Dahha Dete Pa Ama Yahudi ¹ Tamra hege innage, kole riwu ratada atage kama kahha mono yidda da ha deke wikkida, Yesus halege nage hanewe danga ulludi ana hakodona, "Hamatara ragela tabara haullada ata Farisi, halinawe dahha dete. ² Oro, tangage kama toni enga bugerage mono tangage ka bunyi enga ha dedoge. ³ Oroge inna, agawe hatakkimu lari ta kapagtana enga tangewe lari tama gakaha mono agawe mi hamamhami lari ta koro enga talarage ta panu toko umma. Madautani Allah ⁴ Nauwa luguge tabaramu. ta ole ate-Gu, ilam madautadi tabrada yidda kadadi hamatewe tau ata, tabolo beyo inna wale na dadik mawe rayige karehi kidikna wali inna. ⁵ Ta nyiduwe, Nauwa ug ha apemige tutu ba iyayi mi hamadauta homi; madauta kinila tabrana Nyi, ba kole bana hamate, nyi dau dummoge baita gimi miyo lari ta naraka. Ngo, Nyi dahhola ha madautami. ⁶ Wale limmak kidi ana manguyo hama laja ka hina duda ballak amaha? Ta nyiduwe, wale wu hing mana wali taka wurruna radda hadanga ta aronai Allah. ⁷ Lohho dummo, butadi wumu ta katakkumu na yapudi. Ilam madautawu, miyo rehi howe himi wali ta butada ana manguyo." Hanamu Tubada Ka Balluni Yesus ⁸ "Nauwa luguge tabaramu, tangana ata kama ngakuga Nauwa ta aro ata wadeka, dummo enga mangaku nadi Anana Kadadi ata ta aro da malaikat nai Allah. ⁹ Ta nyiduwe, tangana ata kaballluga Nauwa ta aro ata wadeka dummo enga kabal nani ta aro na malaikat nai Allah. ¹⁰ Mono, iya hingkayi ka takkiwe gabani Anana Kadadi ata dadwe ha walini, tabolo iya hingu kayi ka palekayi Waddi Bihha wale hilu ha walik mani. ¹¹ Kole yidda bada ngidimi ta Sinagoge mono ta raoda tangada pa ama mono kaduge hareha, ilam gela gaggami tutu aga linna dawe mi dedege taumi waleka aga dahona mi hatakkimi, ¹² oro Waddi Katenguna enga ha nua na gimi tutu aga dahhona mi hatakkimi."Hatujja Wu Ata Pote ¹³ Wu ata wali ta jonga ta buta radda linage tabarai Yesus, "Guru, halewa gani angu wugu kana habawedi hadauma." ¹⁴ Ta nyiduwe, Yesus linage tabarana, "Anguwu, iya ka keketawa Nauwa dadi kadauge tijana waleka wunang ta miyo?" ¹⁵ Bege, Yesus linage tabarada yidda, "Karawa mono hamatara wiki kimila ta tangadi hada dadara oro morhana wu ata wale na dairo dakmawe ta ngawuna kabuta nyi hadauna." ¹⁶ Nyiwe, Yesus naha takkiyi wu hatujja tabarada yidda, "Dage tana hadu wu ata kahadda pote ka kolena kabutala ngihi pa ullana. ¹⁷ Nyiwe, ata nadda naha ngadage lari ta atena, 'Aga dahona ha rayigu oro nauwa ai damo hadau wali hadi ijala gudi ngihi pa ullagu?' ¹⁸ Mono, nyi linage, 'Inna nyi dahowe harayigu, Nauwa enga hegara ho gudi galugu mono rayi walna ka rehi madakka. Nedda, nauwa enga ijala gudi tangada gandum mono ngawugu. ¹⁹ Nyiwe, nauwa luguni dewagu, 'Ta dewagu, yau dadi ngawu butamu ka bi dau bena ha ijala; ngahuwuge, yawu, enuwu, mono kadanna kaduwuge!' ²⁰ Ta nyiduwe Allah linage tabra ata radda, 'Ta, ata kabanga! Gaddi inna mema dummo, enga ngalawe wali tabarami. Nyiwe, iya dahho kadaudi ngawu