¹ Patuariku waya, tanume sitou maka iman wia si Yesus Kristus, Tuhan ta si mulia, te’a mouw e iman i ti’i patuanan niouwla ampit maloo’ eng gio. ² Karengan, sa wawean siesa tou si ghumorem witu eng gorem em pengengerurannu ampit minake sesolong mas wo e labung wangun wo mineiy kangkasi witu siesa tou miskin si minake labung wuruk, ³ wo nikouw kouw maormatla sitou minake labung wangun i ti’i wo lumila’ wia nisia: “I laa mouw tuang rumuberouw witu en tampa le’os i yi’i!”, kasuatan wia sitou miskin i ti’i kouw limila’: “Rumedeiy mouw weti’ila!” ka’apa: “Rumuberouw wia em bela i yi’i reten eng kinontoiyan ne’aku!”, ⁴ reiy’ ku’a re’en nikouw kouw simiwo mouw em pemange’anan witu eng gorem e natemu wo mawinta’ tanume si akim ampit eng genang lewo’? ⁵ Linganola, heiy patuari waya neiyku i koupusla! Reiy’ ku’a re’en si Empung si mineleng se tou-tou i papokeiyla miskin eng kaoatan i yi’i kaa se laa mamuali kaya witu e iman wo se mamuali ahli waris eng Keraja’an neiy mouw i ta’ar-Nala wia si seiy i te si meupusla Nisia? ⁶ Ta’an nikouw kouw simero’ mola se tou-tou miskin. Reiy’ ku’a re’en kaa awes tare se tou-tou kaya se lume’ek nikouw wo se kumeong nikouw witu em paadilan? ⁷ Reiy’ ku’a re’en nisea se minojat e Ngaran mulia, kaa-Nyi’a kouw minamuali kapunya’an ni Empung? ⁸ Ta’an laa, sa wona’ kouw makelangla e nukum kasa i paketa-ketare neiy i kepatik witu eng Kaol Suci: “I koupusola si kasuat en toumu tanukan en toumu nuesa”, nikouw kouw simiwo e le’os. ⁹ Ta’an, sa wona’ kouw maloo’ eng gio, kouw simiwo en dosa, wo kaa e nukum i ti’i minamuali pakaloo’o-loo’ola, kaa nikouw kouw timuanala eng kaselokan. ¹⁰ Karengan seiy i te si maki’itla e minapekasa ukum i ti’i, ta’an si kimawila e nesa weteng witu nyi’a, nisia si simelok witu e minapekasa nyi’a. ¹¹ Karengan Nisia si limila’la: “Te’a masiwo en zinah”, Nisia si limila’la kangkasi: “Te’a mawunu’”. Jadi sa kouw reiy’ masiwo en zinah ta’an kouw mawunu’, takar nikouw kouw minamuali lumelangkoiy e nukum kangkasi. ¹² Lumila’ mouw wo matuana mola tanu se tou-tou laa pa’akimen e nukum mamerdekala sitou. ¹³ Karengan em paakiman e reiy’ maka tongkoupusen e laa paken wia sitou reiy’ maka tongkoupusen. Ta’an en tongkoupusen e laa muntung witu em paadilan. ¹⁴ Sapa ku’a re’en eng ka’ara’anna, patuariku waya, sa siesa tou si lumila’la, kaa nisia si makapunyala iman, e nulitna nisia si reiy’ makapunya em pasiwo-siwon? Toro ku’a re’en e iman i ti’i lumawirla nisia? ¹⁵ Sa siesa kalo ka’apa karia si reiy’ makapunya labung wo reiy’ awes eng kumaan susur nendo, ¹⁶ wo siesa witu e nelet miouw si limila’: “Tabea i kelangouw, Pakenola e roko’ pasu’ wo kumaanola i ka’ayo mawesu!”, ta’an nisia si reiy’ mineela wia nisia sapa em pemandungen e nouwakna, sapa ku’a re’en eng ka’ara’anna e ni’itu? ¹⁷ Tuanakan kangkasi eng kapualitanna ampit e iman: sa e iman i ti’i e reiy’ rinapitla em pasiwo-siwon, takar e iman i ti’i witu e nulitna nyi’a mouw e minate. ¹⁸ Ta’an wo’o wona’ wawean tou si limila’: “Wia nikoo wawean e iman wo wia niaku wawean em pasiwo-siwon”, niaku ku laa mingkot nisia: “I papa’ato mola wia niaku e imanmu i ti’i sa reiy’ ampit em pasiwo-siwon, wo niaku ku laa mapa’atola wia nikoo e imanku witu em pasiwo-siwon – pasiwo-siwongku.” ¹⁹ Nikoo koo ma’eman, kaa wawean i te esa Empung? Ni’itu e le’os! Ta’an se setang-setang tu’u kangkasi se ma’eman witu eng kapualitan i ti’i wo nisea se matenggo’ogho’. ²⁰ Heiy tou ba’abal, pa’ar ku’a re’en koo maakula en teakan, kaa e iman reiy’ ampit em pasiwo-siwon nyi’a mouw e iman reiy’ sisapa? ²¹ Reiy’ ku’a re’en si Abraham, ama’ ta, si neiy i ulitla karengan em pasiwo-siwon – pasiwo-siwonna, katoroan nisia nu mesesempela si Ishak, urangna, witu natas e mezbah? ²² Loo’on niouw, kaa e iman mepa’ayang mewali-wali ampit em pasiwo-siwon – pasiwo-siwon wo kaa em pasiwo-siwon – pasiwo-siwon i ti’i iman e minalekep. ²³ Ampit e lalan tuana mina lekepouw e nats limila’la: “Laa o ma’emanouw si Abraham wia si Empung, takar si Empung si minaparekenla eng kapualitan i ti’i wia nisia tanume eng kaulitan.” Kaa ni’itu si Abraham si tinotor: “Kalo ni Empung.” ²⁴ Jadi loo’on niouw, kaa sitou neiy i ulitla karengan em pasiwo-siwon – pasiwo-siwonna wo reiy’ i te karengan e iman. ²⁵ Wo reiy’ ku’a re’en tuana kangkasi si Rahab, si pelacur i ti’i, si neiy i ulitla karengan em pasiwo-siwon – pasiwo-siwonna, katoroan nisia nu kimirongla se tou-tou neiy i reo i ti’i witu eng gorem em balena, laa o tumulung nisea limempot timoro e lalan walina? ²⁶ Karengan tanu e nouwak reiy’ ampit e roh nyi’a mouw e minate, tuana mouw kangkasi e iman reiy’ ampit em pasiwo-siwon – pasiwo-siwon nyi’a mouw e minate.