TABEA ¹ Waki si penatua i wee si Gayus i koupus, si’i koupuskula witu eng kaulitan. ² Patuariku i koupus, niaku ku masombayang, satorona nikoo koo male’o-le’os wo masega-segaya’kan witu e reiy’ sa mina’asa wo’o sapa, masuat tanu si imukurmu si male’o-le’oskan. ³ Karengan niaku ku kasa mepa’a-pa’ar, katoroan se pirala patuari se mineiy wo mee kasairian tanume em patou-touannu witu eng kaulitan, karengan nikoo koo matou-tou witu eng kaulitan. ⁴ I wee niaku reiy’la e mepa’a-pa’ar lebe wangko’ ta’an malingala, kaa se oki-oki’ku se matou-tou witu eng kaulitan. ⁵ Patuariku i koupus, nikoo koo mawinta’ tanume sitou ma’eman, witu e wisa koo masiwo e reiy’ sa mina’asa wo’o sapa i wee se patuari waya, ma’anouw tu’u sea tou-tou wo’oseiy. ⁶ Nisea se minee mola kasairian witu en sinaru ne jema’at tanume e nupusmu. E le’os ulit em pasiwo-siwonnu, sa koo timulung nisea witu em pakela-kelangan nea, ampit e nesa kenaramen mekepa’aren wia si Empung. ⁷ Kaa eng karengan e ngaran-Na nisea se minae mouw ampit e reiy’ minaka’ato sapa i te tu’u wia se tou-tou reiy’ makasine’u si Empung. ⁸ Nikita ta waar sumungkul se tou-tou tuana, rio kita toro medo suweng witu em pepa’ayangen nea i wee eng kaulitan. ⁹ Niaku ku minatikola oki’ wia se jema’at, ta’an si Diotrefes si pa’ar mamuali tou pamuka-muka witu e nelet nea, si reiy’ pa’ar maakula nikeiy. ¹⁰ Kaa ni’itu, sakawisa ku meiy, niaku ku laa kumiwee ghenang witu e reiy’ sa mina’asa pasiwo-siwon en tinuanana mola, karengan nisia si ruke’eket materoa’mi e lelila’an-lelila’an risa’asap wia nikeiy; wo reiy’pe’ minateula ampit e ni’itu, nisia nuesa si reiy’ i te so’o mesesungkul se patuari-patuari mineiy, ta’an kangkasi si maape’ se tou-tou, pa’ar mesesungkul nisea wo mesesea’la se tou-tou i ti’i wia se jema’at. ¹¹ Patuariku i koupus, te’a mouw ma’asarla si lewo’, ta’an i te si le’os. Seiy i te si masiwo le’os, nisia si asal waki si Empung, ta’an seiy i te si masiwo lewo’, nisia si reiy’pe’ ma’an mekasa limoo’ si Empung. ¹² Tanume si Demetrius em baya ne tou se minee kasairian e le’os, awes tare eng kaulitan nuesa e minee kasairian tuana. Wo nikeiy kangkasi keiy minee kasairian e le’os tanume nisia, wo nikoo koo mete’u, kaa eng kasairian neiy nyi’a mouw e nulit. ¹³ Kelaker eng kapualitan e lewo’ sa reiy’ i patikkula wia nikoo, ta’an niaku ku so’o mepepatik wia nikoo ampit en tinta wo em pena. ¹⁴ Niaku ku maarap ku makarengan masungkul ampit nikoo wo sumusuiy mawerenan. ¹⁵ En dame sejahtera rumapitla nikoo! Tabea waki se kalo-kalomu. I pa’ayo mola en tabeaku wia se kalo-kalo siesa o siesa.