Ha Ullai Yohanes Pembaptis ¹ Ta dau ha kabulu limma wai harehanai Kaisar Tiberius, kolei Pontius Pilatus dadi Gubernur Yudea, Herodes dadi raja Galilea; Filipus angu wuyo Herodes dadi raja kalingora Iturea mono Trakhonitis; mono Lisanias dadi raja Abilene, ² Hanas monoi Kayafas bana narroge bai rato, ammige linai Allah tabrai Yohanes, anai Zakharia, ka engana tamaradda gilra. ³ Nyiwe, kako nagei Yohanes ta tangage kalingora Yordan mono talarage hariha jarra tutu hawali jala, ⁴ katauna kama tolha lari ta jurata Nabi Yesaya: "Inne nyiwe lina ata kawula ta marada gilra, ' Ha inya kayi lara tubanai Maori, kamu halurhayi lara tuba-Na. ⁵ Tangadi lolana enga bonyidi mono tangadi letena enga halija kayi. Lara kalego enga halurhayi, mono tangadi lara aika lijana enga halijakayi. ⁶ Mono, tangada ata enga eta dage manemara wali tai Mori!"' Yesaya 40 : 3-5 ⁷ Nyiwei, Yohanes linage tabara ata buta kamai harihayi nyi, "Ta, miyo ana huhui kaboko kahajalora! Iya kaha ape mige mamu malaimi wali ta bani nimi ka ammina? ⁸ Nyi oro bataudage inna, kamu wumila kaha tingoge jarrami. Ilam takki kawe tutu daumi, ' Abraham nyi ama weda mani!' Nauwa luguge tabarami, tau takka nage wali ta watu inne Allah na dadiwe ha dadidi lakawa tuba nai Abraham! ⁹ Lohho, wali batauge pogo ijala bewe ta kalarta pu yayu. Tangadi pu yayu aika wu dahha enga katodayi mono tubadi lari ta latti." ¹⁰ Ata daka nukawe tabarai Yohanes, "Nyi bataudage, aga dahona nami harayima?" ¹¹ Nyi na balehawe, "Tangada ata kamngu do balla na kalabbe, nyi na bawe dahoyi ta ata aik kadayo kalabbena. Mono, tangana ata ai kamngu ha yana, nyi na rayi jala hoge katauna." ¹² Kapirrana ata kahha walu katakku dummo ammidi kaha harihayi. Yidda da kanukawe tabrai Yohanes, "Guru, aga dahona nami harayima?" ¹³ Yohanes na takki dage yidda, "Ilam karai kami walu katakku rehi wali ha yannabe tubami." ¹⁴ Kapirana tentara kanukkawe tabarana, "Aga linna dawe nami? Aga dahona harayima?" Yohanes linnage tabrada yidda, "Ilam karai kami ammaha wali ta iya hingkayi waina karuhhuwe waleka waina hawau palekana. Hatutuwela taumu waidi gajimu." ¹⁵ KLole tangada ata tamrada mann ege ba ammini Mesias. yidda tangada da kanukawe lari ta ateda tutui Yohanes, appa nyiyo Kristus appa ba walle. ¹⁶ Yohanes na balehayi yidda mono linage, "Nauwa ug harihami waina weyo. Ta nyiduwe, Wu ata karehi bikta parehana wali ta nauwa enga ammini. Tutu ladda nadi kalarri kopa leduna nauwa dummo waleg marakkak mawa. Nyi enga hariha nagimi waini Waddi Katenguna mono latti. ¹⁷ Tapi nyura dabeni ta limmaNya tutu hamurrahage tana hadau hamo mono kahhayi gandum ka dahha lari ta galu-Na. Ta nyiduwe, Nyi enga tunnu nadi kuwa neda lari ta latti ai ka hilu badda." ¹⁸ Waidi li hanua wadeka, Yohanes na talarage li ege ate ta barada ata buta. Yohanes Pembaptis Hatamani Ta Gallu ¹⁹ Ta nyiduwe, oroi Yohanes hanamu nagei Herodes, raja kalingora, ta hada harayina tai Herodias, ole umma angu wunai Herodes, mono oro tangage hada japata harayina, ²⁰ nyiwe Herodes na tabayi radda ta atngadi waige ha tamani lari tagallu. YESUS HARIHAYI ²¹ Kole tangadi ata harihayi, Yesus dummo harihayi. Mono, kole Nyi bana sembayangna, Langta ma bugerawe ²² mono Waddi Bihha naburru tabaraNa napa hada ta gukku maupana. Nyiwe, dage liyo ka wali ta langta mono linaw, "Yau Ana-Gu hama nawaraGu. TabaraMula Nauwa ug baigu." Burru Dadinai Yesus ²³ Kolei Yesus halegewe ha ulla-Na, Nyi tallu kabulu dau bena. Ata da yappa dawe nadai Yesus anai Yusufuyi. Yusuf anai Eli. ²⁴ Eli anai Matat. Matat anai Lewi. Lewi anai Malkhi. Malkhi anai Yanai. Yanai anai Yusuf. ²⁵ Yusuf anai Matica. Matica anai Amos. Amos anai Nahum. Nahum anai Hesli. Hesli anai Nagai. ²⁶ Nagai anai Maat. Maat anai Matica. Matica anai Simei. Simei anai Yosekh. Yosekh anai Yoda. ²⁷ Yoda anai Yohanan. Yohanan anai Resa. Resa nai Zerubabel. Zerubabel anai Sealtiel. Sealtiel anai Neri. ²⁸ Neri anai Malkhi. Malkhi anai Adi. Adi anai Kosam. Kosam anai Elmadam. Elmadam anai Er. ²⁹ Er anai Yesua. Yesua anai Eliezer. Eliezer anai Yorim. Yorim anai Matat. Matat anai Lewi. ³⁰ Lewi anai Simeon. Simeon anai Yehuda. Yehuda anai Yusuf. Yusuf anai Yonam. Yonam anai Elyakim. ³¹ Elyakim amai Melea. Melea anai Mina. Mina anai Matata. Matata anai Natan. Natan anai daud. ³² Daud anai Isai. Isai anai Obed. Obed anai Boas. Boas anai Salmon. Salmon anai Nahason. ³³ Nahason nyiyo anai aminadab. Aminadab anai Admin. Aminadab anai Arni. Arni anai Hezron. Hezron anai Peres. Peres anai Yehuda. ³⁴ Yehuda anai Yakub. Yakub anai Ishak. Ishak anai Abraham. Abraham anai Terah. Terah anai Nahor. ³⁵ Nahor anai Serug. Serug anai Rehu. Rehu anai Peleg. Peleg anai Eber. Eber anai Salmon. ³⁶ Salmon nyiyo anai Kenan. Kenan anai Arpakhsad. Arpakhsad anai Sem. Sem anai Nuh. Nuh anai Lamekh. ³⁷ Lamekh anai Metusalah. Metusalah anai Henokh. Henokh anai Yared. Yared anai Mahalaleel. Mahalaleel anai Kenan. ³⁸ Kenan anai Enos. Enos anai Set. Set anai Adam. Adam nyikna anai Allah.