TABEA ¹ Waki si Petrus, rasul ni Yesus Kristus, wia se tou-tou mate’u-te’up, se neiy i kasera waki Pontus, Galatia, Kapadokia, Asia Oki’ wo em Bitania, ² nyi’a i ti’i se tou-tou pineleng, minatoroan ampit em pelelaan ni Empung, Ama’ ta, wo se kinudusla ni Roh, rio sea lale’ wia si Yesus Kristus wo sumungkul em pi’ipikan e raa’-Na. Satorona e nupus karunia wo en dame sejahtera e makalokonla witu nikouw. ³ Lino’orola si Empung wo si Ama’ Tuhan ta Yesus Kristus, karengan e rahmat-Na kewangko’ en timimea’ mola nikita sumeup kaa eng kinato’oran ni Yesus Kristus witu e nelet ne tou minate, witu e nesa patou-touan wuta em paarapen, ⁴ kaa laa mesesungkulla e nesa weteng reiy’ mete’u mapuneng, reiy’ mete’u makewur wo e reiy’ mete’u maweles, en tinu’utulan waki sorga i wee nikouw. ⁵ Nyi’a i ti’i nikouw, si piniarala witu eng kaente’an ni Empung karengan e imanmu kasuatan nikouw nu mengena-ngena’la eng kelawiran sinadia mola kaa laa i papaloo’o-loo’ola witu eng kesampetan en zaman. ⁶ Lumaya-laya’ mola witu eng kapualitan i ti’i, ma’anouw tu’u en teakan i yi’i i kalo’ositi kouw lewo’ sa reiy’ mengasi’ kaa e reiy’ sa mina’asa pewa’awa’an. ⁷ Maksud em baya nyi’a i ti’i nyi’a mouw kaa laa mebebuktila eng kamurnian e imanmu – wa’akat lebe rakek e nargana ta’an e mas fana, niuji eng kamurnianna ampit e napi – i ka’ayo kouw maka’ato em puji-pujian wo eng kamulia’an wo eng kaormatan witu e nendo si Yesus Kristus nu mapaloo’o-loo’ola en tou-Na. ⁸ Ma’anouw tu’u kouw reiy’pe’ ma’an mekasa lumoo’ Nisia, ta’an nikouw kouw meupusla Nisia. Nikouw kouw ma’eman wia Nisia, ma’anouw tu’u kouw en teakan kouw reiy’ limoo’ Nisia. Nikouw kouw melaya-laya’ karengan e mepa’a-pa’ar mulia wo e reiy’ i keila’la, ⁹ karengan nikouw kouw mina’ayo mola em pelela’an e imanmu, nyi’a i ti’i eng kelawiran ni imukurmu. ¹⁰ Eng kelawiran i ti’i mouw en sinoisap makale’o-le’os ne nabi-nabi, se minenti’ mola tanume e nupus karunia ni’i weela i wee nikoo. ¹¹ Wo nisea se simoisap makale’os e nedo wisa wo eng kumura neiy i maksudla e Roh ni Kristus, em bitu eng gorem nea, nyi’a i ti’i e Roh nu reiy’pe’ nyi’a e minee kasairian tanume e reiy’ sa mina’asa peme’itan e laa tumoro si Kristus wo en tanume e reiy’ sa mina’asa kalo’oran en tumodeiy nu reiy’ mouw ni’itu. ¹² Wia nisea neiy mouw i papaloo’o-loo’ola, kaa nisea se reiy’ melayanla en tou nea nuesa, ta’an se melayanla nikouw ampit e reiy’ sa mina’asa wo’o sapa e neiy mouw i abarla en teakan wia nikouw ampit em pinaeletan nea, kaa e Roh Kudus, neiy i tokemi waki sorga, mina’ayola e nabar Injil wia nikouw, nyi’a i ti’i eng kapualitan-kapualitan em pa’ar pinetete’ula ne malaikat-malaikat. ¹³ Kaa ni’itu tiro’onola e akal budimu, tumegha-teghamouw wo i reta’ mola em paarapennu minapekasana witu e nupus karunia neiy i anugerala wia nikoo e nedo pinapaloo’o-loo’oan ni Yesus Kristus. ¹⁴ Tumou mouw tanu se oki-oki’ lale’ wo te’a pekeki’itala en serit kumuasala nikoo witu e nedo kawe’engelannu, ¹⁵ ta’an satorona kouw mamuali kudus witu e minapekasa em patou-touannu masuat tanu Nisia si kudus, si kimeretouw nikouw, ¹⁶ karengan wawean neiy i kepatik: Kudusouw kouw, karengan Niaku ku kudus. ¹⁷ Wo sa kouw matotor Nisia Ama’, nyi’a i ti’i Nisia si reiy’ maloo’ eng gio si ma’akimla em baya se tou i ki’it em pasiwo-siwonna, takar satorona kouw tumou witu eng kineide’an eng keurean kouw nu time’up wia eng kaoatan i yi’i. ¹⁸ Karengan eng kete’uan niouw, kaa nikouw kouw tinubusouw witu eng kenaramen em petou-touannu reiy’ sipenoron eng kina’atoan niouwla wia se nene moyangmu i ti’i reiy’ kaa em barang fana, reiy’ kangkasi ampit em perak ka’pa e mas, ¹⁹ ta’an i te ampit e raa’ kemaal, nyi’a i ti’i e raa’ ni Kristus masuat tanu e raa’ ni oki’ ni domba reiy’ sisering wo reiy’ siwalulang. ²⁰ Nisia si pinelengouw nu reiy’pe’ eng kaoatan i yi’i nu siniwola, ta’an eng karengan nikouw kouw tare mouw i te mapaloo’o-loo’ola en tou-Na wia en zaman kesampetan. ²¹ Kaa Nisia mouw o kouw ma’eman wia si Empung, si timo’orola Nisia witu e nelet ne tou minate wo si limo’orola-Nisia, i ka’ayo e imanmu wo em paarapennu neiy i katoro wia si Empung. ²² Karengan nikouw kouw simuci mola en toumu kaa eng kelale’an wia eng kaulitan, i ka’ayo kouw toro tumuanala e nupus pepatuarian kasa uli-ulit, satorona kouw kasa makauli-ulit mengengupusala ampit em pakasa’an e natemu. ²³ Karengan nikouw kouw neiy mouw i patoula sumeup reiy’ waki bibit fana, ta’an waki bibit reiy’ fana, kaa e nuwu’ ni Empung, e matou-tou wo eng kekal. ²⁴ Karengan: “Em baya e matou-tou nyi’a mouw en tanu e rukut, wo e reiy’ sa mina’asa kalo’oranna tanu e wungang rukut, rukut e minapera, wo e wungang e rima’aragh, ²⁵ ta’an e nuwu’ ni Tuhan e minena-ena’ eng keure-urena.” Nyi’i mouw e nuwu’ neiy i pa’ayola e Injil wia nikouw.