¹ Waki wisa ku’a re’en eng kine’e eiy em pesali’isi’an wo em pe’isingan witu e nelet miouw? Reiy’ ku’a re’en eng kine’e eiyna witu eng hawa nafsumu e mame’inakutan witu eng gorem e nouwakmu? ² Nikouw kouw mepa’arla e nesa wo’o sapa, ta’an kouw reiy’ minaka’atola nyi’a, laa o kouw munu’; kouw iri ate, ta’an kouw reiy’ mina’ayola em pela’annu, laa o kouw me’ising wo kouw matokol. Nikouw kouw reiy’ minaka’ato sapa-sapa, karengan nikouw kouw reiy’ simombayang. ³ Ka’apa kouw simombayang kangkasi, ta’an kouw reiy’ minaka’ato sapa-sapa, karengan nikouw kouw selok masombayang, karengan em pengiween niouw i ti’i e laa pekeka’apun niouwla kaa laa mepateu-teula eng hawa nafsumu. ⁴ Heiy kouw, tou-tou reiy’ lale’! Reiy’ ku’a re’en kete’uan niouw, kaa em pekaloan ampit eng kaoatan nyi’a mouw em pasu’usukan ampit si Empung? Jadi seiy i te si pa’ar laa mamuali kalo eng kaoatan i yi’i, nisia si simiwola en touna kasu’usuk ni Empung. ⁵ Te’a mouw kouw mapokeiyla, kaa eng Kaol Suci reiy’ ampit en to’otolan e lumila’: “E Roh neiy i tampala ni Empung witu eng gorem en tou ta, ni’i kepa’ar-Nala ampit en tetayur!” ⁶ Ta’an e nupus karunia, neiy i anugerah-Nala wia nikita, en sumelala ta’an e ni’itu. Kaa ni’itu Nisia si limila’la: “Empung si mapero se tou tingkeiy, ta’an si mineupusla se tou kumeng ate.” ⁷ Kaa ni’itu tu’utukouw wia si Empung, wo su’usukenouw si Iblis, takar nisia si laa tumingkasla wia nikoo! ⁸ Tumawi mouw wia si Empung, wo Nisia si laa tumawi wia nikoo. Lenasenola e lawasmu, heiy kouw tou-tou makadosa! Wo sucinola e natemu, heiy kouw si rimua ate! ⁹ Weeanola ghenang en cilakamu, mengasi’ wo ma’aripouw; satorona eng ke’eke’annu en sawelannu ampit e narip wo e mepa’a-pa’armu ampit e mengasi. ¹⁰ I kumengola en toumu witu en sinaru ni Tuhan, wo Nisia si laa rumakekla nikouw. ¹¹ Patuariku waya, te’a mouw kouw mesesero’an! Seiy i te si masero’la si patuarina ka’apa maakimla nisia, nisia si makelong e nukum wo maakimla nyi’a; wo sa koo maakimla e nukum, takar nikoo koo reiy’ mouw maki’i-ki’it e nukum ta’an si akimna. ¹² Wawean i te siesa si Sumesiwo e nukum wo si Akim, nyi’a i ti’i Nisia si makakuasa melelawirla wo mepepunengla. Ta’an seiy ku’a re’en nikoo, i ka’ayo koo pa’ar ma’akimla si kasuatmu en tou? ¹³ Jadi en teakan, heiy kouw si limila’: “E nendo i yi’i ka’apa wo’odo nikeiy keiy ma’e waki kota anu, wo maname keiy laa mena’ esa nge te’un wo melante’ ma’an maka’ato untung”, ¹⁴ kasuatan nikouw kouw reiy’ mete’u en sapa e laa mamuali wo’odo. Sapa ku’a re’en em penoron em patou-touannu? Em patou-touannu i ti’i masuat tanu en segor reiy’ ure i te kinaloo’ala o mere’ila. ¹⁵ E nulitna nikouw kouw lewo’ sa reiy’ lumila’: “Sa si Tuhan si mekepa’arla nyi’a, nikeiy keiy laa matou-tou wo sumiwo e nyi’i wo e ni’itu.” ¹⁶ Ta’an en teakan nikouw kouw mesawa’la en tou witu en sendoyomu, wo em baya eng kesawa’an tuana nyi’a mouw en selok. ¹⁷ Jadi sa siesa tou si mete’u eng kumura sia lewo’ sa reiy’ sumiwo le’os, ta’an nisia si reiy’ matuanala nyi’a, nisia si makadosa.