O'ni ni Sa'tu Walli ti Gadara Pa Pasalla Walli ti Kaballiku ¹ Da tomaka ti sa'mbali tamma ti manua Gadara, ² Banna mburru-I Yesus walli ti tena da olinggesa tu walli ti rati pasadopra mangutana na tabbukai Yesus. ³ Yinna ni ma engani ti rati, a'tomaka tu matawui 'badda randi waini galli 'bassi. ⁴ Badda kalli randi waikaddai galli 'bassi dangngu konga wissi takka napotisa mangngui ni parandi waidai, a'tomaka tu matawui bakatinggui. ⁵ Kirra laddu kadjinunga kawu-kawuna ti pannu rati dangngu ti pannu palendi lappa banna pamanuwa wikkina waina watu. ⁶ Badda eta malerusai Mori Yesus, na pa'lai dangngu na karoduka ti sagana-I Yesus. ⁷ Baisa banna kawu-kawu pawandi na banna panewi, linna: "Yesus Ana Nai Mori Allah Madjaga, pani pongngudai Nyuwwu dangngu yauwa? Ku dangngi ti You ti dalu ngaranai Mori Allah amba pa'njarrakiwa yauwa." ⁸ Mullana, banna panewi nakka Yesus ti sagana: "Lusawuka you mangutana walli ti tu ni'a." ⁹ Baisaka, Yesus Na pakkatana ti tu nu: "Hegassa ni ngaramu?" Dangngu na simai: "Mullani bamma 'danguka, ni ngaranggu Legion." ¹⁰ Na dangngi pangala-ngala ti Yesus "amba piani mbawudara walli ti tu hai" ¹¹ Hai sa'mbali o'di ni wawi ma pakangotina tanga ngari ti ma paka'bundukanna. ¹² Ndewa-ndewa irraka yena da dangngi ti Yesus; "Palewa makka yami kamma tamaka ti wawi pakangotina." ¹³ Yesus na o'anja ni patekki da, baisaka ni ndewa irraka yena tamadai ti wawi a pakangotina; bakka patutukassa toma duarata, dangngu pallaidai ti kella lappakassa ba mummusa ti tamma. ¹⁴ Baisaka, yidda madawwai wawi palaidassa badda lau papeka ti kota dangngu ti manua dangngu lusa dabbadassa tu do badda panga'du pani'sa ma'dadi. ¹⁵ Takka tu do da mai ti Yesus da etai yinna no yena ni pasadopara mangutana a mangngu legion tanga ma'ndiddina banna paki na kala'mbi dangngu na dassabalika. Takka yidda tu 'dangu yena da madauta dangngani. ¹⁶ Takka yidda ma eta ni hai, baisaka 'didda lolukai ti tu appalinnisama pata 'dadinissa no ni tu pasadopara mangutana dangu ni ngera ni wawi-wawi ndo. ¹⁷ Tunihaika da dangngi Yesus kanna kainakka walli ti manua da yidda. ¹⁸ Ti rasihai, Yesus Na sawi ti tena, no ni tu yena pasadopara mangutana ba pia kaddani kakku karangnga-Ni Yesus. ¹⁹ Yesus atta Na 'bissumanika, takka Na panewi ti sa'da na: "'baliwukka ti anguamu, lolukadassa ni ngera ni ni papawoluNai Muri ti sa'damu ba Yinnai Muri ni ma ayi namuwa yauwa." ²⁰ Makka salakunassa 'banna palolukanggi panilinnasama ni pawoluNai Muri Yesus to kota Dekapolis dangngu ngaranduka da tu langada ndabba 'dassa. Na Pakaddi Ana Nai Yairus dangngu Ni Kawinni ma Sobuna Da Patanggasai ²¹ Tomaka banna pallaka Yesus walli ti sa'mbali tamma waina tena, da paka'buana tu walli ti karasa-Na, dangngu Yinna haini ti karasa tamma. ²² Baisaka ni sa'tu ni katowa Sinagoge ni ma mangarana Yairus na mai dangngu banna etasa-I Yesus, na kasokura ti wissi-Na. ²³ Na dangngi walli ati ti sada-Nai Yesus, linna: "Ni ana kamurringgu ma 'dikku takki njappuka. Maiwukka