¹ Waki si Paulus, Silwanus wo si Timotius wia se jema’at ne tou-tou Tesalonika se witu si Ama’ Empung wo se witu si Tuhan Yesus Kristus. E nupus karunia wo en dame sejahtera e rumapitla nikouw. ² Nikeiy keiy reiy’ maena-ena’ matotor en syukur wia si Empung karengan nikouw nu waya wo matotor nikouw witu en sesombayangen neiy. ³ Karengan nikeiy keiy reiy’ maena-ena’ maghenang em pepa’ayangen e imanmu, em pe’inakuten e nupusmu wo eng katenteman em paarapennu wia si Tuhan ta Yesus Kristus witu en sinaru ni Empung wo ni Ama’ ta. ⁴ Wo nikeiy keiy mete’u, heiy patuari waya i koupus ni Empung, kaa Nisia si minelengouw nikouw. ⁵ Karengan e Injil neiy i abar meiyla reiy’ neiy i pa’ayola wia nikouw ampit e lelila’an-lelila’an i te, ta’an kangkasi ampit eng kaente’an e Roh Kudus wo ampit e nesa katantuan te’etep. Memang nikouw kouw mete’u, kumura nikeiy nu mepa’ayang witu e nelet miouw karengan nikouw. ⁶ Wo nikouw kouw minamuali mouw maki’i-ki’it nikeiy wo maki’i-ki’it si Tuhan; witu em palotoiyan e wuter nikouw kouw simungkulouw e nuwu’ i ti’i ampit e mepa’a-pa’ar em pina’ayangla ni Roh Kudus, ⁷ i ka’ayo kouw minamuali mouw pa’asa-asaran wia em baya ne tou ma’eman waki wilayah Makedonia wo Akhaya. ⁸ Karengan waki elet miouw e nuwu’ ni Tuhan masingkom reiy’kan i te waki Makedonia wo Akhaya, ta’an waki em baya en tampa rimangketouw e nabar tanume e imanmu wia si Empung, i ka’ayo keiy reiy’ mouw toro lumila’la sapa-sapa tanume eng kapualitan i ti’i. ⁹ Karengan nisea nuesa se mesesusuiy en tanume nikeiy kumura keiy nu sinungkul miouw wo kumura kouw nu minurikiti waki em berhala-berhala o meiy wia si Empung kaa meiy melelayanla si Empung matou-tou wo si ulit, ¹⁰ wo kaa laa mengena-ngena’la eng ke’e eiy ni Oki-Na waki sorga, si tino’or-Na mola witu e nelet ne tou minate, nyi’a i ti’i si Yesus, si limawirla nikita waki e nupi’ e laa meiy.