¹ Mapenatua ino ke Gayus tidodora, tidora igogoungu. ² Nongoru tonidora, ngoji togoloko kalaha ngini kainibiloloa kalaha ngini niaroese kaipoputurungu, maruka de ka nia jiwa. ³ Sababu ngoji tomorene oras riaka- nongoru niakaino nisidemo niagogoungu, konoke ange manena neango igogoungu madojaka. ⁴ Ngoji tomorene ifoloi waktu toisene aji ngowa-ngowaka nitagi igogoungu madojaka. ⁵ Nongoru toni dora, ngini nialeleani de niadangaro ingodumu nia manarama ke nariaka- nongoruika, ngaro ona nyawa masomoa. ⁶ Ona isidemoka tongini nia dora jamaat mamabionoka. Ngini done niaakana jaloloa nakoso nijariwo ona jadowama nia dodagi imakadaene ke Ma Jouika. V 7 Sababu, ona jotagioka sababu Romanga manege, okiaua jajie nyawa-nyawa ino jongagakua. ⁸ Sababu manege ngini muse nijariwo nyawa-nyawa maruka ona supaya ngone idadi mamadodiawo leleani-leleani igogongu. ⁹ Ngoji talefoka surati ke jamaat, duru Diotrefes, omagae osidumutu ailohi onaika, ngomi omingakua. ¹⁰ Sababu manege, nakoso ngoji tosuwutu, ngoji done to sidemo ai tabiat, romanga ma dorou omigakana de demo-demo jatotorou! kamageua, unalo oholuku ojatarimaua riaka-nongoru josuwutu de ojasimahaua ona ijatatarima riaka-nongoru manege de ojasitingaka jamatino. ¹¹ Ajidodiawo tonidora, ua namoteke jatotorou tatapi jaloloa. Nyawa yang jakana jaloloa manege Majou ino, tatapi nyawa yang jakana jatotorou, ona ilegawasi Majou. ¹² Nyawa ijangodumu isidemo jaloloa mangale Demitrius, de igogongu osidemo komage. Ngomilo misidemo, de nginilo nisiodaka mia demo igogongu. ¹³ Hal kaingoe ngoji talefo kengonaika, duru ngoji talefoua ngonaika pena de tinta. ¹⁴ Ngoji tonganono womakamake itaiti de ngona womakisidemo biono de biono. ¹⁵ Sanangi de loloa kengona. Dodiawo-dodiawo maneoka misiokoto tabea kengonaika. Nosiadono mia tabea ke nariaka-nongoruika dokamaka.