¹ Heiy Teofilus, witu em buukeku eng ketare niaku ku minatik en tanume e reiy’ sa mina’asa wo’o sapa em pina’ayangla wo e neiy i turu’la ni Yesus, ² i ka’ayo witu e nendo Sia nu kina’adetan. Nu reiy’ pe’ i tu Nisia si minee mola em perenta-Na kaa e Roh Kudus wia se rasul-rasul pineleng-Na. ³ Wia nisea Sia si minapa’atola en tou-Na ni’itu nu simampetouw em peme’itan-Na, wo ampit e laker kowa’ Nisia si minapaulitla, kaa Nisia si matou-tou. Karengan eng kaurean epat nga pulu’ nga endo Nisia si minenou-noup minapa’atola en tou wo mesesusuiy wia nisea en tanume eng Keraja’an ni Empung. ⁴ Witu e nendo mekasa katoroan Sia nu mekaan mewali-wali ampit nisea, Sia malouw nisea metetele’ula e Yerusalem, wo rimeo nisea mena’ witu ma’ana’la en ta’ar ni Ama’, en – tuana em pokeiy-Na – “ e lininga miouw mola wia-Niaku. ⁵ Karengan Yohanes si mebaptis ampit e rano, ta’an reiy’ mouw ure kasi nikouw kouw laa baptisen ampit e Roh Kudus.” ⁶ Takar mueiy mouw sea nu minerur witu : “ Tuhan, pa’ar ku’a Koo wia e masa i yi’i sumegaya’la eng keraja’an ni’i wee si Israel ?” ⁷ E wingkot-Na : “ Nikoo koo reiy’ perlu mamete’ula e masa wo e nedo, e neiy i tatapla ni Ama’ sandiri ni’i ki’it eng kuasa-Na. ⁸ Ta’an nikouw kouw laa maka’ato eng kuasa, sa e Roh Kudus en tumumpa witu e natas miouw, wo nikouw kouw laa mamuali sairi-Ku waki Yerusalem wo waki e minapekasa Yudea wo en Samaria wo i ka’ayo waki en tempok em bumi.” ⁹ Nisia nu limila’ mola en tuana, ka’adetanouw Sia pinaka loo-loo’ nea, wo e linaak eng kimelungla wia-Nisia witu e leloo’an nea. ¹⁰ Katoroan sea nu mawerene waki langit e nedo Sia nu maatas i ti’i, i kalo’ositi rimedeiy mouw se rua tou minake puti’ witu en tawi nea, ¹¹ wo lumila’ wia nisea : “ Heiy tou-tou Galilea, ka’a ku’a kouw rumedeiy maloo’me waki langit? Si Yesus yi’i, si kina’adetane waki sorga timele’ula nikouw, si laa meiy sumeup ampit eng kenaramen masuat en tanu nikouw nu limoo’ Nisia limongkot waki sorga.” ¹² Takar marengouw se rasul-rasul i ti’i mea waki Yerusalem waki eng kuntung em patotoren Kuntung Zaitun, esa nga kekelangan i te en Sabat eng kewa’akatna waki Yerusalem. ¹³ Nisea nu neiy mouw i ka’ayola waki kota, o lumongkotouw sea waki woang atas, witu en tampa tino’upan nea. Nisea i ti’i nyi’a mouw si Petrus wo si Yohanes, Yakobus wo si Andreas, Filipus wo si Tomas, Bartolomeus wo si Matius, Yakobus bin Alfeus, wo si Simon tou Zelot wo si Yudas bin Yakobus. ¹⁴ Nisea nu waya se timentem ampit esa nga ate witu en sesombayangen mewali-wali, ampit se pirala wewene ma’an si Maria, ina’ ni Yesus, wo ampit se patuari-patuari ni Yesus. ¹⁵ Witu e nendo-nendo ni’itu rumedeiy mouw si Petrus witu eng kauneran ne patuari-patuari se kasuatan minerur witu, wo’o wona’ esa nga atus tou eng kelakerna laa o lumila’: ¹⁶ “Heiy patuari waya, lewo’ mouw sa reiy’ lekep e nats eng Kitab Suci, e neiy i pa’ayola e Roh Kudus ampit e nieletan ni Daud en tanume si Yudas, si pa’aka-aka’an ne tou-tou simikop si Yesus i ti’i. ¹⁷ En dulu sia si neiy i kaghorem witu e rerekenan neiy wo maedo e weteng witu em pelayanan i yi’i.” ¹⁸ – Yudas i yi’i si timelesouw esa nga werot e tana’ ampit en tetoro pasiwo-siwonna lewo’, laa o sia i ka’anu neiy i kasumparak, wo en tianna e mina kewe’ i ka’ayo em baya em pumpun en tianna en timeroa’ wia luar. ¹⁹ Eng kapualitan i ti’i eng kete’uan em baya ne penduduk Yerusalem, i ka’ayo en tana i ti’i em patotoren nea witu em baasa nea nuesa “Hakal – Dama”, em penoronna Tana’ Raa’ ²⁰ “Karengan neiy i patik witu eng kitab Mazmur : Ma’anouw en dinasinganna e mapenes, wo ma’anouw reiy’la si maana’ witu eng goremna : wo : Ma’anouw en jabatanna e nedonla ne tou walina. ²¹ Jadi e lewo’ sa reiy’ awesala wia nikeiy siesa tou witu nisea si reiy’ mena’ meiy maarur ampit nikeiy kaurean si Tuhan Yesus mewali-wali ampit nikeiy, ²² nyi’a i ti’i muleiymi waki baptisan ni Yohanes i ka’ayomi e nedo si Yesus nu kina’adetane waki sorga timele’ula nikeiy, kaa laa mamuali sairi ampit nikeiy tanume eng kebangkitan-Na.” ²³ Laa o sea ma’ayola se rua tou : Yusuf si patotoren Barsabas wo si kangkasi mekengaran Yustus, wo si Matias. ²⁴ Nisea nu waya se simombayang wo limila’ : “ Ya Tuhan, Nikoo mouw si maka sine’u e nate em baya ne tou, i tudu’ mola satorona seiy si pineleng-Mu wia se rua tou i yi’i, ²⁵ kaa laa maka’ato en jabatan pelayanan, e nyi’a i ti’i eng kerasulan neiy i tele’ula ni Yudas si neiy mouw i kawolon witu en tampa waar i wee nisia.” ²⁶ Laa o sea kumoba’ i wee se rua tou i ti’i wo si tinena’ eng koba’ nyi’a mouw si Matias wo ampit en tuana sia si neiy i awesla witu e rerekenan ne mapulu’ o esa rasul i ti’i.