¹ Tomau nya nako madubuso tomariwo mangale o'ngini, deo Laodikia ma nyawa, deo nyawa nage toki make-make wasi. ² ta diai konena la manga sininga i kuata de yo rimoi o dora madeaka siadono yo ngaku de yo mangarati ma jou awi rahasia, gena ma Kristus mata-mata. ³ O humati deo barija mata-mata kaunaka de yaino. ⁴ Tonyemo konena supaya o nyawa uwa ni sasalimoi deo demo yosi sosomoa. ⁵ Ngalo ai loese o somoa kanaga, ma ai ngofasa i manoa dengini, de ai sininga i morene mangale nyia sininga ma goungu de nyia ngongaku i bitumu ma Yesus ika. ⁶ Mangale ma Jou Yesus niwi ngaku kau, nyia wowango nyo kula unaka, ⁷ nio wango awi lomanga madea ka, nyia ngongaku nya bitumino mangale tini sitemo kau ma didisilaka, deo siloanga uwa nya mongolo. ⁸ nyima sididiai uwa sigadono o nyawa ni sasalimoi deo demo ma diilaka nisi osama, ma demo gena i bola o nyawa manga adat deo dunia ma ngomasino, de geena ma jou awi mau wa. ⁹ Mangale o sagala kuasa o duniaka moi-moini unaka ima sigagao. ¹⁰ Mangale una nyo odumokau, de mangale una geena o papareta de o kukuasa ma saeke. ¹¹ O sunata nya make ka unaka, ma sunata gena o nyawa wa ya diai, kama Jou wa diai, nage nanga loese ma lakeme i babaradosa p tolaka. ¹² nage o gogoliuku, nisi poosuk okau de ma Jou Yesus, ala ika nisi wango uli de Una mangale nyia ngongaku touna awi kuasa wisi wango ma Jou Yesus o sonenge ma golonano. ¹³ Ngalo ma sila nyo sonengokau mangale nya baradosa de nyia lakeme ma mau, ma Jou niwi sowango kau ima kamoteke de Una, ma orasa wuna si ampun nanga baradosa i pasal ino. ¹⁴ Nanga nagimi de nanga adata nage ina sikulu-kulutu de ma Jou moi-moini wa tolak okau. Una woma kula wi weleke o gota ma dukul ino mangale nanga dosa wa fangu. ¹⁵ Wa pelenga o papareta deo kukuasa ma nyawa, siadono oona yo samaeke mangale o nyawa ya gelelo ma Jou awi kuasa ma lamoko o gota ma dukul ino. ¹⁶ Mangale kogeena, uwa sigadono o nyawa ni sibodo mangale o inomo deo akele eko deo wange ma lamoko, o mede eko o sabat ma wange. ¹⁷ karana moi-moini gena mangale okia naga nanga bion ika ala i bola, ma geena mata-mata ka ma Yesus Kristus. ¹⁸ uwa woma sigunua o nyawa yo budi-budi deo malaikat yo suba-suba ina si bobodo. o ona geena kao buusala ya igo-igo siadono i dadi ya ma cade mangale o dunia ma dodotoko. ¹⁹ Ma nyawa kogeena ma Jou wi ngaku wa. Ma Jou Kristus geena Wa tikini nanga loese, alaika nanga loese ya sidotolomu ma kobongo de nanga lakeme, moi-moini geena i wango kama Jou ka de yaino. ²⁰ Nako de ma Jou Yesus o dunia nya pidil okau, i dodoau so ka nio diniikosi o dunia ma pareta, ka nio diniikosi o dunia ma torana: ²¹ "uwa nya nanausu, uwa nya ayomo, uwa nya tigi"? ²² De i pasal ino ma torana neena i murutu mangale neena ka o dunia ma torana. ²³ Ma torana kogeena pa gelelo matero deo torana ma loa yasi dumutu manga sambayanga deo sininga i memeneoso ma kai masalimoi deo loese ma sangisara. Duga, moi-moini geena koiwa ma gogoimi kama lakeme ma mau bato yasi niiki.