Ole Baina Yesus Wale Dahatenak Mayi Tabaran ¹ Bewe inna, Yesus na kilorage kako ta Galilea. Nyi wale na auma kako ta Yudea oro ata Yahudi neda bali kabu atege hamateyi Nyi. ² Kole inna, lado madaka ata Yahudi, haluguna lado madaka Kareka Royo, na dageta bewe. ³ Oroge Inna, ole bainai Yesus linage tabaraNa, "Kakowula wali inne ta Yudea dajalage ana hakodoMu dumo enga etawe haulla harayimu Yau. ⁴ Oro, wale lakma ata karayige aga hingkawe hada kabunyi nyi bana baikage batadayi tajonga ata buta. Nyi Yau rayige hada inna, hatingoge tauMu ta panu tana, " ⁵ Oro, ole baina Yesus dau dumo wale hatenakma tabaraNa. ⁶ Yesus linage tabrada yida, "MahiggoGu walna dikik mahowe, tabolo mahiggomu enga maiyaka hangatage. ⁷ Panu tana walena butuk magimi ate, tabolo panu tana butga ate nauwa oro Nauwa ug yiwa kadelaka ttutu panu tana, inna harayina duka japatawe. ⁸ Kakom tangami ta lado madaka inna. Nauwa walegu kakok mahowa oro rahige walina dikik mahowe." ⁹ Kole bana takkiwe katau danage, Yesus engana ta Galilea, ¹⁰ Tabolo, kole ole baiNa kako talado madaka inna, Yesus dumo kako neda bali, walena delakakma, tabolo wainage hada kabunyi. ¹¹ Ata Yahudi mayegani Nyi lar ta lado madaka inna, mono lidage, "Gini Nyiyo?" ¹² Da buta kaha newe kamamha tajonga ata buta tutuna Nyi. Da kalina, "Nyi ata dahayi." da dumo kalina, "Wallekma Nyi naha jalorai ata." ¹³ Tanyiduwe, wale wu hing mana ata kabani atena hanewe kahira tubana Nyi oro madautadi tabarada ata Yahudi. Yesus Naha Akkayi Ata Ta Uma Allah ¹⁴ Kole ba enga hoge rame lado madaka, Yesus tama nage ta Uma Allah mono kapunage ha akkayi ata. ¹⁵ Ata Yahudi da dadi hangatara mono lidage, "Aga linada ata nade katauda hingna tadana, walna hakolamo?" ¹⁶ Yesus na balehayi yida mono linage, "Ha akkagu wale walik mage ta tau dau wuGu, tabolo wali ta Nyiwe kaha lewawa Nauwa. ¹⁷ Nyi nada wu ata au rayige hakabu ateNai Allah, nyi natadawe ha akkaGu Nauwa, apa kawali tai Allah waleka kawali ta tau dauGu. ¹⁸ Ata kaha newe wali ta tau dauwuna mayega dahenage ha aka tutu tau dauna, tabolo ata kama yega ha aka tutuna Nyi kaha lewayi, nyi natena mono wale lakma ai katena lari ta tauna. ¹⁹ Nadai Musa walena yibe duyi Ukku pareha Taurat tabarami, tabolo wale wuhingmana wali tajongami ka dokudi ukku pareha rada? Ahha mi mami karuhhuwe tutu hamateWa Nauwa?" ²⁰ Ata buta rada balehawe, "Yau tama nagu wadi japata! Iyayi karuhwe ha mateWu?" ²¹ Yesus linage tabarada yida, "Nauwa duka rayige wu ha ulla mono mi hangatarami. ²² Musa na yibewe kabunyu, doku dage inna wale wali tai Musak mawe, tabolo wali ta weda waikami, mono mi um kabunyuni ata ta lado nagahu. ²³ Nyi nada wu ata kabunyu ta lado ngahu dajalage Ukku pareha Musa walegu layik mayi, aha mi mamu banim tabaraGu oro Nauwa bagu patagahayi wuata ta lado ngahu? ²⁴ Ilam yikani rakana olemi dukuge haeta waimi mata, tabolo yikini rakana waige li rakana ka tena." Apa Nai Yesus Yikna Mesias? ²⁵ Bege, kapirana ata kaengana ta Yerusalem linage, "Apa wale nyikakna ata nade hakabu ateda hamateyi? ²⁶ Tanyiduwe, etaige, Nyi naha newe kahira mono yida wale lakma hatak ada tabaraNa. Wale tadak dani rato-rato nada ba Nyi takka Kristus? ²⁷ Tanyiduwe, yitta tadawe giyo dau walina ata nade. Tamrage inna, kolei Kristus ammini, duku dage ba amkani Kristus, wale wu hing mana tadawe