TABEA ¹ Waki si Simon Petrus, hamba wo si rasul ni Yesus Kristus, i wee wia nisea se mewali-wali ampit nikeiy se minaka’ato e iman karengan eng ka’adilan ni Empung wo si Lumelawir ta, Yesus Kristus. ² E nupus karunia wo en dame sejahtera e lumokonla nikouw kaa em panginsine’uala si Empung wo si Yesus, Tuhan ta. ³ Karengan eng kuasa ilahi-Na e minanugerah mola wia nikita e reiy’ sa mina’asa wo’o sapa e makaka’ara’an kaa laa tumou e lale’ kaa em pasine’uantala Nisia, si kimeretouw nikita kaa eng kuasa-Na mulia wo e maka’erangen. ⁴ Ampit e lalan ni’itu Nisia si minanugerah mola wia nikita en ta’ar-ta’ar maka’arga wo eng kasa sela, rio kaa e nyi’a o kouw toro medo weteng witu eng kodrat ilahi, wo neiy i kaliseiy witu en serit eng kaoatan e makapunengen eng kaoatan. ⁵ Awes tare kaa e ni’itu o kouw lewo’ sa reiy’ maka uli-ulit me’inakut kaa laa ma’awesla wia e imanmu eng kalele’osan, wo wia eng kalele’osan tine’u, ⁶ wo wia en tine’u makuasala en tou, wia makuasala en tou katenteman, wo wia eng katenteman kelale’an, ⁷ wo witu eng kelale’an e nupus wia se patuari-patuari, wo e nupus wia se patuari-patuari e nupus wia em baya ne tou. ⁸ Karengan sakawisa em baya nyi’a i ti’i em bia nikoo ampit e makaloko-lokon, nikoo koo siwonna laa merajing wo mee wua’na witu em pasine’uannula si Yesus Kristus, Tuhan ta. ⁹ Ta’an seiy i te si reiy’ makapunyala em baya nyi’a i ti’i, nisia si merapa wo ba’abal, karengan nisia si minaliur, kaa en dosa-dosana eng ketareanna e rine’i mola. ¹⁰ Kaa ni’itu, patuariku waya, me’inakutola maka uli-ulit, rio em pengeretan wo em pelengannu e maka te’etepla. Karengan sa kouw tumuanala nyi’a, kouw reiy’ ma’an mekasa laa i kasu’usu’. ¹¹ Ampit en tuana wia nikouw e laa i karuniala eng hak kawutana kaa laa megheghoremla eng Keraja’an kekal, nyi’a i ti’i eng Keraja’an ni Tuhan wo ni Lumelawir ta, Yesus Kristus. ¹² Kaa ni’itu niaku ku reiy’ maena-ena’ mekemaksud makighenangla nikouw witu em baya nyi’a i ti’i, ma’anouw tu’u kouw minete’u mola nyi’a wo te’etepouw witu eng kaulitan sinungkul miouw mola. ¹³ Niaku ku mapokeiyla tanume eng kewajibangku kaa laa mena-ena’ mapaghenangla nikouw witu em baya nyi’a i ti’i eng keurean niaku nu reiy’pe’ minangkulela en dasing e nouwaku i yi’i. ¹⁴ Karengan eng kete’uangku, kaa niaku ku makarengan mangkulela en dasing e nouwakku i yi’i, tanu eng kumura neiy mouw i pakite’ula ni Yesus Kristus, Tuhan ta wia niaku. ¹⁵ Ta’an niaku ku laa me’inakut, rio kangkasi nu reiy’ mouw eng kine’e eaku i ti’i kouw reiy’ maena-ena’ maghenangla em baya nyi’a i ti’i. ¹⁶ Karengan nikeiy keiy reiy’ maki’itla e ne’umanen-ne’umanen en towo ni tou, katoroan nikeiy nu minakite’ula wia nikoo eng kuasa wo eng ke’e eiy ni Tuhan ta, Yesus Kristus teume si raja, ta’an nikeiy nyi’a mouw keiy sairi em beren witu eng kewangko’an-Na. ¹⁷ Nikeiy keiy minakaloo’ola, kumura Nisia nu simungkul eng kaormatan wo eng kalo’oran waki si Ama’ Empung, katoroan mineiy wia-Nisia en suara waki Si Kasamulia, si limila’la: “I yi’i mouw si Oki’ si’i koupus-Kula, wia Nisia mouw Niaku mepa’ar.” ¹⁸ Suara i ti’i e lininga meiy waki sorga o meiy, katoroan nikeiy nu mewali-wali ampit Nisia waki atas eng kuntung kudus. ¹⁹ Ampit en tuana nikeiy keiy pinakate’etepola e nuwu’ neiy mouw i pa’ayola ne nabi. Eng kasa mouw le’os sa kouw mawee ghenangla nyi’a masuat tanu mawee ghenangla en solo masena’ witu en tampa reiydem i ka’ayo em beena em paloo’onouw wo si potrintang si rimetik witu eng gorem e natemu. ²⁰ Eng kasa i paketa-ketare e lewo’ sa reiy’ kete’uannula, nyi’a mouw kaa e wenti’-wenti’ witu eng Kaol Suci e reiy’ mete’u i tafsirla i ki’it eng kepa’aran nuesa, ²¹ karengan reiy’pe’ ma’an mekasa e wenti’ ni’i wua’la eng kepa’aran ni tou, ta’an kaa en se’ese’an e Roh Kudus se tou-tou se mesesusuiy witu e ngaran ni Empung.