu noras mera’aragh reiy’ mawua’la wu’ana, e nakana-nakana minesawut ampit e namut-namutna wo eng kasa mouw minate. ¹³ Nisea se tanu mokan em balolongan en tasik lela’, masewumi e mekeirangen nea nuesa; nisea se tanu mokan se sumesena’-sumesena’ kaa wia nisia en sadia mouw en tampa waki kaoatan karibe’ebengan i wee eng keure-urena. ¹⁴ O kangkasi tanume nisea si Henokh, si see’ kapitu waki si Adam, si minenti’ mouw, pokeiyna: “Eng kaulitna si Tuhan si mineiy ampit se manga riwu-riwu tou kudus-Na, ¹⁵ laa ma’akimla em baya ne tou wo meweweela ukuman wia se tou-tou fasik karengan em baya em pasiwo-siwon fasik, en tinuana neala wo karengan em baya e lelila’an-lelila’an nista, neiy i totorla ne tou-tou makadosa fasik i ti’i wia si Tuhan.” ¹⁶ Nisea i ti’i se tou-tou mangu’ungul wo menga’angal tanume e mérot nea, se matou-tou maki’itla en serit nea, ta’an en suma nea marou’mi e lelila’an-lelila’an e reiy’-reiy’ wo nisea se masila’ sitou kaa laa maka’ato ka’untungan. ¹⁷ Ta’an nikouw patuariku waya i koupus, ghenangenola sapa eng ketareanna neiy mouw i lila’la ne rasul-rasul ni Tuhan ta, Yesus Kristus wia nikouw. ¹⁸ Karengan nisea se limila’ mola wia nikouw: “Melelaa eng kesampetan en zaman se laa mapa’ato se sumesero’-sumesero’ se laa tumou kumi’itla en serit kefasikan nea.” ¹⁹ Nisea nyi’a mouw se memete’ mengewe’ se kinuasa’ala eng kepa’aran-kepa’aran i te eng kaoatan i yi’i wo se matou-tou reiy’ ampit e Roh Kudus, ²⁰ Ta’an laa nikouw, patuariku waya i koupus, wangunenouw en toumu nuesa witu natas en to’otolan e imanmu kasa suci wo sumombayangouw witu e Roh Kudus. ²¹ Piaranouw en toumu tuana witu e nupus ni Empung kasuatan mengena-ngena’la e rahmat ni Tuhan ta, Yesus Kristus, i wee em patou-touan kekal. ²² I tudu’ mola en tongkoupusen wia nisea nu meware-wareng, ²³ Lawirenola sea ampit e lalan kumaati nisea witu napi. Ta’an i tudu’ mola en tongkoupusen e rinapitla eng keide’an wia se tou-tou walina kangkasi, wo ri’irisenouw e labung nea eng kinewurla eng kepa’aran-kepa’aran en dosa. ²⁴ I wee Nisia, si maka kuasa metetayur rio te’a kouw i kasu’usu’ wo minali nikouw ampit e reiy’ sisering wo wuta e lelaya’an witu en sinaru eng kalo’oran-Na, ²⁵ Empung si esa, Lumelawir ta,kaa si Yesus Kristus, Tuhan ta, i wee Nisia nyi’a mouw eng kalo’oran, kawangko’an, kaketeran wo eng kuasa nu reiy’pe’ e reiy’ sa mina’asa abad wo en teakan wo e ma’ayo eng keure-urena. Amin