¹ Baisaka, bakku olidadi nggumi, sambayama tutma yami, kapiani ni pulluNai Muri kanna nggesa paloduri dangngu kadda paosa, sama dangngu ni madadi ti jongami yimmi, ² dangngu yami kapia pasala dama walli ti tu ma banasa dangngu ma jahat takka atta ngarandukka tu ma kolinggi ni iman. ³ Takka Muri Na mbussa nda. Yinna ma yagumi kalua dangngu makoru magagumi yimmi walli ti tu jahat. ⁴ Yami makoligi ni pawaima ti Muri ni ngerami yimmi dangngu yimmi tanggu pasalakuni kai pasalaku pangala ni pa palewa waima yami. ⁵ Wallini ti Muri ma patanjinggumi ni atimu ti mbussaNai Allah dangngu maradda ati Nai Kristus. Kawattu Batta Ramma ⁶ Bakku olidadinggumi, nggiani yami paretami yimmi, ti ngaraNai Muri nda Yitta Yesus Kristus kapiani yimmi bai pamaleri wikkina walli ti olimu ma muripa bakka bulli ni ma atta pawannana ni anjara ni pakolimu yo walini ti yami. ⁷ Yimmi wikki mi lakkasanggi applini samani kai keri ni patoma yani atta ma bakka bulliama yami bama karangnganggu. ⁸ Yammi wikki aita ma ngama pangaa tu sawawi ba aita pabayarandi, sabalinihai, yimmi kai manyara kadanja kai rammani laddu kajiddunga kapiani yami amba mawolu ditama ti yidda ti jongami yimmi. ⁹ Aita niwalli yami ba atta ma kolinggi ni kawattuma, takka tutsa bamma ya wikkima yami wikki kai keri ni patoma tutmu yo dangngu yo mukeri lolu. ¹⁰ Takka yami tangnga karangnganggu, yami ma yagui ni pareta nggiana "Nikka o tu ma atta mbussana paramma, amba na ngada yinna" ¹¹ Mullanika yami ma rangngi o tu mapirra ti jongami ma muripa mabakka bulli, atta da bissu amma paramma, takka karingabba badda wolu ni ma atta gunnana. ¹² Tu samanihai, yami ma paretai dangngu yami ma panamuni ti naraNai Muri Yesus Kristus kanna ramma dangngu sannangu banna nganggi ni roti wikkina! ¹³ Takka yimmi baku olidadinggumi ambai ojama bai woluni ni mandassa. ¹⁴ Nikka o tu ma atta wai pani ni patakkima yami ti suratama nggia, patadani! Tu no amba palomai dangngadani dangngu yinna kanna makaya. ¹⁵ Takka, amba woludai yinna samatu mussumu, takka panewi danngani samatu angu nguwamu. Panewi-Panewi Magamurri ¹⁶ Muri we maringngi we malala na yagui yo sannangu kira laddu lappaka ti mahammina. Muri na koru magagumi yimmi ngarandukkami. ¹⁷ Yawwa, Paulus, ma tuliinggi surata nggia wainggu lumma wikkinggi kapia tadami ni aslini ni suratanggu. Tunihaisa yawwa baku tulinggi. ¹⁸ We maringngi we malala wallini ti Muri nda yitta Yesus Kristus kanna koru magagumi yimmi ngarandukkami.