radda ha ijalamu? ²¹ Tauda dagela kadadi ta ata ka ijala ngawu tuba tau dauda, ta nyiduwe wale da potekma ta aroi Allah."Ilam Gela Gaggami ²² Yesus linage tabara anaha kodo-Na, "Oroge inna, Nauwa luguge tabaramu, ilam gela gaggage tutu morhamu, tutu agana ha yamu. Waleka, gela gaggage tuba taumu, tutu aga naha waimi. ²³ Oro, morhami rehi banning hoge wali ta hayayo mono ta taumu rehi banning hoge wali ta kalabbe ²⁴ Torroyi ge gaka. Yidda wale da habarak mana waleka mangatti, yidda dummo wale lakma ijalada waleka galu, tabolo Allah yidda na yidi ha yayo. Miyo rehi mangu hida homi wali ta kawurruna radda. ²⁵ Iyayi ta jongami oro gela gaggana dadiwe tabawe dal ak morhana? ²⁶ Nyi mi ai na dadi kawe rayige hada kamarhha inna, ahha mi mamu gela gaggagwe hada wadeka? ²⁷ Hamatara kidi wala ruta ta maradda, aga linna dawe yidda bada tummu. Walla ruta radda walle da ulla biktak mana waleka wale da kamodetakma, tabolo Nauwa luguhge tabaramu, lohhoi Salomo lari ta ma nada dummona wale na waik mana kalabbe kadahha tau dana wali ta wala ruta radda. ²⁸ Nyi Allah bana hanukku kayi ruta ta maradda, nehhe laddo tummu mono koka baitani lari ta latti, wale tau dakna Nyi bana hanukkumi rehi wali ta ruta radda? Ta, miyo ai kaha tena takka! ²⁹ Nyiwe, ilam mayega dana aga dahona ha yami waleka aga dahona miyo ha enumi, mono illam oja dangage. ³⁰ Oro, tanhgada ata ta panu tana da mayegadi radda tangadi, tabolo Amami na tadawe inna miyo bamu kabu atedi. ³¹ Gaba dalge, mayega ullu toge Kalingora harehai Allah, nyiwe tangage inna enga taba mige tabarami." Kahhayi Ngawu Ta Surga ³² "Ilam madautami, ta miyo kalibbo ata kahodi kina, oro Amami na dadiwe bana yigimi tabarami Kalingora inna. ³³ Malajadila tangadi miyo hadaumi mono yikimila matullu. Rayi kina tutumi kaleku ammaha ai kadadi makbo, haluguna ngawu ta surga ai kadadi bunga, ai hadadina ngala ata kedu waleka makbo oro wana. ³⁴ Oro, taha daudi ngawumu, nedda jalawe atemu dau dage." Ata Paha Lewa Kamikku Rayige Ha Ullana ³⁵ "Nyidawege ka enga kige baggemu bamu kattige mono latti wemu bana rewoyi. ³⁶ Kamu dadi tujja dayila ata karemani morina hagga wali taha ulla ha ummana dajalage yidda kada geha bugerana binna tubana, kole morina nadda hagga mono kaladina binna. ³⁷ Da kanyuru hola ata paha lewa, ha dikkina morina pa inyaka hangatana, kole nyi ba ammini. Nauwa luguge tabarami, tau takka nage, nyi enga katti nage baggena bana hanukkuyi mono pahaidi kaha inyaka bana ngodo yayo. Nyi enga ammini mono hanukkuyi yidda. ³⁸ Nyi morina nadda ammini ba tillu gaddi kawe waleka ba kuku manu kawe mono dikidi yidda tamra pahada dage kataudana, daka nyurruho yidda! ³⁹ Tabolo kamu tadawela, nyi wu mori umma bana tadawe aga jam ata kadu bana mai ta ummana, nyi enga walena pahaik mage umma na bada bola nage. ⁴⁰ Oro bataudage inna, mi dummo um ha inyaka hangata hona oro Anana kadadi Ata enga ammini ta ma higgo ai hatada waimi ." ⁴¹ Bege, Petrus