dangngu tauni lumma ti pannu kalitta na kapiani banna tanggasa dangngu kanna muripa." ²⁴ Baisaka, Yesus Na salaku karangani Yairus dangu langngutakka makeri Yesus dangngu ma makambomburani. ²⁵ O'ni ni sa'tu kawinni ma sakkabullu duada taunakka banna sobuna ra. ²⁶ Ana lalu sobunai labba na toma ti ndotira dangngu runggi langutakka, atta paeta amma punggi rukku tanggasana; takka risi atta ndassa ni. ²⁷ Baisaka banna rangngisa Yesus ba o'Ni, na mai ti ka'jonga tu 'dangu banna ketanggi ni kala'mbi kalada-Nai Yesus. ²⁸ Ni kawinni yena na panewi: "bakku lauka paketanggi ni kala'mbi kalada Na takka kutanggasa wa" ²⁹ Tanga hainissa banna ketanggi ni kala'mbi kalada-Nai Yesus, ullu na tanggasa 'bali walli ti ana lalu na. ³⁰ Na lakkasa mangngu kaddanggi Yesus ba o'makaetanggi ni kala'mbi kalada dangngu ba paddanggi ba o'bisa malusa walli ti kalitta Na, takka Na pakatana mangnguna ti tu ma dangu: "Hengga maketanggai ni kala'mbi kalada-Nggu yena?" ³¹ Baisaka didda simai murid tanna: "Yo yena mulakkasanggi ba pa ndappinatanna tu ma dangu takka Mu pakatana walli punna-Wu he nggai ma ketanggi ni kala'mbi-Nggu lummu walliwu." ³² Baisaka Yesus Na pangadu ti karasa Naherrai ni maketanggi ni kala'mbi kalada Na. ³³ Takka no ni kawinni yena banna lakkasanja pani ni ma'dadi, madauta nassa dangngu ka'ndanda kannasa. Mainassa ti Muri Yesus banna kasokura dangngu na loluka ndabbanarri ngara ndukkanarri ni mapullu pia. ³⁴ Tunihaisa Na panewi Yesus ti kawinni no yena: "Ana-Nggu, ni pawaimu tanggasa dangnganja. 'Baliwukka dangngu ngindisa ni ma'ndassa kau tanggasawukka." ³⁵ Tanga panewi-Nai Yesus hammi ndarra tu walli ti umma ma katowanggi ni Sinagoge: "Anamu mbadda jappu nakka, kaddi mu sulluulla walli Ni Nggurru?" ³⁶ Takka Yesus atta Na mbussa amma parangngi pani pa panewi da. Yesus linna ni ma katowanggi ni sinagoge go: "Amba ma'ndautamaka, wai wakka." ³⁷ Baisa, Yesus atta na ya ammandarra kalongga heraki makeri Yinna takka Petrus, dangngui Yakobus, dangngui Yohanes nyuwwu nai Yakobus. ³⁸ Tunnisa haina takka 'dassa ti umma nai ni makatowanggi ni Sinagoge, Yesus na eta ma kakawukka, dangu mangngu tu ma mangasih dangngu li ma kalada. ³⁹ Baisaka na tamakai Yesus lindara "Kaddi dimmi ka kawukammi dangngu mi mangasi? No ni allakawa atta na njappu amma pu, maturru kannasa." ⁴⁰ Takka da rikki dangngani Yesus. Tuni haisa Na palewa ndabbara ngarandukka da tu palusa dangngu ma wi;ndira ama na dangngu ni Inna na allakawa no lappaka tu dangu makeri Yinna. Baisaka didda tama ti koru ti panyia na ni allakawa. ⁴¹ Baisaka haina na ketanggi ni lumma na ni allakawa, Na panewi: "Talitakum (ni wukkuna: Annakarra, lung-Nggu: Kaddiwukka!)" ⁴² Allakawa kawinni no yena kaddinassa pa'ndengira dangngu banna loloyarra, mabba sakkabullu duada taunakka dangngu ngara'ndukka da tu ullu langada 'dassa. ⁴³ Tunnisa haina Na pa paretara inna ama na ni allakawa no ka ammaba o punggu da tu ma lakkasanggi ni ma 'dadi dangngu linna ndarra kai yanisa pa nga.