Yapayi Yesus ¹ Bana bewei Yesus takiwe hada inna, Nyi nakako ole dangadi ana hakodoNa ta bali lai weyo Kidron, hadau dage wu oma mono Yesus tama neda lari oledi anaha kodoNa. ² Yudas, wu wali ta ana hakodoNa na malajani Yesus, natada dumowe oma inna oroi Yesus na kali makaha dangadi ana hakodoNa nedo bali. ³ Yudas, kole bana hibayi tentara mono ata pahalewada Rato-rato kapala mono ata Farisi, amidi ta oma neda waina bada ngidi lentera, obora, mono bajla. ⁴ Yesus, katada kahawe tangage nimi kadadi tabaranNa, kako nage ta aro mono na kanukayi tabarada yida, "iyayi hama yegami?" ⁵ Yida dabalehawe, "Yesus wali ta Nazaret, " Yesus linage tabarada Yida, "Nauwagnai Yesus." Mono dumoi Yudas, kama lajani Nyi, na dede ole dangadi yida. ⁶ Kolei Yesus balinage, "Nauwagnai Yesus," ata rada da eruna mono bukka ta tana. ⁷ Bege, Yesus naka nuka liyi tabrada yida, "Iyayi hama yegami?" yida balehawe, "Yesus wali ta Nazaret." ⁸ Yeesus na balehawe, "Ug tak begimige tatabarami, Nauwagnai Yesus. Nyidawe, nyi mi mayegaga Nauwa, nyamadi ana hakodoGu rade kada kako." ⁹ Inne bana dadiwe daja lage kana banuge hatak benai Yesus."Wali tangadi Yau hayimu tabaraGu, Nauwa wali bungakma wuaki." ¹⁰ Simon Petrus, kangidi katopo, na lahuwe katopona mono nalakatayi ta ata paha lewada Rato Madakka, dajalage nalakata nani katilu kawanana ata paha lewa nada;ngarana ata paha lewa rato madaka nada yiknai Malkhus. ¹¹ Nyiwe, Yesus linage tabrai Petrus, "Hope hagawe katopomu! Koba weha enu AmaGu ha yinaga tabaraGu, waleg enu dahoni Nauwa?" Yesus Da Ngidiyi Tai Hanas ¹² Bege tangada Prajurit Romawi mono perwirada loho ata paha lewada ata Yahudi da yapayi Yesus mono da katini Nyi, ¹³ mono da ngidi uluyi Yesus tai Hanas, Yerana Kayafas, ba yikna Rato madaka ta dawu neda. ¹⁴ Mono, Kayafasla kaha nuadi ata Yahudi inna yikwe ka mangu gauna nyi wu ata mate tangada ana kaha rehana. Petrus Na Kaballuni Yesus ¹⁵ Simon Petrus mono wu ana hakodona wadeka dokuni Yesus. Ana hakodo wadeka nada da tadayi Rato Madaka mono tama ole dangani Yesus lari ta aro uma hadu Rato Madaka. ¹⁶ Tanyiduwe, Petrus nadede ta bali haddi, tabra binna. Bege, ana hakodo wadeka nada, katadai Rato Madaka, haga tabali hadi mono hanewe dangani lawai jawa binna, loho marangani Petrus tama. ¹⁷ Nyiwe, lawai jawa binna nada naka kanukayi Petrus, "Wale yapu gau kadugu yau wuyo wali ta ana hakodo rada? Balehawe Petrus, "Walekma!" ¹⁸ Kole bada rayina latti, tangada ata paha lewa mono perwira dede neda oroge mahigo neda mayagala nage, mono yida da kalikka. Petrus dumo oledi yida, dede mono kalikka. Rato Madakka Daka Nukayi Yesus ¹⁹ Bege, Rato madaka kanukayi Yesus tutu ana hakodoNa mono tutu ha akkaNa. ²⁰ Yesus na balehayi nyi, "Nauwag hanewe hira bewa ta panu tana. Nauwa ug pa akka hakitadi ta Sinagoge-sinagoge mono ta Uma Allah, hadu makahada tangada ata Yahudi. Nauwa walegu kal kabunyik mawa hanewe. ²¹ Aha mi mami kanuka dahomi tabaraGu? Kanuka dayi