¹ Ta yimmi tu Galatia ma kabangnga! Hegai ni ma Pamanadawu? Angga Yinnai Muri Yesus Kristus ni pa Sarikka ti sangga mata tu madangngu? ² Sisa nggi ni pawukku pa katana nggu ti yona, Apalinni yimmi bai kawi ni Roh mulani ba mi keri ni Hukum Taurat, aita angga rangngi dangngu ni pawaimi? ³ Anggakabangnga ma kamissa? Yimmi badda manyulu waimissa dangngu ni Roh, takka hallu kamma padirra wainggi ni tolu limmi? ⁴ Angnga li loku mussa bau sadukka dangnga ndi ndo ni ma dangngu-nika ndo ba ma lilokuri? ⁵ Baisa, apalinni Yinn banna yadai ni Roh ti yitta dangngu wolu ni tada ti dalu mi yimmi mulani yimmi mi pa salakui ni Hukum Taurat, aitakaka mulani bau rangngi dangngu ni pa pawaimu? ⁶ Sama tunai Abrahambanna pawai ti Maramba Allah baisa nggo na kirai ti yinna ba ma pulupiai. ⁷ Mulani nggo, kammi lakkasa nggi ba tu ma pawai ni patakki da ana-ana Abraham. ⁸ Bukku Kalada, ni ma lakkasa manyulu nggi 'bai Muri Allah nimma pa pullu piara tu-tu ma atta Yahudi dangngu pawai, badda manyulunakka banna pa tomangngi ni injil ti Abraham dangngu na panewi, "Ngaradukka na ni ti da pa maringngi pa malalara ti 'dalu mu yona." ⁹ Baisaka, yid'da ma pa wai 'da pa maringngi pa malalara 'dangngui Abraham, no ni tu ma pawai. ¹⁰ Ngaradukkana ni tu ma pasaraina ti Paramma Hukum Taurat oni ti bawa yura, badda o nggi ni pa tulisa: "Mati kadippu desa wukka tu ma atta wai ni ngaradukka dabba ni pa tuli da ti dalu Bukku Hukum Taurat dangngu na padowi." ¹¹ Baisaka, tarrangngunassa hallu ba atta oma sa'tu widdi ni pa pulu piada ti saganai Allah ti Hukum Taurat, mulani, "Tu ma pulupi da muripa ti pawai." ¹² Takka yinni, Hukum Taurat atta na pa lata ammai ti iman. Tumannu kadawalini, "tu ma pa salakui ni Hukum Taurat na murippa mulani yinni." ¹³ Kristus na na bayada yitta walliti sara Hukum Taurat dangngu ni ma dadi sarana ti yitta, sama'tu ni pa badda tuli da, "Na mati kadappu 'desa ni tu ni pa tewilla 'da ti ti yai sarikka!" ¹⁴ 'Dangngu 'ba o da ti 'dalunai Yesus Kristus, ni We Maringngi We Malalanai Abraham na tomai ti yitta tu ma atta Yahudi ka'piani 'dangngu ni iman yitta ta koligi ni Roh ni pa 'badda turra nja nji da. ¹⁵ Olidadi-olidadi, yawwa ku yagummi ngerani waliti muripa kira la'du: ni turra nja nji badda o'a linni dabbasa, lang'ka dani ni pa posa da ti ngera da yitta turara, takka atta o ma tu ma pa batallai dangngu ma pa tabanggi pani widdi ni ma ona ti turra nja nji ndo. ¹⁶ Hallu, ngerani ni turra nja nji ni pa patomanai Allah ti Abraham, dangngu ti nyuwwunna. Allah atta linna ma, " ....... ti nyuwwu-nyuwwuna," ma dodukai ti sa'tu tu ti ngaradukka nyuwwuna. ".....dangngu ti nyuwwu-nyuwwumu" dodukanai sa'tu, yinna Kristus. ¹⁷ Wukkungngu, Hukum Taurat ni ma sungnga 430 tau ti sabalini hai atta pia manika padirra ni turra nja nji ni pa badda pa materainai Allah. ¹⁸ badda lata wai ti Hukum Taurat ni ngawumu, ni ngawu mu atta o mandikati lata ni turr nja nji.. takka yinni, Allah na ya'i ti Abraham ti dalu turra nja nji. ¹⁹ Baisa, kaddi o'nggi ni Hukum Taurat? Hukum Taurat 'da yai mullani pa djala-djala, toma 'banna mai ti nyuwwuna no na mai samatuni wukkuni turra njanji nggo ndi wolui. Hukum Taurat 'da wainggi na lii ti ngarandukka malaikat 'dangngu ni pa patomanggi. ²⁰ Takka ma patoma atta tutuni sa'tu amma, mabba Allah no sa'tu. Ni Wukkuni Ni Hukum Taurat ²¹ Ba tuni hai makaddai, Appalinni ni Hukum Taurat na palawanarri dangngu ni turra nja nji nai Allah? Takka rinna aitama! Mulani, ni Hukum Taurat da ya'i ka piani ba murippa, ni ma pulupia wali makadanni ti Hukum Taurat. ²² Takka rinni, Kitab Suci badda hukku nassa ngaradukka ni dangngu ngaradukka da tu ti 'bawa jala kapiani ni turra nja nji ni Iman ti dalu nai Yesus Kristus piani badda ya'i ti yimmi ma pawai. ²³ Iman atta na maipui, yitta da hukkuda ti bawa Hukum Taurat da taha'nda samatu pa hukku labba banna tomai ni Iman banna takkai batta pa takkanggi. ²⁴ Ma tuni haisa, ni Hukum Taurat ni nimma awasanda yitta tomai Kristus banna takka kapiani yitta badda pa pullu pia'nda ti iman. ²⁵ Hallu, iman badda mainikka yitta atta pa wai amanja ni Hukum Taurat banna awasada yitta. ²⁶ Ti dalunai Yesus Kristus, yimmi ngaradukka dabbami ana nai Muri Allah ti iman. ²⁷ Yimmi ngadukkami pa badda rissa ti dalunai Muri Yesus Kristu badda pakimissa Kristus. ²⁸ Atta o ma ka tu Yahudi aitakaka tu Yunani, ata aitakaka tu ma kaloga, mani aitakaka kawinni mabba yimmi ngaradukkami sisa mi ti dalu nai Muri Yesus Kristus. ²⁹ Yimmi nika ba tunai Muri Yesus Kristus mi yimmi waliti dalaranai Abraham dangngu ahli-ahli waris kerilolui ni turra nja nji.