¹ Waki si Paulus, siesa rasul, reiy’ eng karengan sitou, e reiy’ kangkasi kaa siesa nga touan, ta’an i te kaa si Yesus Kristus wo si Empung, Ama’, si timo’orola Nisia witu e nelet ne tou minate, ² wo waki em baya ne patuari se wia se mewali-wali ampit niaku, i wee se jema’at- jema’at waki Galatia: ³ 3 e nupus karunia rumapitla nikouw wo en dame sejahtera waki si Empung, Ama’ ta, wo waki si Tuhan Yesus Kristus, ⁴ si simarakanola en tou-Na karengan en dosa-dosa ta, kaa laa merere’ula nikita waki kaoatan e lewo’ en teakan i yi’i, eng kepa’aran ni Empung wo ni Ama’ ta. ⁵ I wee Nisia mouw eng kamulia’an eng keure-urena! Amin. ⁶ Niaku ku ma’erang, kaa nikouw kouw tuana eng karior minurikiti wia Nisia, kaa e nupus karunia ni Kristus eng kimeretouw nikouw, wo kimi’itola e nesa injil walina, ⁷ eng kaulitna e reiy’ Injil. Ta’an wawean tou si meseselawarla nikouw wo si mekemaksud kaa laa mepepule’itla e Injil ni Kristus. ⁸ Ta’an ma’anouw tu’u nikeiy ka’apa siesa malaikat waki sorga si minabarla wia nikouw e nesa injil minelaengan ampit e Injil neiy mouw i abar meiyla wia nikouw, i kakutokola sia. ⁹ Tanu e neiy mouw i lila’ meiyla eng ketarean, en teakan e ni’i lila’kula mekasape’ kasi: sa wona’ wawean tou si maabarla wia nikoo e nesa injil, minelaengan ampit en sapa en sinungkul miouw mola, i kakutokola sia. ¹⁰ Laa kumura en teakan: sapa ku’a re’en ku menero eng kepa’aran ni tou ka’apa eng kepa’aran ni Empung? Sapa ku’a re’en ku mewewa’awa’ e mekepa’aren wia sitou? Sa andeiyna ku pa’are’ mewewa’awa’la e mekepa’aren wia sitou, takar niaku ku reiy’ mouw hamba ni Kristus. ¹¹ Karengan niaku ku limedosla wia nikoo, patuariku waya, kaa e Injil ni’i paabarkula i ti’i e reiy’ mouw e injil ni tou. ¹² Karengan niaku ku reiy’ minaka’ato e nyi’a waki sitou, wo e reiy’ sitou si timuru’ e nyi’a wia niaku, ta’an niaku ku simungkul e nyi’a kaa em pinapaloo-loo’an ni Yesus Kristus. ¹³ Karengan nikouw kouw liminga mouw en tanume em patou-touanku eng ketare witu e agama Yahudi: e reiy’ siniakaran ku masiasa se jema’at ni Empung wo e me’inakut mepepunengla nisea. ¹⁴ Wo witu e agama Yahudi niaku ku rou’ lebe maju ta’an wia se laker ka’ampit esa nge raang ampit niaku witu e nelet ne bangsaku, tanume sitou kasa rajin mapiara e nadat istiadat ne nene moyangku. ¹⁵ Ta’an e nedo Nisia, si minelengouw niaku rengane’ pegandongen ni ina’ku wo kimeret niaku kaa e nupus karunia-Na, ¹⁶ si mepa’ar minapaloo’o-loo’ola si Oki’-Na witu niaku, rio ku maabarla Nisia witu e nelet ne bangsa-bangsa reiy’ Yahudi, takar esa nga nedo tu’u niaku ku reiy’ kimiwee em pemili-milingen wia sitou; ¹⁷ o kangkasi ku reiy’ minea waki e Yerusalem ma’atola nisea se minamuali mouw rasul nu reiy’pe’ niaku, ta’an niaku ku minae waki tana’ Arab wo witula o ku marengi kasi waki Damsyik. ¹⁸ Laa o, en telu nge te’un eng kamurian, niaku ku limaa waki e Yerusalem kaa laa melelalesla si Kefas, wo niaku ku time’up e mapulu’ o lima nga endo witu em balena. ¹⁹ Ta’an niaku ku reiy’ limoo’ siesa tou tu’u wia se rasul-rasul walina, kacuali si Yakobus, patuari ni Tuhan Yesus. ²⁰ Witu en sinaru ni Empung ni’i ledoskula: sapa e neiy i patikkula wia nikoo i yi’i e nulit, niaku ku reiy’ matowo. ²¹ 21 Eng kamurian o ku mea waki en daerah-daerah Siria wo eng Kilikia. ²² Ta’an eng gioku e minena’ reiy’ kasine’uan ne jema’at-jema’at ni Kristus waki Yudea. ²³ Nisea se liminga i te, kaa nisia eng ketarena si simiasa nisea, en teakan si maabarla e iman, e mekasa mouw pinepepunengnala. ²⁴ Wo nisea se limo’orla si Empung karengan niaku.