Ne Mangewala Naburuwe ponu Tana ¹ Ne kaghungana niakido ne li'i, ne Li'i niadomodona Allah. ² Ne li'i napaiyadangani Allah gheti kaghungana. ³ Ngarakuanawe niadona apadadige. Badaiku Nia, ngarakua a ghaina, daikige. ⁴ Ne barana Nia ghaige toleka monno ne toleka Nia domodona mangewala ata pia. ⁵ Ne mangewala napatazzarage ne kapatta, monno ne kapatta dana paghezi kiwe. ⁶ ghai na ia ata papatukana Allah,ngarana yohanesa. ⁷ Nepamaidangana tubana mangewala gai kawaidabbage ata. ⁸ Na yohanesa indaniadoukina mangewala,takka ne bana maitekkinawe ne tubana mangewala. ⁹ Mangewala a dua langutakka Nia a pamangewala ngarakua ata,a mai ne ponutana. ¹⁰ Ne mangewala ghai memabage ne ponutana nia apadadige , takka ne ponutana da tadakiza. ¹¹ na pamai dou-Na, takka ghida douna da dibake Nia. ¹² Takka, ghidda dibba Nia na yadi boto gaika ana-ana Allahzi, ghidda awaina ne ngara-Na. ¹³ Ne bana dadi inda parawi bokalakida monno inda pa bei kabanikiwe, takka walina bara Allah. ¹⁴ Ne li'i na dadi kanaawe monno na dangiwe barada ghitto. Ne ghitto taetabawe ne mangewala, ne mangewala ana kanuana Ama na bonuge paghezzi monno na bia langgutakka . ¹⁵ Na Yohanesa na yawe ne taguna nia monno napadadalage, "Na niadona ghatti palangigu ghetti baku tekiwe, ' Ba nebadaiga zauwa, amini amai auluga, orona ghaimemaba Nia ba daipoga zauwa."' ¹⁶ Wali bara-Na, ghitto ngarakua tadibawe ne kanuru kanangga. ¹⁷ Niaka, ne paretana na yawe bara Musa, takka ne kanuru monno ne abia langutaka walina bara Yesu karitu. ¹⁸ Daiki ia ata aetaba Allah, aneena babadeta Ama, Nia aboghoge. patekina Yohanesa Pembaptis ¹⁹ Neniawe patekina Yohanesa ketika ata-ata Yahudi papatuka imam-imam monno ata lewi awalina Yerusalem monno atua na Yohanesa, "Garagu ghouu?" ²⁰ Na Yohanesa natekiwe, monno dana kedekiwe, monno na tekiwe ne aghina takkana, "Zauwa inda Yesu karitukiga." ²¹ Ghidda amatua barana, "ba ghinako, garagu ghouu? Apataka ghouu Elia?" Nia nawalewe, " Zauwa inda Eliakiga." "Apatakka ghouu ghetti Nabi?" Nia nawalewe, " Indaki." ²² Kabage, ghidda katekina barana, "Garagu ghouu, orona zamme kama ya pateki barada ata apatukama zamme? Apa ne pateki taguna tou doumu?" ²³ Yohanesa nawalewe aghinana pateki nabi Yesaya, "Zauwadona li'i ata a ghetti palangina Nabi Yesaya apadadalage ne tilu marada kikapa: 'Palurusa lara taguna mori!"' Yesaya 40:3 ²⁴ Ata-ata Yahudi a papatukada ghetti nialoloba ata Farisi. ²⁵ Bage, ghidda ka tekiwe bara yohanesa, " Ba ghouu inda Mesiaskughu, inda Eliakughu, monno Inda nabikughu, bakka apa ghou bumabaptisa?" ²⁶ Yohanesa na walezi ghidda, "Zauwa kumababtisa waina we'e, takka ne tidi barami yemmi dede iya ata dapa pademi yemmi. ²⁷ Niadona amai liragu zauwa. Ne babughenadi kalere kapeghaina, daku pantasaki." ²⁸ Ngarakuakona ghetti na dadi ghaiwe ne Betania, ne bali loko Yordana, padou Yohanesa bana mabaptisa. Ana bebe Allah ²⁹ Na mewage tana, na Yohanesa na Yesusa amai barana, monno Yohanesa na tekiwe, "Etaza, Ana bebe Allah aopi zala ponu tana! ³⁰ Niadona ghetti palagigu ne baku teki, 'ne baligu zauwa amini nammi ata alouka kiapakaladana wali zauwa orona nia ghaimemabai Nia ba daipoga zauwa. ³¹ Ghetipona, zauwa daku padeki Nia, takka gai ka tekiwe bara ata Israel, niawe kakumaiga pamabaptisa waina we'e." ³² Monno, Yohanesa nateki, ghinage, "zauwa ku eta ne ngau aburu wali langitadeta apatudana keila merpati monno ne ngau na dangiwe ne barana. ³³ zauwa douna daku padeki Nia, takka Nia apatukaga zauwa gaii kamabaptisa waina we'e na tekiga baragu, 'Nia aneena togona paetami na ngau aburu monno adangi, Niadona abaptisawaimigi ngau erri.' ³⁴ zauwa douna ku eta monno na yaga pateki bania nagha ana Allah."' Ana-Ana papanungana Yesusa a Ullu ³⁵ Na mewage tana, Yohanesa na dede dangadi aduada ana papanungana, ³⁶ monno nia na eta Yesusa akako. Yohanesa kana tekiwe, "Etaza, Ana Bebe Allah!" ³⁷ Kaghidda aduada ana papanungana arengewe ne patekina, kadeku namaramba Yesusa. ³⁸ Yesusa na gilaka ne lira monno kana etazi badekuni, Nia kana tekiwe barada ghidda, "Appa paghegami?" Ghidda katekiwe bara-Na, "Rabi (a ne paterjemahkanda a artina: Guru), geniage padou dangimu?" ³⁹ Nia napaneghe barada ghidda, "Mai monno kietawe." kabage, ghidda kamai monno ba eta padouna Nia bana dangi monno ghidda adangi dabba orona gheghetti noto jam kesepuluh. ⁴⁰ Na ia wali duada ana papanungana arengewe ne pateki Yohanesa bage ba deku Yesusa niadona Andreas, angua Simon Petrusa. ⁴¹ Netipona, Andreas napatabokadangani Simona, anguana, monno napalaranawe, "zamme matabokaba Mesias (a nepaterjemakanda ajadi 'Kritu')." ⁴² Kabage, Andreas na ghinde Simona bara Yesusa. Yesusa napazarai Simona monno napaneghe, "ghouu Simona, ana Yohanesa. Ghouu akadangagu kefasa (a artina 'Petrusa' atau 'watu')." ⁴³ Namewage tana, Yesusa napangadage kako ne'e Galilea. Nia napatabokadangani Filipusa monno kana tekina barana, "Dekuga zauwa!" ⁴⁴ Filipusa wali ghaina Betsaida, wanno padou dangida Andreasa monno petrusa. ⁴⁵ Filipusa na patabokadangani Natanael monno kana tekina barana, "zamme ma tabokaba Nia ghatti patulisana Musa ne hukum taurat dana monno ngara nabi, Niadona Yesusa wali Nazareta, ana Yusufa." ⁴⁶ Natanael napaneghe barana, "Noto enga ammige adua wali Nazareta?" Filipusa napaneghe barana, "Mai monno etaza." ⁴⁷ Yesusa naeta Natanael ba ammi barana monno natekiwe taguna Natanael, "Etawe, ata Israel sejati, daiki boto ne barana nia!" ⁴⁸ Natanael namatua, "peipatana ghouu bu padega zauwa?" Yesusa na wale, "badana kadangapugu Filipusa, zauwa ku eta memebagu baneegu ghouu ne ne kabu ghazu ara." ⁴⁹ Walena Natanael, "Rabi, Ghouu loloba ana Allah. Ghouu loloba tokko ata Israel." ⁵⁰ Yesusa na walewe monno napaneghe barana, "orona zauwa kupaneghe baramu, 'zauwa kuetagu ne kabu ghazu ara', Niaka Ghouu ku waige? ghouu ba mueta hal-hal alouka pakaladakiana wali neghe!" ⁵¹ Bage, Nia napakitage, "aghinatakana, bakutekigo baramu, ghouu bamueta langita amabughe monno malaikat-malaikata Allah pene buru na layani Ana ata pia."