Pasal 1
ENG KASAIRIAN NI RASUL TANUME E NUWU' MATOU-TOU
1
Sapa em bia mouw rengane’ eng ketarena, e lininga meiy mola, e linoo’ meiy mola ampit em beren neiy, em pinakaloo’ meiy mola wo e riningkap meiy mola ampit e lawas meiy tanume e Nuwu’ matou-tou – ni’itu mouw neiy i patik meiyla wia nikouw.
2
Em patou-touan i ti’i neiy mouw i papaloo’o-loo’ola, wo nikeiy keiy limoo’ mola nyi’a wo en teakan nikeiy keiy sumairi wo ma’abarla wia nikouw tanume em patou-touan kekal, mewali-wali ampit si Ama’ wo neiy mouw i papaloo’o-loo’ola wia nikeiy.
3
Sapa e linoo’ meiy mola wo e lininga meiy mola i ti’i, ni’i abar meiyla kangkasi wia nikouw, rio kouw tu’u maka’ato em paasa-asa’an ampit nikeiy. Wo em paasa-asa’an neiy nyi’a mouw em paasa-asa’an ampit si Ama’ wo ampit si Oki’-Na, Yesus Kristus.
4
Wo em baya nyi’a i yi’i neiy i patik meiyla wia nikouw, rio e mepa’a-pa’ar meiy e mamuali reiy’ siperoan.
5
Wo nyi’i mouw e nabar, lininga meiy mola wia Nisia, wo ni’i pa’ayo meiyla wia nikouw: si Empung nyi’a mouw si terang wo witu Nisia eng kasa reiy’la kareiydeman.
6
Sa kita lumila’la, kaa nikita kita minaka’ato em paasa-asa’an ampit Nisia, ta’an nikita kita matou-tou witu eng kareiydeman, nikita kita matowo wo reiy’ matuanala eng kaulitan.
7
Ta’an sa kita matou-tou witu en terang kita masuat tanu Nisia si witu en terang, takar nikita kita maka’ato em paasa-asa’an siesa ampit se walina, wo e raa’ ni Yesus, si Oki’-Na i ti’i, e lumenasla nikita witu e reiy’ sa mina’asa dosa.
8
Sa kita lumila’la, kaa nikita kita reiy’ makadosa, takar nikita kita male’ekok en tou ta nuesa wo eng kaulitan e reiy’ witu nikita.
9
Sa kita maaku en dosa ta, takar Nisia nyi’a mouw si lale’ wo adil, i ka’ayo Nisia si laa ma’ampungla e reiy’ sa mina’asa en dosa ta wo lumenasla nikita witu e reiy’ sa mina’asa kalewo’an.
10
Sa kita lumila’la, kaa nikita ta reiy’ masiwo en dosa, takar nikita ta masiwo Nisia si mamuali menenowo wo e nuwu’-Na e reiy’ witu nikita.