¹ de i unonu Tumpu ko pokinde mongkalibosi, posaanguan santuu nu Tumpu,. ² posukupmo na kasananganku, oposangu' na pikilan, pinosangu' i uno nu santuu, ka montumpuii sa'angu' na makisud. ³ bolimo mombau anu mompo untung posi butong kabai kakama'an anu madi ko kaliangannyo panyo matialuk na kinyonyoa, popohimona pee na kapalaluan nu mian. ⁴ boli mositoa kapalaluan posi butongmiu, panyo tiba kapalaluan nu mian sagaat. ⁵ bakaso napontutugi i olot miu sumo anu nutumpui i Yesus Kristus. ⁶ anu maupee nutumpui sumo i Allah, Ia mbaan mompokakanaakon Nyo ka I Allah susumo anu timbali o tingkuii. ⁷ tompibalik, Ia mbaan mombau butungNyo montumpii apaa-apaa ka mule obau posaihon da timbali pokakana ka' manusia. ⁸ i unon nu butongNyo sumo manusia, ia matialuk na butongNyo ka mule tulut toka ia sinalakomo, ka mule mate di kayuk salib. ⁹ kabalatan ayamo, i Allah talalo mompotangkas Ia ka' mule mombeii kaimaan hi Ia sanggo i ata songko-songko na sanggo'. ¹⁰ da i unonu sanggo i Yesus, to buku-buku balindupu, anu i langaa' maumule aiya i dunia, i unonu tano. ¹¹ ka' mule jilak mompotoii Kristus Yesus, iamo na Tumpu, anu matangkas na kuasaNyo! Allah mokalaja i uno kita. ¹² kalana aitu, to utu-utus anu kukalibosi, susumo belemiu saja tulut, misak de aku ka' belemiu, molingkudui uka aku mbaa o ko pokakana , kalajamo na kasalamatannum ka mule matakut. ¹³ mokonyo i Allahmo mule na mokalaja i iunonu belemiu, somo anu mongkahandai kabai bau mokalaja apa na anu momposanang Tumpu. ¹⁴ baumo ingko-ingkot na atina boli ola goguoton ka mahantawewe ¹⁵ da boli komiu maidek ka' tasala', sumo to anak-anak i Allah anu mbaan maidek na kalakuan i totonga' ka'' adaan anu tageok tempo' uka, mokonyo komiu monjingkaai i totonga' i olot nuaha sumo jingkahang i dunia. ¹⁶ mintoong mado-dodoh sisik nukantumuan da toka i sinaa mule i Kristus, aku kokabalatan da ta takabun aku mbaan mopadeka ala-alai ka' mokalaja ala-alai. ¹⁷ maumule aku tionyo mombubusakon susumo galas ponginuman i ata palosombahan ka' mule anu mokalaja i iman nu belemiu, aku ba lame-lame' ka' komiu ingko-ingkot. ¹⁸ sumo atumo na' komiu ko kabalatan anu pokakana, ba lame-lame tiba aku. ¹⁹ I uno nu Tumpu Yesus, aku tahaiman da malia mompokau i Timotius toka hi komiu da aku talahibun salata mohongo lele miu. ²⁰ maka' aku mbaan montumpui mian sagaat susumo hi ia, anu totu-totuu monginau kapalaluan miu. ²¹ maka, anu sagaat ola lajangon montutugi kapalaluan posi komiu, misak kapalaluan i Kristus Yesus. ²² sumo komiu monsumbu' i Timotius momposubu o butongnyo ko' halaga'nyo, ia timbalimo polaya' tiba aku bau kamajuan nu lele maima sumo samian na anak tokahi tumanyo. ²³ kalana sumoaitu aku tahaiman da timbali sampa mompokau ia' salata aku monsumbu' apa na anu binau tiba aku. ²⁴ ka aku mule palesaya hi Tumpu, posi aku malia-liaje toka hi komiu. ²⁵ panyo, aku montutugi palalu hondo na mompokau' Epafroditus da toka hikomiu. Iamo na utusku, sangalungku sampo kalajangku ka' mule anu momboa potoion toka hikomiu ka' mule anu momposadiai kapalaluanku. ²⁶ ka' mule, ia tahahu hondo liing hikomiu ingko-ingkot ka' maidek na kinyonyoa mohongo ia mapalak. ²⁷ Totuu ukamae ia na mapalak koboli silakamo, panyo i Allah nompotoa libosnyo hi ia ka' misa ola hi ia, panyo tiba hiyau' da mule kasusaanku mbaan ko nyonjoknyo. ²⁸ Kalana aitu, aku timbalimo ko kahanda hondo-hondo mompokau' ia da minsusule' hi komiu da komiu lame' na montoa montoa mule ia, da mongabato na bata-bataku . ²⁹ Labot na i Apafroditus i unu nu Tumpu ka' lame-lame' ka' mule holomati na to' mia-mian anu sumo ia. ³⁰ Kalana, ia koboli silaka kalana nokalajakon kalaja nu Kristus; ia monsabilakonmo butong bau pombolosi pontulungi anu timbali o be' miu hi yau'.