¹ Yimmi maramba, mi panaura ata mi yimmi ti dalu dassa dangngu pulu pia ma'yimmi badda lakkassa ma kadammi ba o mangngu Muri mi ti Surga. ² Mi pakinja mi ti sabaya, dangngu mi maga-maga dangngu mi pa osanggi. ³ Sabaya wali tutu ma yami kapia ni Muri Allah na buai ni malowi ti Firman dangngu yitta ta padowu nggi ni rasia nai Kristus, ma'ba mulani yawwa da patamangga ti koru gallu. ⁴ Sabaya ka piani yawwa ba ku patoma dangngu dassanggi sama'tu yawwa ni pa panwinggu. ⁵ Ni pata akuran'da ti tu sawawi ta wainggi ni rasi dangngu dassa. ⁶ Ni pa takki'da na pa ayi, ta pamassi wainggi masi, ka pia wallini bau lakkasa nggi appalinni samai bau simara tu. ⁷ Tikhikus ka malolukagummi ngaradukka ni pa'dalu ngera nggu yawwa. Yinna oladi seiman da yitta ma pa bussa, ata ma pakeri lolui, dangngu oli rammai ti dalu nai Muri. ⁸ Yawwa ku palewai yinna ti yimmi dangngu ni wukkuni kapia lakkasa nggi ngerama yami dangngu kapiani yinna banna pa pakaluai ni atimi. ⁹ Yinna na mai dangngu Onesimus, oladi seiman da yitta ma pakeriloluna dangngu na pa bussa na, sa'tu waliti jonga mi yimmi. Yidda kadda pa pekanggumi yimmi ngaradukkani ma dadi siana. ¹⁰ Ni olinggu ma sisa koru gallu dangnga nga, Aristarkhus, na pangindi nggummi li madassa ti yimmi, tu mangngu walini Markus, lebanai Barnabas, nimma ngerana yinna na patakkanggumi lara; yema sa yinna banna mai ti yimmi. ¹¹ Dangngu o walli li wali ti Yesus, ni pa kayeka'da Yustus. Ti jonga oli ramma nggu tutuni Kerajaan Allah, da'da yidda diana wal ti dalara da tu ma atta salla, dangngu yidda ma onggalla dangnga kingga. ¹² Epafras, oladi seiman mi, ata nai Kristus Yesus, na pangindi mangngu na li tutumi yimmi. Yinna taumi ti dalu sabaya, kapia mi yimmi ba dengira tijangngu dangngu mi wai dabbanggi ti dalu Wukkunai Allah. ¹³ Yawwa ku ya nggu mi apalinni yinna badda dangukka pa sadukka dangngana tutuni yimmi dangngu tutu'da yidda ma ona ti Laodikia dangngu Hierapolis. ¹⁴ Lukas, ni dotira ma pa oli bussa, dangngui Demas na pangindi na li tutu mi yimmi. ¹⁵ Pa toma nggi ni li nggu ti ngaradukka oladi seiman ti Laodikia, dangngu ti Nimfa dangngu Kalebu tu ma ona ti umma na. ¹⁶ Badda bacca sa ni surat nggia ti yimmi, bacca mangngu dai yidda tutuni Kalebu tu ti Laodikia, sama'tu walini, bacca mangngu ni surat tutuni Kalebu tu ti Laodikia. ¹⁷ Peka ni Arkhipus, " Boti nggi ka'piani yona bau baisai ni pa rammamu ni pa badda ya nai Muri." ¹⁸ Yawwa, Paulus, Ma tuli nggi ni li nggiana wainggi ni lumma wikkinggu. Namui, ni marandiwa. Namu ayi nai Muri Allah na koru maga'da.