gi dau walina Nyi." ²⁸ Oroge inna, tamranai Yesus bana akkai ata ta Uma Allah, Nyi naka wula, "Mi um tadawa Nauwa mono gi dau waligu. Tabolo, Nauwa walegu mai mawa wali ta tau dauGu, taboloNyi kaha lewawa Nauwa yikna katena, mi walemu tadak mayi Nyi, ²⁹ Tabolo Nauwa ug tadyi Nyi oro nauwa wligu ta Nyila kaha lewaWa Nauwa." ³⁰ Loho, yida dakaruhuwe yapayi Nyi, tabolo lakma wuak ata kajojayi Nyi oro aina diki hewe rahige. ³¹ Tabolo, buta wali ta ata rada hatena tabarai Yesus. Yida lidage, "Banyi amkani Kristus, apa Nyi enga rehi rayi nadi kabuta tadka kaheka hadana wali parayi bena ata nade?" Rato Yahudi Karuhuwe Yapayi Yesus ³² Ata Farisi karangewe agawe hatakda ata buta rada tutnai Yesus, nyiwe rato-rato kapala mono ata Farisi halewayi ata ka anguge Uma Allah ka yapayi Nyi. ³³ Oroge inna, Yesus linage, "RahiGu bagu ole gimi hodi mowe lage mono be lage, Nauwa kako guge tabarana Nyi kaha lewawa Nauwa. ³⁴ Mi enga mayega miga nauwa, tabolo walem tabok mawa Nauwa. Mono, Ba gi dau daga, mi wale nadadik mawe mai neda bali." ³⁵ Ata Yahudi rada lidage diha-diha, "Gi dau kakona ata nade daja lage yitta wale nadadik mawe tabokayi Nyi? Apa Nyi enga kakona tabara ata Yahudi kama talara ta jonga ata Yunani, mono ha akkayi ata Yunani? ³⁶ Agawe kapege hatakNa, ' mi um mayegaga nauwa, tabolo enga walem tabok maWa. Mono, ba gi dau daga, mi walena dadik mawe kako neda bali?'" Hanewege Tutu Wadi Hiha ³⁷ Ta lado haduka waiwe, halinawe pudege rame inna, Yessu nadede mono kawula, linaGe, "Banyi daka kama riyo nyi kana mai tabaraGu mono kana enu. ³⁸ Ata kaha tena tabaraGu, tauna hatakna jurata biha, wali lar ta tauna enga laloge we morha." ³⁹ Inna hakabu atenai Yesus yikna waddi, pahibana ata kaha tena tabaraNa. Oro, waddi nada wale yikmahoyi oroi Yesus ai hama nada hoyi. Halummuge Tutui Yesus ⁴⁰ Kole yida bada rangewe hanewe inna, kapirana wali ta yida daha newe, "ata nade tau takka nage Nabiyi." ⁴¹ Ata wadeka daha newe, "Nyi nadai Kristus" Ata wadeka lidage bada hanewe, "Nadai Kristus wale walkak nage ta Galilea? ⁴² Inna ta jurata biha walena tak kakwe nadai Kristus bana wali ta ana suhui Daud mono wali ta Batlehem, deha hadaunai Daud ullu hoge? ⁴³ Loho, nadadiwi ge pahepa halana ta jongada ata rada orona Nyi. ⁴⁴ Kapirrana ata wali ta jongada yida kabu atege yapayi Yesus, tabolo wale wu hingmana ata KajojaYi. Kapirana Rato Yahudi Ai Kaha Tena ⁴⁵ Oroge inna, tangada kajawawe Uma Allah rada hagga tabara Rato-rato kapala mono ata Farisi, bada kanuka tabarada yida, "Aha mi walemi ngidi kayi Yesus?" ⁴⁶ Tangada ka jawawe Uma Allah rada da balehawe, "Wale wu hing mana ata ka kali hanewe katuja dayi ata nade!"' ⁴⁷ Ata Farisi rad da bale hayi yida, "Apa mi dumo naha jalora bemi? ⁴⁸ Da wu ata tajonga Rato wale dumo ata Farisi kaha tenabe tabaraNa? ⁴⁹ Ta yiduwe, ata buta aika tadayi Ukku pareha Taurat rade yidakna pa ha haura!" Hatulnai Niko Demus ⁵⁰ Tayidwe, Nikodemus, wu ata wali ta yida, kaha tabo danga beni Yesus, linage tabarada yida, ⁵¹ "Apa Ukku pareha Taurat yitta yini rakada wu ata ai range honage hada hatakna mono ai tada howe ha rayina?" ⁵² Yida da balehawe, "Apa yau dumo ata Galileawu? Hamtara kige mono eta kiwela wale lakdakma Nabi kawali ta galilea." Lawai Ha Yappa Tamra Jala Harayina ⁵³ Bege, yida tangada hagga ta umada diha-diha.