¹ Salam waltai Yakobus ledu limma nai Allah monno Mori Yesus Kristus, tabarada kabullu duda kabihu kamma hallara ta hagala pantana. Makaba Hatena Na Ngihige Tahna ² Olebai-olebaigu, hangada daggela ba wudawe ege ate innemiyo bamu monuka ta tangnga ngara makaba. ³ Oroge miyo um tadawe inne makaba tabara hatenamu na wudage taggoranna. ⁴ Pahaige taggoranna kayiwe ngihhige kabanna tannam miyo kam dadi bannuna monno walle la'kma ka bungammi, walle la'kma karauwam aga-agana. ⁵ Tabollo nyige, nyi badaka ta jongam miyo dadi karauwana angta tada, kanna gehadala karaiwe tabarai Allah, waige inne libawa ate kayiwe tabara tangngada ata aikamang otoranna, monno inno kanna yinage tabarana. ⁶ Tanyiduwe, nyiyo nakka raidahowe waige hatena monno illa na namoka oronage nadde ata kanamo natujja dawe inne ngalung bannu, pahha upna rereha nuttu nimmi. ⁷ Na ata kataudana illana hangada dagge banna hibba langka agakayi kawalta Mori. ⁸ Nadde ata kahanga atena walle nakadannama tatil tangngage lara morhanna. Hapote Katau Takkanna ⁹ Olebai inne morha katuttuki kabobi dangnga dahogge inne nyiyo bahamma dehtayi, ¹⁰ monno ata pote badikige rahige baha dauwuyi neddo tahadawu kahadda bawana kataudanna walla ruta, nyiyo engana bungnga. ¹¹ Oroge, mata lado banna huddaka neddo ngangahanna banna ki-ki marawaka, monno banna hamalele kanna ruta, wallana na monuyi, monno nabungnga wi'kwe dahhanna. Katauda wi'knage, ata pote engada bunga tatil tangngadi pa orhadda. Makaba Walle Kawali Mauwe Tai Allah ¹² Hamaringngi'ila ata katagranno larta tamma kaba oronage nyiyo bamang tajka inne taggora makaba, nyiyo nahibbayi nadde mahkota morha tabarada kamma manawaranni Nyiyo. ¹³ Nyibadaka wu ata hakaba, illa nahaneweka nyiyo, "Nauwa tangra kaba naggai Allah.” Oroge, Allah walle nadadimauwe nai kajapata banna makaba monno Allah walle nakaba manna langka iyai. ¹⁴ Tanyiduwe, ngara dukkana ata kabani neddo nyiyo nayoriyi monno kattinni habai dauna. ¹⁵ Kole neddo ha ma'kna banna wuwe, nyiyo enga nahha dadina jala monno kole inne jala banna ma'kkawe, nyiyo enga nahha dadige mate. ¹⁶ Olebai-olebai hamanawaraggu, illam jallorakka. ¹⁷ Ngara dukkaddi radde ha yi kadahha monno ha yi kabannuna ammidi wali dete, na burruyi waltai Ama hagala magakahha, tabara-Na walle la'kma kahha jeluna lohho kappa hepana mawoge. ¹⁸ Tapannu hakabbu ate dauwu-Na, Nyiyo nahha dadida yitta waina li katena tannam yitta kanna dadiwe wuyo kaullu walta ta tangngadi tangngadi harai-Na. Rangngewe Monno Rayige Liyoi Mori ¹⁹ Olebai-olebai hamanawaragu, hamatraggela inne: banna modadahewe dihha-dihha ata gehage ranngewe, monno kailla nagehada hanewe, monno kaillana gehada banna bani. ²⁰ Oroge bani kadadi ata walle na rayi ullanmagge katena nai Allah. ²¹ Oronage inno, baitagge taangngage aika murraha monno kajapata kabuta, monno hibbawela waige libawamawu li Allah beha hamullabe tabaramu, kamakkage pahoila gunni urramu. ²² Kamdadi karayige li monno walle karangnge dakelmawe; nyiba aidaka, miyo tip migge tauwu dauwumi. ²³ Oroge, tabollo aina rayikage, nyiyo natujjayi nadde ata kakejuwe matana takka ninno. ²⁴ Kole banna kejuwe tauna monno na kako, nyiyo na geha dangngagge baagalinnawe hadage matana. ²⁵ Tanyiduwe, ata kahha matragge ukpareha kabannuna, inne ukkupareha kahatailoyi, monno kamapha neddo lari, nyiyo walle rangnge dkelamanage lohho dangngage, tabollo nadadi karayige li. Nyiyo enga hammaringuyi ta pan tangngage harayina. Kangote Katena Tabara Allah ²⁶ Nyibadaka ata kahha ngadage nyiyo namma nono kangotena, tabollo nyiyo walle nadadimawe pattiwe lammana, nyiyo tipnagge ate dauna. Inno manonona walle la'kma gauge. ²⁷ Kangote ka murraha monno aika otora ta aroi Allah monno Amada yitta nydawe inne lo dikkiddi lakawa ana lalo monno lawai balu-lawai balu ta mayillada yidda, monno daka rawa dauwetauda tannam kailla namma nyarhawe oro pannutana