¹ Wali ti Simon Petrus, ti yidda ma bada kawinai ni ati wai mapa sama ti yami nimma bada ona ti pullu pianai Allah dangngu mapa mannu mara da yitta Yesus Kristus. ² Kapiani, ni muripa wali ti Allah dangngu ni pakasisa lakingu takkani ka yimmisa ti dalu lakasai Allah dangngu Yesus, Muri da yitta. Ni Tu Payeka Dangngu Papedi nai Allah ³ Ni hakku nima halluna bada tabbakana sa ti yitta ngara dukkanari ni ngera-ngera ma tama ti muripa dangngu ma ati ti palakasa ni yinna ma kayeka da yitta ba saganai ti Allah dangngu dassa-Na. ⁴ Ti yinna kada, Yinna bada yanarisa ti yitta ni tura jaji-Na ni makalada pungngu dangngu napa sinari dangngu nipa tura jajina hai ka piani bai keri kapia o panyia nari ti dalu madi nari dangngu na siging wali tima russa ma dadi ti pannu tana, nippa linari ni wodika dangu-dangu ⁵ Tutuni hai kai patalui pullu pia pungngui kana patabani ati waimu dangngu palakasa-palaksa dangngu ni lakasa, ⁶ Dangngu nilaksa waigi ni paduka wikki dangngu paduwikki dangngu maloyang, maloyang dangngu papa aka, ⁷ Nipa papa aka dangngu pa bussa wikkina tuma olidadina, dangngu ni pa bussa pa ata tutu wikki ⁸ Takka, ba odabba kandi ti sadamu dangngu napa taba-taba kanarisa, ma yimmi aitai sia-sia ama aita atta pawua ama ti lakasa ni Muri, Yesus Kristus. ⁹ Takka ni tu ma atta koli dabbapudi hai yinna kada ni tu ma atta eta pungngu dangngu kabola maba na bullaja, yinna bada pawarasai wali ti doku jalana na nyuluna ¹⁰ Ba nikadahai, angngu ngara dukkami, ramma padangu nami risipa wali hai kapiani ba pastigi, ba yimmi pulu piai makayekagumi dangngu padedi; ba nikka yimmi mapasalakuga yimmi attai gunggila ama. ¹¹ Ba tunihaika, ni malowi nima sagana ti sangaji maatta jappu nai Allah dangngu ni tanggu pamannu marada yitta Yesus Kristus na wailangu ti yo ¹² Ba nikadai yawwa diku pangadagi baku panamu pangatagi ti yo ni ngera-ngera, langnguka kabada lakasami dangngu dapa kadi mika ti dalu pakalua tima pullu pia nipa ngawumi gia. ¹³ Baku muripapu yawwa ti pata pannu tana yawwa ku palewa dangngu ku dassika waina para ni panamu, ¹⁴ Baku lakasaja kugesa padujakagi pata tu raragia samatuni-samatuni nida pabada patakana nawa yawwa tima wailangu yinna Murida yitta Kristus Yesus. ¹⁵ Dangngu yawwa ku usaha langu takai kawoluwu dangngu kupanamuguri dukkanari ba hallu kagaka. Saksi Ma Eta Waigi Mata Ni Tarrangu Nai Kristus. ¹⁶ Dangngu yami atta makeri mai dedaku pa loloka nipa taba-taba ba lolukagui ni hakku dangngu ni maina Muri da yitta, Yesus Kristus, takka ba yami kada saksi-saksi maeta waigi mata ni tarrangu-Na. ¹⁷ Ba tanga o ni Yesus bana kawi tabi dangngu ni tarangu nima walina ti Allah Ama, samatuni nipa lolukada wali tima risi pa Wailangu ba linnang-Gi "nia yinna kada ni Ana-Gu nippa bussanggu, dangngu ti Yinna ka nipa wanna Atigu," ¹⁸ Yami mannu marangngi nipa neini nima walina ti surga tanga karanga mai Yinna ti pannu tadulla bisa. ¹⁹ Yami walli ma lakasa langu takka gi nipa nubuat risi padasai dangngu kai pata padassagi wali bawagi, sama tuni bai etai ni illu ni mapa wailangu ni kapatta, lappa banna tomai ti baru-baru dangngu samatu kadinnu massaramu masungnga ti atimu. ²⁰ Takka ngerani maka wungnga nippa papa rada pungngu mi dakadani atta o ama nubuat ti bukku bisa ni walina pa katutuna ni sa tu-tu rara, ²¹ Atta stu pungu ammapu mamanyura ma sungnga wali tipa nimmula da turara aita walika ni tu mapa newi ti ngara nai Allah ba pungngigi ti Ngasu matua