tabarada yida karange bewe agawe ha takkig Nauwa tabarada yida;yida da tadawe agawe ha tak beGu." ²² Kolei Yesus bana hanewe taudana, wu ata kama jawa kadede neda na kababa nage mataNa mono linage, "Tauda dage hadaMu balehayi Rato Madaka?" ²³ Yesus balehayi nyi, "Nyi Nauwa bagu takkawe kajala, hatingo gage jalage; tabolo nyi hatakkigu bana tenawe, aha yau mam kababa gage mataGu?" ²⁴ Loho, Hanas naha ngidini Yesus lari ta tilu makatti tabara Rato Madakka Kayafas. Petrus Na Kabalwalini Yesus ²⁵ Tamra hege inna, Simon Petrus enga hona dede mono kalika. Nyiwe, yida da kanikawe tabaraNa, "Mi wale ana hakodo jalak managu ata Nada?" Petrus na kabal jala mono na baleha, "Walekma." ²⁶ Wu ata paha lewada Rato Madaka, ka ole ateni nada lakata katilunai Petrus, linage, "Nauwa merag etawu yau bamu oleni Nyi ta oma inna?" ²⁷ Hadakka wali, Petrus naka balluni, ma nyidawe inna dumo, kuku nadi manu. Yesus Da Ngidiyi Ta Aroi Pilatus ²⁸ Bege, yida da ngidiyi Yesus wali ta hadau Kayafas ta umma matija, nedana na manari dama nage, mono yida dau wake da tamak ma lar ta uma matija dajalage yida ilda ha otorage tauda, kana dadiwe yayo Paskah. ²⁹ Nyiwe, Pilatus nahuna tabokayi yida mono nakanukayi, "Agawe paha dita mini ta ate nade?" ³⁰ Yida da balehawe mono lidage tabarana, "Aina japataka nade ata, nami walena dadik mawe bama ngidiyi Nyi tabaraMu." ³¹ Pilatus linage tabrada Yida, "Ngidiyi Nyi mono yini rakana dokuge hokumi."Ata Yahudi rada da baleha, ""Nyidawe walena tubadakmawe hokuna nami bama hoku mateNi wu ata." ³² Inne nadadiwe kana banuge hatak nai Yesus, kana hatingoge waige mate katujana Nyi bana mate. ³³ Nyiwe, Pilatus tama haga lari ta Umma tijana mono kamai kani Yesus, mono kanuka tabaraNa, "Apa Yau Raja Yahudiwu?" ³⁴ Yesus na balehawe, "Apa hanuk kamu inna wali ta tau daumu, waleka wali ta ata wadeka katakguge tutu Nauwa?" ³⁵ Pilatus linage, "Apa nauwa ata Yahudiwa? Kabihu ata mono rato-rato kapala Mu yida dau kayiwu Yau tabaragu. Aga bewe Yau harayim?" ³⁶ Yesus linage, "ParehaGu wale walik mage tapanu tana inne. Nyi parehaGu wali ta panu tanawe inne, kaha nukuwaLa enga hagabada dajalage Nauwa ilda yiwa ta ata Yahudi. Ta nyiduwe, parehaGu wale wali tapanu tanak mawe inne." ³⁷ Pilatus linage, "nyidawe Yau wuwu Raja?" Yesus nabalehawe, "Yauk na katakiwe inna Nauwa ba rajawa. Tut innawe Nauwag dadiwa, mono tut inna jalawe Nauwa bagu maiwa ta panu tana, haluguna tut pahirawe katena. Tangana ata kawali katenaenga rage nage liGu." ³⁸ Pilatus linage tabaraNa, "Agawe katena inna?" Mono, balinage kataudana, Pilatus huwal nagetabokayi ata Yahudi, mono lidage tabarada yida, "Nauwa lakma Jala hatabo guni tabaraNa. ³⁹ Tabolo, miyo kakal damawe inna nauwa bagu pahoila hona ata hatama ta gallu talado Paskah. Nyiwe, apa miyo um awu dajalage nauwa kagu pahoilayi 'Raja ata Yahudi'nade?" ⁴⁰ Yida da baleha wali waige kawula, "Ilam pahalayi ata nade, taboloi Barabas!" Barabas yi wu ata kareboyi.