naka nukka tabara-Na, "Mori, appa Yau bamu takkiyi hatujja nadda dukka ta namihe waleka ta tanga dummona ata?" ⁴² Balehawei Mori, "Iyayi kapala kaha nukku ka mikku mono maniwola paha tenana morina tutu hamataradi atana wadeka, kapikku yidi yidda hayada ta rahi katuba? ⁴³ Naka nyurruho ata paha lewa nadda, kole morina ba ammini, diki dani nyi tamra rayi nage haullana. ⁴⁴ Nauwa luguge tabaramu, tau takka nage, mori nadda enga pede nani kapikku hamata radi tangadi hadauna. ⁴⁵ Ta nyiduwe, nyi atana nadda balinaka lari ta atena, ' Morigu enga walena gehakma mai,' mono kapunage paluyi ata paha lewa kabani mono ata pahalewa lawai wadeka, bege yayo mono enu kahha bada kalango, ⁴⁶ kolr morina nadda ammini ta mahiggo ai hama dammuna mono ai hatadana ata paha lewa nadda, morina enga hamate nani ata paha lewana nadda mono naha yodani oledi ata aika mikku. ⁴⁷ Wu ata paha lewa na tada dahowe ha baina morina, tabolo walena naha inya ha ngattak mana waleka na rayige dokuge hakabu atena morina enga naha kole habutana palu. ⁴⁸ Ta nyiduwe, ata paha lewa nadda wale na tadak mawe agawe hakabu atena morina mono rayige hada katuba bana yanna palu ka rauwana. Tabarana ata ha yiyo buta, karuhhu buta jala hoyi. Mono, yidda paha tena rehi buta enga karuhhu rehi buta jaladi. YESUS NA RAYIGE KAHA WATTENA ⁴⁹ Nauwa amiga bagu baitage latti ta panu tana, mono Nauwa ug kabu atege inna latti kana bak rewowe! ⁵⁰ Ta nyiduwe, dada hoge hariha Nauwa paha kako dahogu, mono Nauwa ug padage kama nakko kahha hada inna ba pannuwe. ⁵¹ Appa miyo um hangadage inna Nauwa ba ammiga ngidiwe kamoli ta panu tana? Walekma, Nauwa luguge tabarami, tabolo kaha watte nage! ⁵² Wali batauge, limma ata ta batu umma enga ha wattedi. Tauda ata enga gaba dadi duda ata mono duda ata enga gaba dadi tauda ata. ⁵³ Yidda enga ha watte dadi; Ha ama enga gaba nani ana kabanina, mono ana kabanina enga gaba nani amana. Ha inya enga gaba nadi ana lawaina, mono ana lawaina enga gaba dadi inyami. Maduyo lawai enga agaba nani we yana, mono ha we yayo enga gaba nani maduyo lawaina." Hayapage Mahiggo Morha ⁵⁴ Nyiwe, Yesus linage ta ata buta, "Kole miyo etawe karabba makahhawe ta laddo mali, mi geha limige , ' urra enga burruna,' mono urra tenawe na burru. ⁵⁵ Kole mi padani rereha wali ta bannu, miyo limmige, 'Laddo nehhe enga ngangahana,' mono hada inna tenawe na dadiwe. ⁵⁶ Mi ata kobo ate! Mi dadiwe tadawe hada langta mono tana, tabolo ahha mi walena nadadiwe ha yapage hada morha inna?" ⁵⁷ "Ahha mi dau walena dadiwe pohtawe agawe inna katena? ⁵⁸ Kole mi kako ole dangadi muhhumi kapiku arodi kaha reha, karuhhu dawela kahha bamu bewe ka hepa halana tabrana nutu ta lara dajalage nyi ilna wera kagu tabarana kaha tijage mono kaha tijage na yiwu tabarana ka oleni, mono ka oleni nadda enga tau nagu yau lari ta gallu. ⁵⁹ Nauwa luguge tabaramu, mi enga walem hukmana wali neda bali aim bayara dahodi wuttamu kahha beyi langka wallayi."